လါဖ့ၤဘြူၤအါရံၤ(၁၉)သီ,၂၀၂၅နံၣ်
အမဲရကၤဒီးရၢရှၢၣ်ပတီၫ်ထီမီၫ်သီတဖၣ်န့ၣ် ဖဲလါဖ့ၤဘြူၤအါရံၤ(၁၈)သီအနံၤန့ၣ် ထံၣ်လိာ်အသး ဖဲဆီၣ်ဒံၣ်အရ့ဘံ ယါ၀ံၤ တၢၣ်ပီၣ်တဲသကိး၀ဲဘၣ်ထွဲတၫ်မၤကတၢၫ်ကွံာ် ယူၣ်ကရ့ဒီးရၢရှၢၣ်အဘၢၣ်စၢၤ တၫ်ဒုးတၫ်ယၤန့ၣ်လီၤ.တၫ်ထံၣ် လိာ်သးအံၤ မ့ၫ်ခီၣ်တဃာ်တခါလၢ အမဲရကၤကီၫ်ခီၣ် Donald Trumpဒီး Vladimir Putinတဖၣ်အဘၢၣ်စၢၤ တၫ်ထံၣ် လိာ်တဲသကိးတၫ်ကန့ၫ်အဂီၫ် ခီၣ်ခါအဂ့ၫ်န့ၣ် ခံခီခံကပၤ မုၫ်လၫ်ဃာ်၀ဲလီၤ.
တၫ်တၢၣ်ပီၣ်တဲသကိးအပူၤ လၢအမဲရကၤတကပၤ ထံဂုၤကီၫ်ဂၤကိတိာ် Marco Rubioတီခိၣ်ရိၣ်မဲ၀ဲ၀ံၤ ဒီကလုာ်တၫ် ဘံၣ်တၫ်ဘၢပှၤဟ့ၣ်ကူၣ်တၫ် Mike Waltzဒီးဘၣ်ထွဲမုၫ်ထီၣ်တၫ်ခၢၣ်သးဟီၣ်က၀ီၤ အမဲရကၤမီၫ်သီ Steve Wikoff (စ တံ၀ံးကီး)တဖၣ် ပာ်ဃုာ်၀ဲလီၤ.လၢရၢရှၢၣ်တကပၤတခီ ထံဂုၤကီၫ်ဂၤကိတိာ် ergey Lavrovဒီးရၢရှၢၣ်ကီၫ်ခိၣ်အပျဲၫ်ခီၣ် ထံး Yuri Ushakov(ယူၣ်ရံၣ် အူၣ်ရှၣ်ကီး)တဖၣ်ပာ်ဃုာ်၀ဲလီၤ.
ယူၣ်ကရ့ခိၣ်နၫ်တကပၤ တဲဃာ်၀ဲလၢ တၫ်တကွဲမုာ်အီၤလၢ တၫ်တၢၣ်ပီၣ်တဲသကိးအံၤအပူၤဘၣ်ဆၣ် ယူၣ်ကရ့ကီၫ်ခိၣ် Volodymyr Zelenskyyတခီ တနံၤအံၤန့ၣ်ကထံၣ်လိာ်တၢၣ်ပီၣ်တဲသကိးတၫ်ဒီးဘၣ်ထွဲယူၣ်ကရ့အမဲရကၤမီၫ်သီ Keith Kellogg(ကံးကဲလီး)အိၣ်၀ဲန့ၣ်လီၤ.
အမဲရကၤဒီးရှရှၢၣ်ထံၣ်လိာ်သးဒ်သိးအံၤအဃိ ယူၤရပၤထံကီၫ်တဖၣ်အတၫ်ဘံၣ်တၫ်ဘၢနီၣ်၀ံၫ်ခံလၢအမ့ၫ် ဘၣ်ထွဲဒီး ယူၣ်ကရ့ဂ့ၫ်၀ီန့ၣ် လၢခါဆူညါတၫ်ထံၣ်လိာ်တဲသကိးအပူၤ ယူၣ်ကရ့ကြၢးပာ်ဃုာ်အဂ့ၫ် ဖဲတယံာ်ဒံးဘၣ်န့ၣ် တဲဃာ်၀ဲ လီၤ.
ဖြၣ်စ့ၣ်ကီၫ်ခိၣ် Emmanuel Macronစ့ၫ်ကီး လၢကီၫ်ဖြၣ်စ့ၣ်ပူၤမၤ၀ဲ ယူရပၤခိၣ်နၫ်တဖၣ်တၫ်အိၣ်ဖှိၣ်ဒီးဖဲလါဖ့ၤဘြူၤ အါရံၤ(၁၇)တၫ်အိၣ်ဖှိၣ်တဖၣ်အပူၤ တၢၫ်ပီၣ်တဲသကိး၀ဲဘၣ်ထွဲဒီး ယူၣ်ကရ့အဂီၫ် တၫ်ဒီသဒၢတၫ်လၢာ်ဘူၣ်လၢာ်စ့ၤ ဒီးတၫ်ဘံၣ်တၫ်ဘၢတၫ်အုၣ်ကီၤလၢကဲထီၣ်အသးသ့တဖၣ်န့ၣ်လီၤ.
ယူၣ်ကရ့ကီၫ်ခိၣ် Zelenskyyစ့ၫ်ကီး လၢယူၣ်ကရ့အဂီၫ် တၫ်ဘံၣ်တၫ်ဘၢတၫ်အုၣ်ကီၤမ့ၫ်တအိၣ်ဘၣ်န့ၣ် ရၢရှၢၣ်န့ၣ် ယူၣ်ကရ့တကးဘၣ် ယူၤရပၤထံကီၫ်လၢအဂၤတဖၣ်စ့ၫ်ကီး နုာ်လီၤဒုးန့ၫ်ဆူၣ်၀ဲအိၣ်သ့အဂ့ၫ် တဲ၀ဲလီၤ.
Ref: VOA
