လါဖ့ၤဘြူၤအါရံၤ(၂၀)သီ,၂၀၂၅နံၣ်
ကီၫ်ကၠီၣ်တဲၣ်ပၢၤကီၫ်ခိၣ်ကျၢၫ် Kitrat Panphetန့ၣ် ဖဲလါဖ့ၤဘြူၤအါရံၤ(၁၇)သီအနံၤန့ၣ် ထုးထီၣ်ဂ့ၫ်ဂီၫ်အူတၫ်ကလုၫ် လၢ ထံကီၫ်ဒီတဘ့ၣ်ပၢၤကီၫ်ကရၢဖိတဖၣ် လၢအ၀ဲသ့ၣ်တၫ်ပၢဟီၣ်က၀ီၤစုာ်စုာ်အပူၤ ကအိၣ်ခိးကွၫ်ဘၣ် ပှၤထံဂုၤ ကီၫ်ဂၤဖိတဖၣ် အတၫ်ဟူးတၫ်ဂဲၤအဂီၫ် လၢThe Nationတၫ်ကစီၣ်အပူၤ ပာ်ဖျါ၀ဲလီၤ.
တၫ်ကလုၫ်အံၤန့ၣ် နဲၣ်လီၤဃာ်၀ဲ တၫ်ပၢဆှၢပှၤကညီတၫ်နုာ်လီၤဟးထီၣ်ဂ့ၫ်၀ီ,Tourist ပၢၤကီၫ်ဒီးကီၫ်ဆၢပၢၤကီၫ်ပာ်ဃုာ် လၢထံကီၫ်ဒီတဘ့ၣ် ပၢၤကီၫ်၀ဲၤကျိၤခဲလၢာ်န့ၣ်လီၤ.
လၢထံကီၫ်တၫ်လီၫ်စုာ်စုာ်အပူၤ ပှၤထံဂုၤကီၫ်ဂၤဖိတဖၣ်န့ၣ် မၤတံာ်တာ် ပှၤကညီတၫ်အိၣ်မူအိၣ်ဂဲၤ,မၤကမၣ်ကမျၢၫ်သုး သ့ၣ်လၤကပီၤတဖၣ်,ကဲထီၣ်တၫ်တံာ်တာ်လၢကမျၢၫ်အဂီၫ်,မၤဘၣ်ဒိထံကီၫ်အလၤကပီၤဒီးတၫ်ဘံၣ်တၫ်ဘၢ မ့တမ့ၫ် တၫ်ဟူးတၫ်ဂဲၤလၢ မၤကမၣ်တၫ်ဘျၢတဖၣ်အဃိ ဘၣ်ထုးထီၣ်တၫ်ကလုၫ်ဒ်သိးအံၤအဂ့ၫ် တဲ၀ဲလီၤ.
တၫ်န့ၣ်အဃိ ပၢၤကီၫ်ကရၢဖိတဖၣ် ကမျၢၫ်တၫ်ဘံၣ်တၫ်ဘၢဒီးတၫ်သိၣ်တၫ်သီတဖၣ်န့ၣ် ကပာ်၀ဲလၢတၫ်အရ့ဒိၣ်၀ံၤ မၤထွဲ၀ဲအဂီၫ်ဒီးပှၤမၤကမၣ်တၫ်တဖၣ် တၫ်ကဟံးန့ၫ်ဘၣ်ဂ့ၫ်၀ီဒ်ကြၢးဒီးတၫ်ဘျၢအသိးအဂီၫ် နဲၣ်လီၤဃာ်၀ဲလီၤ.
လၢကတီၫ်အံၤ ကီၫ်ကၠီၣ်တဲၣ်ကလံၤစိး ၀့ၫ်ကံၫ်မဲအပူၤစ့ၫ်ကီး ပၢၤကီၫ်ကရၢဖိတဖၣ်ဒီးပှၤဘၣ်မူဘၣ်ဒါတဖၣ် နုာ်လီၤ သမံသမိးတၫ်လၢ တၫ်အီၣ်ကျးဒီးက၀ီၤဒ့ပူၤတဖၣ်အိၣ်စ့ၫ်ကီး၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
Ref:The Irrawaddy
