လါမးရှး(၁၈)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ တၢ်မၤ၀ဲ ကီၢ်ရ့ၣ်ချၢၣ်လွံၢ်ထူၣ် တၢ်မၤဂ့ၤထီၣ်သးစၢ်ကံၢ်စီတၢ်ရဲၣ်တၢ်ကျဲၤ(Wisdom)ကၠိစံၣ်လီၤအမူးတၢ်ရဲၣ်တၢ်ကျဲၤ အဆိကတၢၢ်တဘျီ ဖဲလါမးရှး(၁၅)သီ, ၂၀၂၅နံၣ်အနံၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
“တၢ်ဘျၢလီၤလၢ ပှၤသးစၢ်အဂီၢ်န့ၣ် မ့ၢ်တၢ်ဘျၢလီၤလၢ ထံကီၢ်ခါဆူညါအဂီၢ်အဂ့ၢ်”တၢ်ကတိၤဖိအိၣ်အသိး တၢ်ပညိၣ်အိးထီၣ်၀ဲ တၢ်မၤဂ့ၤထီၣ်သးစၢ်ကံၢ်စီတၢ်ရဲၣ်တၢ်ကျဲၤ(Wisdom)ကၠိအံၤလၢ ဒ်သိးကသ့ၣ်ညါနၢ်ပၢၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၥ်လီၤဃၥ်ကညီတၢ်ပၢၢ်ဆၢတၢ်တူၢ်ခီၣ်ပၥ်သး တၢ်မၤကျဲ, သးသဟီၣ်,ထံရူၢ်ကီၢ်သဲး, တၢ်ကရၢကရိ,စုသ့တၢ်ကူၣ်ဘၣ်ကူၣ်သ့, သုးဂ့ၢ်၀ီ, တၢ်ပၢဆှၢရဲၣ်ကျဲၤဂ့ၢ်၀ီအဂီၢ်အဂ့ၢ် စံး၀ဲန့ၣ်လီၤ.
ဒ်န့ၣ်အသိး ကညီတၢ်ပၢၢ်ဆၢတၢ်တူၢ်ခီၣ်ပၥ်သး တၢ်မၤကျဲတဖၣ်, ထံရူၢ်ကီၢ်သဲး, သးသဟီၣ်ဂ့ၢ်၀ီဒီး စုသ့တၢ်ကူၣ်ဘၣ်ကူၣ်သ့တဖၣ်လၢ မၤလိတ့ၢ်၀ဲတဖၣ် ကသူက့ၤဒီးကက့ၤသူၣ်လီၤဆီလီၤလၢ နီၢ်ကစၢ်ဟီၣ်က၀ီၤပူၤတဖၣ်အဂီၢ်ဒီးကဃုသ့ၣ်ညါတၢ်တဘိယူၥ်ဃီဒီးလဲၤသဃၢၤလိၥ်သးဒီးဟီၣ်ခိၣ်ထံကီၢ်တဖၣ်ကသ့အဂီၢ် တၢ်ပညိၣ်အိးထီၣ်ဃၥ်၀ဲအဂ့ၢ်စ့ၢ်ကီး စံး၀ဲန့ၣ်လီၤ.
တၢ်ရဲၣ်တၢ်ကျဲၤအံၤအပူၤ ကီၢ်ရ့ၣ်ချၢၣ်လွံၢ်ထူၣ်တၢ်ပၢဆှၢဟီၣ်က၀ီၤပူၤ ကီၢ်ဆၣ်တဖၣ်ဒ်အမ့ၢ် ဆီထံး, လၢၢ်ဒိၣ်, မူကီၢ်ဆၣ်ခၢၣ်စးကၠိဖိသးစၢ်တဖၣ်, ကီၢ်ရ့ၣ်,သုးက့,သုးရ့ၣ်ခၢၣ်စးသးစၢ်တဖၣ် ခဲလၢၥ်(၃၂)ဂၤ ဖျိထီၣ်ကၠိအဂ့ၢ် တၢ်သ့ၣ်ညါဘၣ်န့ၣ်လီၤ.
(Wisdom)ကၠိစံၣ်လီၤမူးတၢ်ရဲၣ်တၢ်ကျဲၤအံၤအပူၤ လီၢ်ခၢၣ်သး,ကီၢ်ရ့ၣ်,ကီၢ်ဆၣ်, သုးရ့ၣ်ပှၤဘၣ်မူဘၣ်ဒါတဖၣ်, ကၠိဖိမိၢ်ပၢ်တဖၣ် ဟဲထီၣ်ဟ့ၣ်ဂံၢ်ဟ့ၣ်ဘါ၀ဲအသိး ခိၣ်နၢ်လၢဟဲထီၣ်ဟ့ၣ်ဂံၢ်ဟ့ၣ်ဘါ၀ဲတဖၣ်စ့ၢ်ကီး ကတိၤစံးဘျူးဒီးဟ့ၣ်ဂံၢ်ဟ့ၣ်ဘါ၀ဲ ကၠိဖိမုၣ်/ခွါလၢအဖျိထီၣ်တဖၣ်ဒီး သရၣ်/သရၣ်မုၣ်တဖၣ်လၢ အမၤစၢၤသိၣ်လိတ့ၢ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
