လါဖ့ၤဘြူၤအါရံၤ(၁၇)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤ(၁၅)သီအနံၤ, ဟါ(၁၂)နၣ်ရံၣ်အဆၢကတတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A) သုးရ့ၣ်(၉)ဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကီၣ်ကးတၢ်သမံသမိးတြဲၤသုးကလၢၤ(၃)ဖျၢၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်ဟီၣ်က၀ီၤအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကး(ခမရ-၅၆၀)တီခိၣ်ရိၣ်မဲ သုးပၥ်ဖှိၣ်တဖၣ်လၢ ဟဲဆီလီၤဃၥ်သး ဖဲနယွဲပ့ၣ်, တီၣ်၀ံးဒီးပိလိနိၣ်ဖိသ၀ီအကပၤ သ့ၣ်ဖိကျါသီခါဖၠၣ်တၢ်သမံသမိးတြဲၤတဖၣ် ဘၣ်တၢ်ထီၣ်ဒုးမၤရှဲပျီကွံၥ်အီၤန့ၣ်လီၤ.
ဘၣ်ထွဲဒီးတၢ်ထီၣ်ဒုးမၤရှဲပျီကွံၥ် သုးကီၣ်ကးတၢ်သမံသမိးတြဲၤသုးကလၢၤ(၃)ဖျၢၣ်အဖီခိၣ် လၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါ စံးဘၣ် R2K ဒ်အံၤန့ၣ်လီၤ.
“တီၣ်၀ံးဒီးထ့ၣ်တပ့ၣ်ဒူၣ်ဒါသုးကလၢၤတဖၣ် တၢ်ဒွဲၣ်ကွံၥ်အီၤ. တၢ်ထီၣ်ခး၀ံၤတၢ်ဒွဲၣ်ကွံၥ်၀ဲဒၣ်လီၤ. တၢ်မၤန့ၢ် (၆၀)မမ ခိၣ်မၣ်ဒိၣ်စ့ၣ်ပၠီ(၁)ခိၣ်ဖဲ ပိလိနိၣ်ဖိသ့ၣ်ဖိကျါသီခါကၠိဒီး မ့မ့ၢ်လၢ ကျိဖိသၢခိၣ်န့ၣ် တၢ်မၤန့ၢ်အီၤဖဲ နယွဲပ့ၣ်လၢအဘူးဒီးကၠီစိကါကျဲဖီခိၣ်လီၤ. တၢ်ကဲထီၣ်သးန့ၣ် တၢ်ဆၢကတီၢ်တခီ တဒ်သိးဘၣ်”အဂ့ၢ် လၢၢ်ဒိၣ်ကီၢ်ဆၣ် ပှၤကတိၤတၢ်ပၢ ပဒိၣ်စီၤ၀ါမုၢ်စံး၀ဲန့ၣ်လီၤ.
တၢ်ထီၣ်ဒုးရှဲပျီကွံၥ် သုးကီၣ်ကးတၢ်သမံသမိးတြဲၤ(၃)ဖျၢၣ်အပူၤ သုးကီၣ်ကးအသုး ဘၣ်သံ၀ဲ(၆)ဂၤ, ဘၣ်ဒိ၀ဲအါအါဂီၢ်ဂီၢ်အသိး တၢ်မၤန့ၢ်စ့ၢ်ကီး (၆၀)မမ ခိၣ်မၣ်ဒိၣ်စ့ၣ်ပၠီ(၁)ခိၣ်ပၥ်ဃုၥ် ကျိဖိ(၅)ခိၣ်ဒီး ကျိချံပှၥ်သၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်တၢ်ပၢဟီၣ်က၀ီၤ, ၀့ၢ်မုၢ်ဃါပျီပၢၤကီၢ်သုးကလၢၤအပူၤ သုးကီၣ်ကးအသုးတဖၣ် အိၣ်၀ဲဘၣ်ဆၣ် မ့မ့ၢ်လၢ တၢ်မၤပှဲၤအါထီၣ်သုးဂံၢ်ဘါ, ဟူးဂဲၤသုးဂ့ၢ်၀ီတဖၣ်တခီ တအိၣ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
မ့မ့ၢ်လၢ သုးကီၣ်ကးအသုးတဖၣ် ပညိၣ်ဒုးလီၢ်က၀ီၤကမျၢၢ်လၢ ခးလီၤကျိဖးဒိၣ်မ့ၢ်ဂ့ၤဒီး ဒြိတၢ်ဒုးတဖၣ်တခီ အိၣ်ထီၣ်၀ဲကိးမုၢ်နံၤလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, သုးက့(၇)ဘ့ၣ်, ကီၢ်ရ့ၣ်(၇)ဘ့ၣ်အပူၤ စးထီၣ်လၢ၂၀၂၅နံၣ်, လါယနူၤအါရံၤ(၁)သီတုၤ(၃၁)သီအနံၤ (၁)လါအတီၢ်ပူၤ တၢ်ဒုးကဲထီၣ်တ့ၢ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A),ကညီဒီကလုၥ်ဂၢၤသးကရၢ(K.N.D.O)တီခိၣ်ရိၣ်မဲတၢ်ပၢၢ်ဆၢသုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤခဲလၢၥ်ပၥ်ဖှိၣ်(၄၄)ဘျီ၀ံၤသုးကီၢ်ကးအသုးဘၣ်သံ၀ဲ(၁၆၁)ဂၤဒီးဘၣ်ဒိ၀ဲ(၁၆၆)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
