လါဖ့ၤဘြူၤအါရံၤ(၁၇)သီ,၂၀၂၅နံၣ်
သုးကီၣ်ကးအသုးတဖၣ် ခးလီၤဒုး၀ဲ ကညီကီၫ်စဲၣ်,ဖၣ်အၣ်ကီၫ်ဆၣ်ဒီး၀့ၫ်ကမးမီအကပိာ်ကပၤ ဒူသ၀ီတဖၣ် အိၣ်အဂ့ၫ် က ညီဒီကလုာ်စၢဖှိၣ်ကရၢ,သုးက့နီၫ်ဂံၫ်(၅)ပှၤတဲတၫ်ပၢဒီးဂ့ၫ်ခီၣ်ထံးတၫ်ကစီၣ်တဖၣ်တဲ၀ဲလီၤ.
ဖဲလါဖ့ၤဘြူၤအါရံၤ(၁၅)သီ တုၤ(၁၆)သီနံၤ လၢခံသီအတီၫ်ပူၤ သုးကီၣ်ကးခးလီၤ၀ဲဒီးကျိဖးဒိၣ်တကးဘၣ်, မၤစ့ၫ်ကီး ၀ဲကလံၤကျါတၫ်ခးလီၤတၫ်တဖၣ်အဂ့ၫ် တၫ်သ့ၣ်ညါဘၣ်လီၤ.
ကမးမိၢ် တၫ်တိာ်ကူၣ်ကျဲၤသုးကလၢၤ,တီၣ်ကလ့ဒီးမၠဲၣ်ကလ့ သုးရ့ၣ်တဖၣ်ဒီး၀ါဘိတီ ကျဲသဂၢၫ် သုးကလၢၤတဖၣ်န့ၣ်ခးလီၤကျိဖးဒိၣ်ဖဲဃိၣ်လိၣ်ကျိကပၤ,၀ဲးကၠံသ၀ီကရူၫ်,ဒူသ၀ီတဖၣ်အပူၤဒီးလၢ၀့ၫ်ကမးမိၢ်အကပိာ်ကပၤ ဒူသ၀ီတဖၣ် အပူၤအဂ့ၫ် တၫ်သ့ၣ်ညါဘၣ်လီၤ.
“တၫ်ထီၣ်ဒုးမၤန့ၫ်ကတၢတံးလံအဃိ တၫ်ကထီၣ်ဒုးကမးမီအဂီၫ် ဆိမိၣ်၀ဲလၢ ပှၤကလဲၤထီၣ်ဆူ ဒူသ၀ီတကပၤလီၤ. တၫ်န့ၣ်အဃိ ပညိၣ်ဒုး၀ဲဒူသ၀ီတဖၣ်အံၤလီၤ.ကျဲန့ၣ်အိၣ်လီၤ.ဘၣ်ယိၣ်၀ဲလၢ လၢအံၤတကပၤ ကထီၣ်ဒုးအီၤအဃိ ကမ့ၫ်ဒၣ်ပျံၤတၫ်၀ံၤခးနါစိၤတၫ်လီၤအဂ့ၫ်”သုးဂ့ၫ်ခီၣ်ထံးတၫ်ကစီၣ်တဂၤ တဲ၀ဲလီၤ.
သုးကီၣ်ကးအတၫ်ဒုးတဖၣ်အဃိ ဘါဘီၣ်,ဘးဘွ့ကိဒီး၀ဲးကၠံသ၀ီပာ်ဃုာ် သ၀ီကပိာ်ကပၤ ဒူဖိသ၀ီဖိဟံၣ်ဃီတဖၣ် ဘၣ်ဟးဂီၤ၀ဲ၀ံၤ ပှၤလီၫ်က၀ီၤဖိအါတက့ၫ်န့ၣ် ဘၣ်လဲၤဃ့ၫ်ပူၤဖျဲးအသးဆူမၠဲၣ်ကၠံငူၣ်,ရွှ့ၣ်ကိတဆီ ဒီးဆူဖၣ်အၣ်, လူၫ် ပျဲၫ်တကပၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
“ဖဲလါဖ့ၤဘြူၤအါရံၤ(၁၅)သီအနံၤန့ၣ် ကဘီယူၤဟဲ တ့ၫ်လီၤမ့ၣ်ပိၫ် လၢသ၀ီပူၤန့ၣ်လီၤ.ခးလီၤစ့ၫ်ကီးကျိဖးဒိၣ်လီၤ. ဟံၣ်ဃီဟးဂီၤအိၣ်၀ဲလီၤ.ပှၤကညီဒုတအိၣ်လၢၤဘၣ်ဃ့ၫ်ဖျိးကွံာ်လံအဂ့ၫ်”၀့ၫ်ကမးမိၢ်ကပၤ,ဘါဘီၣ်သ၀ီဖိပိာ်မုၣ်တဂၤ တဲ၀ဲလီၤ.
ခ့ၣ်အဲၣ်ယူၣ်-သုးက့နီၫ်ဂံၫ်(၅)ပှၤတဲတၫ်ပၢ သုးခိၣ်ဒိၣ်ဂီၫ်ဂ့ၫ် စီၤကျၢၤဒိၣ်စ့ၫ်ကီးတဲ၀ဲလၢ “ခးလီၤကျိဖးဒိၣ်ဒီးကလံၤကျါးဒုးယၤ တဖၣ်န့ၣ် မ့ၫ်လီၤ.ဘၣ်မနုၤအဃိလဲၣ်န့ၣ် ပျံၤတၫ်အဃိ ဟးမၤနါစိၤတၫ်လီၤအဂ့ၫ်”န့ၣ်လီၤ.
တၫ်လီၫ်လၢသုးကီၣ်ကးဒုး၀ဲတဖၣ်န့ၣ် မ့ၫ်KNU,သုးက့နီၫ်ဂံၫ်(၁)ဒီးသုက့နီၫ်ဂံၫ်(၅)ဟီၣ်က၀ီၤအဆၢတဖၣ်၀ံၤ မ့ၫ်လီၫ်က ၀ီၤအရ့ဒိၣ်လၢ ဒုးယၤဂ့ၫ်၀ီအဂီၫ်၀ံၤ ပှၤသ့ၣ်ညါဟီၣ်ခိၣ်ဂီၤတၫ်အိၣ်သးတဂၤတဲ၀ဲလီၤ.လီၫ်က၀ီၤတဖၣ်အံၤန့ၣ် အိၣ်သူၣ်လီၤအသးဖဲကမးမီ-၀ါဘိတီကျဲမုၫ်ဖီခိၣ်အကပိာ်ကပၤ,ဃိၣ်လိာ်ကျိကၢၫ်နံၤ၀ံၤ လၢကျဲ၀ဲအံၤတဆီ တၫ်လဲၤ လီၤဆူ တလၢၤကီၫ်စဲၣ်,၀့ၫ်သထူၣ်သ့အသိး,လဲၤလီၤလၢကညီကီၫ်စဲၣ်,၀့ၫ်ဖၣ်အၣ် သ့စ့ၫ်ကီးန့ၣ်လီၤ.
Ref: Mizzima
