လါမးရှး(၁၀)သီ,၂၀၂၅နံၣ်
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးကတၢတံးသုးကလၢၤလၢ အိၣ်ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်, ဖၣ်ပူၣ်-ကမးမိၢ်ကျဲမုၢ်အဖီခိၣ်အဂ့ၢ် သုးက့နီၣ်ဂံၢ်ယဲၢ် ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
“ဒူသ၀ီဖိတဖၣ် ဘၣ်ပျံၤဘၣ်ဖူး၀ဲလီၤ. သုးကီၣ်ကးတပၤစ့ၢ်ကီး ဆှၢအါထီၣ်အပှၤန့ၣ်လီၤ. မ့မ့ၢ်လၢပ၀ဲတခီဒု ပထီၣ်ဒုးမၤန့ၣ်ဃၥ် သုးကီၣ်ကးကတၢတံးသုးကလၢၤလံန့ၣ်လီၤ. ဘၣ်ဆၣ် BGFတၢ်လီၢ်တခီဒု အိၣ်တ့ၢ်ဒံးလီၤ. ဒူသ၀ီဖိတဖၣ် ဘၣ်ယိၣ်လၢတၢ်ဒုးကကဲထီၣ်ကဒီး ဃ့ၢ်ပူၤဖျဲးအသးလံ”အဂ့ၢ် အ၀ဲစံး၀ဲန့ၣ်လီၤ.
KNLAတီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ် စးထီၣ်ထီၣ်ဒုး၀ဲ သုးကီၣ်ကးကတၢတံးသုးကလၢၤ ဖဲအပူၤကွံၥ် လါဖ့ၤဘြူၤအါရံၤ(၂၉)သီအနံၤဒီး ယံၤလါတ၀ၣ်အဆၢကတီၢ်န့ၣ် ထီၣ်ဒုးမၤန့ၢ်ကွံၥ်၀ဲန့ၣ်လီၤ.
ကတီၢ်ခဲအံၤန့ၣ်သုးကီၣ်ကးတပၤမၤ၀ဲကလံၤကျါတၢ်ဒုးတဖၣ်အိၣ်ထီၣ်လၢဖၣ်ပူၣ်အဆှၢလၥ်တပၤဒီးကတၢတံးသ၀ီအဘၢၣ်စၢၤအဂ့ၢ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်စံး၀ဲန့ၣ်လီၤ.
“လွံၢ်သီအနံၤ ၉နၣ်ရံၣ်ဘျဲၣ်အဆၢကတီၢ်န့ၣ် ဟဲတ့ၢ်မ့ၣ်ပိၢ်လၢကၠီးကွ့သီခါဖၠၣ်အပူၤလီၤ. ဘၣ်၀ဲ သီခါသၢဂၤစလၢၥ်လီၤ. တဂၤန့ၣ် ဘၣ်သံ၀ဲလီၤ. သီခါအဂၤခံဂၤတခီ ဘၣ်တၢ်လဲၤဆှၢအီၤ ဆူဖၣ်အၣ်တၢ်ဆါဟံၣ်န့ၣ်လီၤ. ဖဲတၢ်လဲၤဆှၢတၢ်ဆါဟံၣ်အဆၢကတီၢ် သီခါသံကဒီးတဂၤန့ၣ်လီၤ. သီခါလၢအိၣ်တ့ၢ်တဂၤတခီ လဲၤတုၤလၢတၢ်ဆါဟံၣ်ဒၣ်လဲၣ် တသ့ၣ်နီၣ်ထီၣ်အသးဒံးဘၣ်”အဂ့ၢ် အ၀ဲတဲ၀ဲန့ၣ်လီၤ.
ကတီၢ်ခဲအံၤန့ၣ် လီၢ်က၀ီၤဖိတဖၣ်လၢ အိၣ်ဖဲဖၣ်ပူၣ်-ကမးမိၢ်ကျဲမုၢ်အဘၢၣ်စၢၤဒူသ၀ီဖိပူၤတဖၣ် အိၣ်၀ဲလၢဒူသ၀ီပူၤ တဘူၣ်လၢၤဘၣ်ဒီး ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါနိၣ်၀့ဘၢၣ်(၂၂)သီ, ၂၀၂၅နံၣ်အနံၤန့ၣ် တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲ သုးကီၣ်ကး ကစၢၢ်သၢဖျၢၣ်သုးကလၢၤဒီးမးထီသုးကလၢၤတဖၣ်လၢ အိၣ်ဖဲသုးက့နီၣ်ဂံၢ်(၅) ဟီၣ်က၀ီၤပူၤန့ၣ်လီၤ.
Ref: Than Lwin Khet News
