လါဖ့ၤဘြူၤအါရံၤ ၂၀သီ ၂၀၂၅နံၣ်
သုးကီၢ်ကးအသုးလဲၤနုၥ်လီၤသုးကျိဆူ၀့ၢ်တကူၣ်ဒ၀ဲၢ်သိလ့ၣ်ကျဲမုၢ်အဃိဒူသ၀ီဃုဖျၣ်ပူၤလီၢ်က၀ီၤကမျၢၢ်တကထိဃၣ်ဃၣ်ဘၣ်ဃ့ၢ်ပူၤဖျဲးသးအဂ့ၢ်တၢ်သ့ၣ်ညါဘၣ်လၢ ပှၤလၢဃ့ၢ်ပူၤဖျဲးသးတဖၣ်အိၣ်န့ၣ်လီၤ.
ဖဲလါဖ့ၤဘြူၤအါရံၤ(၁၇)သီအနံၤ, မုၢ်ဃ့ၢ်လီၤအဆၢကတီၢ်သုးကီၢ်ကးသုးလၢဂံၢ်အိၣ် ၂၀၀ ဃၣ်ဃၣ်သုးကျိၤအံၤဟဲနုၥ်လီၤသုးကျိဆူ ယ့ၣ်ဖၠူၣ်ကီၢ်ဆၣ် ည့ထွ့ သ၀ီတဆီဆူ ယ့ၣ်၀ဲသ၀ီအပူၤန့ၣ်လီၤ.
ခီဖျိလၢဟဲနုၥ်လီၤသုးကျိၤအဃိဒူသ၀ီတဖၣ်ဒ်အမ့ၢ် ယဲအဲၣ် , ပတဲခၠီ, ခီၣ်တဲၣ်ပၠ့ၣ်, ပခးအ့, က့ကိဒီး, ယ့ၣ်၀ဲ, ဒူသ၀ီတဖၣ်အပူၤပှၤလီၢ်က၀ီၤဖိတကထိဃၣ်ဃၣ်ဘၣ်ဃ့ၢ်ပူၤဖျဲးသးန့ၣ်လီၤ.
“ သုးကီၣ်ကးသုးအိၣ်ကတီၤသးလၢကနုၥ်လီၤသုးကျိၤအဂီၢ်ယံၥ်လံ. ဟဲနုၥ်လီၤဘျီပှၤဃ့ၢ်လၢၥ်လီၤ. လၢမုၢ်နၤတပၤစ့ၢ်ကီးတၢ်ခးပိၢ်ကျိတဖၣ်တၢ်နၢ်ဟူဘၣ်၀ဲအဂ့ၢ်” လီၢ်က၀ီၤဖိလၢဃ့ၢ်ပူၤဖျဲးသးတဂၤစံး၀ဲန့ၣ်လီၤ.
ကတီၢ်ခဲအံၤသုးကီၢ်ကးသုးကျိၤတဖၣ်အိၣ်၀ဲဒၣ်ဖဲ က့ကိသ၀ီအခိၣ်အဃၢၤ၀ံၤဒွဲၣ်အူကွံၥ်စ့ၢ်ကီးဟံၣ်တဖၣ်အဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤ.
“တၢ်ဒွဲအူကွံၥ်တဖၣ်အဃိကျီးတဖၣ်စ့ၢ်ကီးမ့ၣ်အူအီၣ်ကွံၥ်လီၤ.စးထီၣ်လၢဟါ ၄နၢ်ရံၣ်န့ၣ်ယထံၣ်ဘၣ်မ့ၣ်အူလုၢ်န့ၣ်လီၤ.မ့ၣ်အူအီၣ်ကွံၥ်ထဲလဲၣ်တခီတသ့ၣ်ညါဘၣ်”အဂ့ၢ်ပိၥ်ခွါတဂၤစံး၀ဲန့ၣ်လီၤ.
တလါအံၤတၢတနွံဒီးခံနွံတနွံစ့ၢ်ကီးသုးကီၢ်ကးသုးတဖၣ်လဲၤနုၥ်လီၤသုးကျိဆူဒူသ၀ီလၢအအိၣ်ဖဲ သယဲးခၠီဒီး ဒ၀ဲၢ်အဆၢဟီၣ်က၀ီၤပူၤ၀ံၤဒွဲၣ်အူမၤဟးဂီၤကွံၥ်လီၢ်က၀ီၤကမျၢၢ်တဖၣ်အဃိဒူသ၀ီနွံဖျၢၣ်အပူၤလီၢ်က၀ီၤကမျၢၢ်အကထိဃၣ်ဃၣ်ဘၣ်ဃ့ၢ်ပူၤဖျဲးသးဒံးန့ၣ်လီၤ.
ယ့ၣ်၀ဲသ၀ီလၢသုးကီၢ်ကးလဲၤနုၥ်လီၤသုးကျိအံၤဖဲအပူၥ်ကွံၥ်နံၣ်စ့ၢ်ကီးသုးကီၢ်ကးသုးဂံၢ်ဘါအါအါဂီၢ်ဂီၢ်တဖၣ်လဲၤနုၥ်လီၤသုးကျိ၀ံၤမၤဟးဂီၤကွံၥ်စ့ၢ်ကီး ယ့ၣ်၀ဲဒီးက့ကိသ၀ီအဘၢၣ်စၢၤတိၤတဘိန့ၣ်လီၤ.
Ref: The Tanintharyi Times
