လါအ့ဖြ့ၣ်(၁၈)သီ,၂၀၂၅နံၣ်
အပူၤကွံၥ်အလါ(၂၀)အတီၫ်ပူၤ ကလံၤစိးကီၫ်ခိၣ်ရံယါန့ၣ် လၢယူၣ်ကရ့တၫ်ဒုးပျီအပူၤ မျိာ်သၣ်အချံ(၄)ကကွဲၫ်ဘျဲၣ် လၢတၫ်သူတ့ၫ်၀ဲန့ၣ် ဆှၢန့ၫ်ဃီၤ၀ဲကီၫ်ရၢရှၢၣ်အဂ့ၫ် တၫ်သ့ၣ်ညါဘၣ်လီၤ.
တၫ်ဆၢကတီၫ်၀ဲန့ၣ်အတီၫ်ပူၤ ကလံၤစိးကီၫ်ခိၣ်ရံယါန့ၣ် ကိၣ်တ့ၣ်နၢၣ်အဖျၢၣ်(၁၅၈၀၀)ဘျဲၣ်လၢ ဖၢနုာ်ဃာ်၀ဲဒီးကျိချံတဖၣ် ဆှၢဃီၤ၀ဲဆူ ကီၫ်ရၢရှၢၣ်န့ၣ်လီၤ.
မျိာ်သၣ်အချံကာ်ဃုာ် ကိၣ်တ့ၣ်နၢၣ်(၁၆၀၀၀)ဃၣ်ဃၣ်န့ၣ် ခီဖျိလၢလ့ၣ်မ့ၣ်အူ လၢယူၣ်ကရ့ကီၫ်ဆၢအကပၤဆှၢဃီၤ ၀ဲဆူရၢရှၢၣ်၀ံၤ ယူၣ်ကရ့တၫ်ဒုးအပူၤ ပာ်ဖျါထီၣ်၀ဲ ကလံၤစိးကီၫ်ခိၣ်ရံယါ အတၫ်အိၣ်ထၢဆၢၣ်ဃုာ်ဒီးကီၫ်ရၢရှၢၣ်န့ၣ်လီၤ.
ယူၣ်ကရ့တကပၤ မၤန့ၫ်တၫ်ဂ့ၫ်တၫ်ကျိၤအဖီခိၣ် ကလံၤစိးကီၫ်ခိၣ်ရံယါန့ၣ် ဆှၢဃီၤ၀ဲဒၣ်ကျိဖးဒိၣ်အချံ (၄)ကကွဲၫ် တုၤ(၆)ကကွဲၫ်ဆူ ကီၫ်ရၢရှၢၣ်အဂ့ၫ် ပှၤလၢတၫ်ပၢၫ်တၫ်တဖၣ်တဲ၀ဲလီၤ.
လၢရၢရှၢၣ်သုးအဂီၫ်ကျိချံတဖၣ်န့ၣ် ကလံၤစိးခိၣ်ရံယါထံကီၫ်ကဲထီၣ်ဂ့ၫ်ခီၣ်ထံးတခါအဂ့ၫ် တၫ်ကစီၣ်တဖၣ်ပာ်ဖျါ၀ဲလီၤ.ကျိချံပှၫ်သၣ်လၢ ရၢရှၢၣ်သုးဖိတနီၤသူတ့ၫ်၀ဲန့ၣ် မ့ၫ်ကလံၤစိးကီၫ်ခိၣ်ရံယါဆှၢဃီၤန့ၫ်၀ဲလီၤန့ၫ် ရဲးတၣ်တၫ်ကစီၣ် ဃုထံၣ်သ့ၣ်ညါ၀ဲလီၤ.
ကလံၤစိးကီၫ်ခိၣ်ရံယါန့ၣ် ရၢရှၢၣ်ကျိဖးဒိၣ်သုးအသးသမူသွံၣ်ကျိၤလၢအမ့ၫ် ၁၂၂ မံၣ်လံၣ်မံၣ်ထၢၣ်ဒီး ၁၅၂ မံၣ်လံၣ် မံၣ်ထၢၣ်ကျိဖးဒိၣ်အချံ(၄)ကကွဲၫ်ဘျဲၣ်န့ၣ် ဆှၢဃီၤ၀ဲဆူ ကီၫ်ရၢရှၢၣ်အဂ့ၫ် ယူၣ်ကရ့ ပ့ၫ်ဆှါ၀ဲၤကျိၤတဲ၀ဲအဖီခိၣ် တၫ်သ့ၣ်ညါဘၣ်လီၤ.
ရၢရှၢၣ်ကီၫ်အပူၤ တၫ်ထုးထီၣ်ကျိချံပှၫ်သၣ်စဲးဖီကဟၣ်တၫ်မၤလီၫ်တဖၣ် ၂၀၂၄နံၣ်အပူၤ ထုးထီၣ်၀ဲကျိဖးဒိၣ်အချံန့ၫ် (၂)ကကွဲၫ်တုၤ(၂.၃)ကကွဲၫ်အဂ့ၫ် ယူၣ်ကရ့ဒီးမုၫ်နုာ်ထံကီၫ်တဖၣ် တယာ်ဃး၀ဲဘၣ်ဆၣ် ကလံၤစိးကီၫ်ခိၣ်ရံယါ ကျိဖး ဒိၣ်အချံတဖၣ် မ့ၫ်တၫ်ကဲဘျူးလၢ ရၢရှၢၣ်သုးဖိအဂီၫ်န့ၣ်လီၤ.
ကလံၤစိးကီၫ်ခိၣ်ရံယါန့ၣ် ယူၣ်ကရ့တၫ်ဒုးအပူၤ တၫ်ကဒုးစၢၤရၢရှၢၣ်အဂီၫ် ပျၫ်လီၤဃာ်အသုးဖိတဖၣ်အိၣ်စ့ၫ်ကီး၀ဲန့ၣ် လီၤ.
Ref: Ayeyarwaddy Times
