လါဖ့ၤဘြူၤအါရံၤ(၁၄)သီ,၂၀၂၅နံၣ်
တၢ်ပညိၣ်မၤ ပရဲလိၥ်ကျိခဲၣ်ဖ့လၢ တၢ်ကဒုးရှဲပျီကွံၥ် သုးကီၣ်ကးအသုးကလၢၤတဖၣ်လၢအိၣ်ဖဲ ပရဲလိၥ်ကျိဟီၣ်က၀ီၤပူၤအဃိ ထံဖိကီၢ်ဖိကမျၢၢ်တဖၣ် ကဆီၣ်ထွဲမၤစၢၤဘၣ် ပရဲလိၥ်ကျိခဲၣ်ဖ့အဂီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), သုးက့(၂)သုးက့ခိၣ် သုးခိၣ်ကျၢၢ်ဖိ Saw Augustine တဲဆီၣ်တခူထီၣ်ဃၥ်၀ဲန့ၣ်လီၤ.
ပရဲလိၥ်ကျိခဲၣ်ဖ့အံၤ တၢ်ကစးထီၣ်မၤအီၤလၢ လါဖ့ၤဘြူၤအါရံၤဒီးတုၤလါမးရှး(၃၁)သီအနံၤ, လၢယံၤ(၂)လါအတီၢ်ပူၤန့ၣ်လီၤ.
“ပရဲလိၥ်ကျိခဲၣ်ဖ့န့ၣ် ပတိၥ်ပၥ်မုၢ်လၢ်လၢ စ့ယိၤ(၃)ကကွဲၢ်န့ၣ်လီၤ. ကျိၥ်စ့လၢပဒိးန့ၢ်ဘၣ်တဖၣ်စ့ၢ်ကီးန့ၣ် ပကသူအီၤလၢ တၢ်ရဲၣ်တၢ်ကျဲၤတဘျီ၀ဲအံၤ လၢအကကဲဘျူးကဲဖှိၣ်၀ဲလၢ ပသုးဂ့ၢ်၀ီအဂီၢ်န့ၣ်လီၤ”အဂ့ၢ် သုးခိၣ်ကျၢၢ်ဖိ Saw Augustine စံး၀ဲန့ၣ်လီၤ.
သုးကီၣ်ကးအသုးလၢ အိၣ်ဖဲပရဲလိၥ်ကျိဟီၣ်က၀ီၤပူၤတဖၣ်အံၤ ပညိၣ်ဒုး၀ဲကမျၢၢ်လိၤလိၤလၢ တၢ်ခးလီၤကျိဖးဒိၣ်တဖၣ်,ဒြိတၢ်ဒုးတဖၣ်ဒီးကျဲအကလုၥ်ကလုၥ်အဃိထံဖိကီၢ်ဖိကမျၢၢ်တၢ်သံတၢ်ပှၢ်ဒီးတၢ်ဘၣ်ဒိဘၣ်ထံတဖၣ်အိၣ်ထီၣ်၀ဲ အါမးအဂ့ၢ် အ၀ဲစံး၀ဲန့ၣ်လီၤ.
“ခီဖျိလၢတၢ်ဂ့ၢ်တခါအဃိန့ၣ် ဒ်သိးပထံဖိကီၢ်ဖိတဖၣ် ကအိၣ်ကဆိးဘၣ်က့ၤ တၢ်ကပူၤဖျဲးထီၣ်က့ၤ တၢ်မၤပျံၤမၤဖူးအကလုၥ်ကလုၥ်အဂီၢ် ပဒုးအိၣ်ထီၣ်၀ဲဒၣ် ပရဲလိၥ်ကျိခဲၣ်ဖ့န့ၣ်လီၤ. ပမ့ဘၣ်ကွၢ်လၢ ဟီၣ်က၀ီၤဖဲန့ၣ် တၢ်မၤပျံၤမၤဖူးန့ၣ် တမ့ၢ်ထဲခးကျိးဖဒိၣ်ဒီးဒြိသ့ၣ်တဖၣ်ဘၣ်. အ၀ဲသ့ၣ်အိၣ်ဒီးတၢ်ရဲၣ်တၢ်ကျဲၤလၢ မၤတံၢ်တၥ်,မၤပျံၤမၤဖူးဒီး ဖီၣ်ဆူၣ်၀ဲထံဖိကီၢ်ဖိဒီး က့ၤကိး၀ဲဒီးဃုထၢ၀ဲလၢ သုးသီတဖၣ်အဂီၢ်န့ၣ်အိၣ်အါမးစ့ၢ်ကီးလီၤ. အဃိန့ၣ် လၢပဟီၣ်က၀ီၤအပူၤ ဒ်သိးထံဖိကီၢ်ဖိကမျၢၢ်တဖၣ် ကပူၤဖျဲးထီၣ်လၢ တၢ်မၤပျံၤမၤဖူးအဂီၢ် ပဒုးအိၣ်ထီၣ်ပရဲလိၥ်ကျိခဲၣ်ဖ့အံၤ”အဂ့ၢ် သုးခိၣ်ကျၢၢ်ဖိ Saw Augustine စံး၀ဲန့ၣ်လီၤ.
လၢတၢ်န့ၣ်အဃိ ပပှၤကလုၥ်ကညီဖိလၢအိၣ်လၢကီၢ်ပူၤကီၢ်ချၢဒီးကလုၥ်ဒူၣ်လၢအဆီၣ်ထွဲ ပှၤလၢအထီဒါ သုးမီၤစိရိၤတဖၣ်စ့ၢ်ကီး ကွဲမုၥ်ဘၣ်ဒီးကဆီၣ်ထွဲမၤစၢၤဘၣ် ပရဲလိၥ်ကျိခဲၣ်ဖ့အံၤအဂီၢ် တဲဆီၣ်တခူၣ်ထီၣ်၀ဲန့ၣ်လီၤ.
