လါအ့ဖြ့ၣ်(၁၈)သီ,၂၀၂၅နံၣ်
ကညီကီၫ်စဲၣ်,ကီးတရံးကီၫ်ဆၣ်အပူၤ ၀့ၫ်ကီးတရံးဒီး၀့ၫ်ကြူၫ်တုအခိၣ်အဃၢၤ တၫ်ဒုးတဖၣ်ကဲထီၣ်အဃိ လၢကြူၫ်တုကၠဲတိၤအသီန့ၣ် သုးကီၣ်ကးတကပၤ ကးတံာ်ကွံာ်၀ဲအဂ့ၫ် တၫ်သ့ၣ်ညါဘၣ်လၢ ပှၤနီသိလ့ၣ်ဖိ ဒီးတၫ်ပၢၫ်ဆၢသုးဖိတဖၣ်အအိၣ်န့ၣ်လီၤ.
ကီးတရံး-ကြူၫ်တု အ့ရှၢၣ်ကျဲမုၫ်ဖးဒိၣ်ဒီတကျိၤအပူၤ အပူၤကွံာ်(၂)သီန့ၣ် တၫ်ဒုးကဲထီၣ်ဒိၣ်ဒိၣ်မုာ်မုာ်၀ံၤ သုးကီၣ်ကးတကပၤ ဟဲခးလီၤစၢၤတၫ်လၢကလံၤကျါ,ဒြိဒီးကျိဖးဒိၣ်တဖၣ်အသိး ဖၣ်တကပၤစ့ၫ်ကီး ပျၫ်လီၤသုးဖိလၢအကယၤဂၤ လၢကလဲၤမၤစၢၤတၫ်၀ံၤ ဟံးန့ၫ်ဃာ်တၫ်လီၫ်ဖဲကၠဲတိၤသီအဂ့ၫ် ပှၤလီၫ်က၀ီၤဖိဒီးသုးဂ့ၫ်ခီၣ်ထံးတၫ်ကစီၣ်တဖၣ် တဲ၀ဲလီၤ.
ပှၤလီၫ်က၀ီၤဖိတဂၤတဲ၀ဲလၢ “ပဟဲက့ၤထီၣ်ဖဲမဟါအနံၤလီၤ.လဲၤမၤစၢၤပှၤလၢတူၫ်ဘၣ်ဟီၣ်ခိၣ်ဟူး တၫ်မၤဘၣ်ဒိဘၣ်ထံးလီၤ.ဖဲန့ၣ်နၫ်ဟူတၫ်ကစီၣ်လၢတၫ်ကးတံာ်ကွံာ် ကၠဲတိၤအဃိ ကက့ၤကဒါက့ၤအဂီၫ်ပျံၤတၫ်အဃိ က့ၤတရံးဆူထံၣ်ယိၣ်၀ံၤ ဟဲက့ၤထီၣ်ဃီၤဆူ ထိၣ်ကီးကိကျဲတကပၤအဂ့ၫ်”န့ၣ်လီၤ.
ခီတဲာ်ကၠဲထံကျိ၀ံၤ ကၠဲတိၤသီလၢ ဆဲးကျိးဃာ်၀ဲ ၀့ၫ်ကြူၫ်တုဒီးကီးတရံးကီၫ်ဆၣ်သ၀ီတဖၣ်န့ၣ် အပူၤကွံာ်လါမးရှး (၉)သီအနံၤန့ၣ် တၫ်အိးထီၣ်၀ဲ၀ံၤ လၢကတီၫ်အံၤ သုးကီၣ်ကး ပာ်ဂံၫ်ပာ်ဘါ၀ဲလၢကမၤပှဲၤဂံၫ်ဘါအဂီၫ်အဂ့ၫ် လီၫ်က၀ီၤသုးဂ့ၫ်ခီၣ်ထံးတၫ်ကစီၣ်တဂၤတဲ၀ဲလီၤ.
“သုးကီၣ်ကတကပၤ ကးတံာ်ကွံာ်၀ဲန့ၣ်မ့ၫ်လီၤ.ဘၣ်ဆၣ်သိလ့ၣ်တနီၤဒု ဒုးခီ၀ဲအိၣ်လီၤ.တိၤန့ၣ် မ့ၫ်လၢတၫ်ကမၤပှဲၤ ဟီၣ်ခိၣ်လိၤသုးဂံၫ်ဘါအဂီၫ်ဒီးတၫ်ကစိာ်ဆှၢကျိဖးဒိၣ်အဂီၫ်ကျဲ”န့ၣ်လီၤ.
ကီးတရံးဒီးကြူၫ်တုအဘၢၣ်စၢၤ သုးကီၣ်ကးသုးကလၢၤတဖၣ်ဒီးတၫ်လီၫ်လၢဆီလီၤဃာ်အသုးတဖၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA),တလၢၤတၫ်ပၢၫ်ဆၢသုးတဖၣ်ဒီးကမျၢၫ်တၫ်ဒီသဒၢသုး(PDF)သုးပာ်ဖှိၣ်တဖၣ် ထီၣ်ဒုး ဃီၤ၀ဲ၀ံၤ စးထီၣ်ဖဲလါအ့ဖြ့ၣ်(၁၅)သီအနံၤန့ၣ် တၫ်ဒုးဆူၣ်ထီၣ်ကဒီး၀ဲအဂ့ၫ် တၫ်သ့ၣ်ညါဘၣ်လီၤ.
Ref: The Irrawaddy
