လါဖ့ၤဘြူၤအါရံၤ(၂၀)သီ,၂၀၂၅နံၣ်
ရၢၢ်ခၢၣ်ကီၢ်စဲၣ်, ၀့ၢ်စ့းတွ့ၣ်အပူၤ သုးကီၣ်ကးအသုး ဖီၣ်န့ၢ်ဆူၣ်ပှၤမိၣ်စလ့ၣ်ဖိ(၁၀၀)ဘျဲၣ်၀ံၤ ဟ့ၣ်သုးတၢ်သိၣ်လိအဂ့ၢ် ပှၤ၀့ၢ်စ့းတွ့ၣ် သုးဂ့ၢ်ဂီဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
သုးကီၣ်ကးအသုးဟ့ၣ်တၢ်သိၣ်လိဖဲလီၢ်က၀ီၤသုးတၢ်နဲၣ်လီၤသုး၀ဲၤလီၢ်ခိၣ်သ့ၣ်(စ့းတွ့ၣ်)၀ဲၤဒၢးခိၣ်ကျၢၢ်အမဲၥ်ညါပၥ်ဃုၥ် နၣ်ရံၣ်ကၣ်တးအူသီခါဖၠၣ်အမဲၥ်ညါအဂ့ၢ် တၢ်သ့ၣ်ညါဘၣ်န့ၣ်လီၤ.
“ယထံၣ်လၢ ပှၤမိၣ်စလ့ၣ်ဖိတဖၣ် တၢ်ဟ့ၣ်သိၣ်လိ ဖဲနၣ်ရံၣ်ကၣ်တးအူသီခါဖၠၣ်အကရၢၢ်ပူၤလီၤ. ကအိၣ် ပှၤမိၣ်စလ့ၣ်(၁၀၀)ဘျဲၣ်ညါ. အဟ့ၣ်သုးတၢ်သိၣ်လိ ကအိၣ်လါတ၀ၥ်ဃၥ်ဃၥ်လံန့ၣ်လီၤ. အပူၤကွံၥ်စ့ၢ်ကီးန့ၣ် မၢပှၤမိၣ်စလ့ၣ်ဖိတဖၣ် ထီၣ်သုးတၢ်သိၣ်လိန့ၣ်လီၤ. မ့ၢ်၀ံၤန့ၣ် ဆှၢအီၤဆူတၢ်မဲၥ်ညါအဂ့ၢ်” ပှၤ၀့ၢ်စ့းတွ့ၣ်ဖိ စံး၀ဲန့ၣ်လီၤ.
စ့းတွ့ၣ်ကီၢ်ဆၣ်အပူၤ ပှၤမိၣ်စလ့ၣ်ဖိအိၣ်ဒူသ၀ီတဖၣ်ဒ်အမ့ၢ် ဘူးမ့ၣ်,ဘၣ်ဆၣ်, သဲခၠီ,သဲးကဲၣ်ပၠ့ၣ်, ဒါပဲၣ်,အိတီကၠံ, အိတီငဲၣ်ဒူသ၀ီပူၤ ပှၤမိၣ်စလ့ၣ်ဖိတဖၣ် ဘၣ်တၢ်ထၢန့ၢ်ဆူၣ်သုးဒီးကဘၣ်ထီၣ်လဲၤထီၣ်သုးတၢ်သိၣ်လိန့ၣ်လီၤ.
စးထီၣ်လၢ သုးကီၣ်ကးပၥ်လီၤ တၢ်ထၢဆူၣ်သုးသဲစးတၢ်ဘျၢ၀ံၤအလီၢ်ခံဒီးတုၤခဲအံၤန့ၣ် ပှၤမိၣ်စလ့ၣ်ဖိလၢအိၣ်ဖဲရၢၢ်ခၢၣ်ကီၢ်စဲၣ်ပူၤတဖၣ် ဘၣ်တၢ်ထၢန့ၢ်ဆူၣ်သုးဒီး တၢ်ဟ့ၣ်သုးတၢ်သိၣ်လိန့ၣ်လီၤ.
ကတီၢ်ခဲအံၤန့ၣ် သုးကီၣ်ကးအသုးဒီး AAအဘၢၣ်စၢၤ ခးလိၥ်သးလၢ ကျိဖးဒိၣ်တဖၣ် ဆူၣ်ထီၣ်လၢ ၀့ၢ်စ့းတွ့ၣ်အကပၤ၀ံၤ မ့မ့ၢ်လၢသုးကီၣ်ကးတခီ လဲၤဒုးတၢ်လၢကလံၤကျါဒီးကျိဖးဒိၣ်တဖၣ်ဆူ ပိၣ်နါကၠိဒီး ပီးတီကီၢ်ဆၣ်တဖၣ်အပူၤ တပယူၥ်ဃီအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: DVB
