လါဖ့ၤဘြူၤအါရံၤ(၁၇)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,၀့ၫ်ငသဲကၠီ,သုးကီၣ်ကးအကျိဖးဒိၣ်သုး(၃၄၄)အကပၤ ရၢၫ်ခၢၣ်သုးမုၫ်ဒိၣ်(AA), လီၫ်က၀ီၤ ကမျၢၫ်တၫ်ဒီသဒၢသုးတဖၣ်ဒီးသုးကီၣ်ကးအဘၢၣ်စၢၤတၫ်ဒုးဆူၣ်၀ဲ၀ံၤ သုးကီၣ်ကးတကပၤ တ့ၫ်လီၤမ့ၣ်ပိၫ်လၢ ကလံၤတဒၢအိၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
၀့ၫ်ငသဲခၠီလၢ စီၤစုၤယံၤဒီး(၃၄၄) ကျိဖးဒိၣ်သုး(၄)မဲၣ်ဘျဲၣ်, မၠီးစါသ၀ီကပၤ သုးကီၣ်ကးဒီးAAသုးပာ်ဖှိၣ်တဖၣ်အဘၢၣ်စၢၤ ဖဲလါဖ့ၤဘြူၤအါရံၤ(၁၄)နံၤန့ၣ် တၫ်ဒုးစးထီၣ်ကဲထီၣ်၀ံၤ ဖဲ(၁၅)သီနံၤန့ၣ် သုးကီၣ်ကးတကပၤ တ့ၫ်လီၤမ့ၣ်ပိၫ်လၢကလံၤသဒၢတဖၣ်အဂ့ၫ် တဲ၀ဲလီၤ.
လီၫ်က၀ီၤဖိတဂၤတဲ၀ဲလၢ”လၢမၠီးစါန့ၣ်တၫ်ဒုးကဲထီၣ်လီၤ.သုးကီၣ်ကးအသုးခီၣ်ဆၢ၀ဲဆူၣ်ဆူၣ်ကလဲာ်လီၤ.တၫ်ဒုးဆူၣ်၀ဲလီၤ.ခးလီၤကျိဖးဒိၣ်အိၣ်အသိး တ့ၫ်လီၤမ့ၣ်ပိၫ်လၢကလံၤသဒၢစ့ၫ်ကီးအိၣ်၀ဲအဂ့ၫ်”န့ၣ်လီၤ.
AAဒီသုးပာ်ဖှိၣ်တဖၣ်န့ၣ် ထီၣ်ဒုးမၤန့ၫ်ဃာ်၀ဲ အ့ၣ်ယၣ်၀တံၣ်ကီၫ်ခီပူၤ မကၠံစ့ၣ်ဒီးဘီမံးဟီၣ်က၀ီၤတဖၣ်လၢဘူးဒီး ရၢၫ်ခၢၣ်ကီၫ်စဲၣ်,ကွး၀့ၫ်၀ံၤ လၢကတီၫ်အံၤ ထီၣ်ဒုးဃီၤ၀ဲလၢ ငသဲခၠီ,ယ့ၣ်ကၠံၣ်ဒီးသၣ်ပီကီၫ်ဆၣ်တကပၤန့ၣ်လီၤ.
ပှၤလီၫ်ကမှံဖိတဂၤတဲ၀ဲလၢ”ကမျၢၫ်တဖၣ်ဘၣ်ဃ့ၫ်ပူၤဖျဲးသးလီၤ.လၢဘီမံးတကပၤတၫ်ဒုးလီၤကဆှၣ်ဒီးအခဲအံၤဟဲက့ၤလၢ ငသဲခၠီတကပၤလီၤ.ထံၣ်ဘၣ်လၢ သုးကီၣ်ကးဟဲက့ၤစိၣ်လီၤ အပှၤသုးဖိလၢဘၣ်ဒိတဖၣ်အိၣ်၀ဲအဂ့ၫ်”န့ၣ်လီၤ.
AAအတၫ်ထီၣ်ဒုးဃီၤတဖၣ်န့ၣ် တမ့ၫ်လၢကဂုၤက့ၤအခံဘၣ်အမဲာ်ညါ သုးကီၣ်ကးအကျိဖးဒိၣ်သုးကလၢၤ(၃၄၄)န့ၣ် ထီၣ်ဒုး၀ဲန့ၫ်သ့အဃိ အခဲအံၤတၫ်ဒုးဆူၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ငသဲခၠီ,(၃၄၄)ကျိဖးဒိၣ်သုးကလၢၤအပူၤ ဖဲအပူၤကွံာ်တယံာ်ဒံးဘၣ်န့ၣ် သုးကီၣ်ကးတ့ထီၣ်ကဘီယူၤစံၣ်လီၤအလီၫ်လၢ ဂ့ၫ်ဂီၫ်အူအပူၤ၀ံၤ လၢကတီၫ်အံၤတ့ထီၣ်စ့ၫ်ကီးတၫ်သူၣ်ထီၣ်လၢတၫ်တသ့ၣ်ညါလီၤတံၫ်တဖၣ်စ့ၫ်ကီးအိၣ်၀ဲအဂ့ၫ် လီၫ် က၀ီၤဖိတဖၣ်တဲ၀ဲလီၤ.
Ref:DVB
