လါဖ့ၤဘြူၤအါရံၤ(၁၄)သီအနံၤ, ၂၀၂၅နံၣ်
ကၠီၣ်တဲၣ်-ပယီၤကီၢ်ဆၢ ကၠါဖၠးတၢ်ဖံးတၢ်မၤအပူၤ ပှၤလၢဘၣ်တၢ်ကူလဲၢ်မၤကၤအီၤအဂၤ(၇)ကထိ တၢ်ကဆှၢကဒီးဆူ ကၠီၣ်တဲၣ်အအိၣ်အဂ့ၢ် ကၠီၣ်တဲၣ်တၢ်ဒီသဒၢကိတိၥ် Phumtham Wechayachai တဲလီၤ၀ဲန့ၣ်လီၤ.
ပှၤလၢပူၤဖျဲးထီၣ်တဖၣ် တၢ်တအဲၣ်ဒိးပၥ်အီၤလၢ ကၠီၣ်တဲၣ်, တးကီၢ်ရ့ၣ်ဘၣ်ဒီး မ့မ့ၢ်တခီ မ့ၢ်ဟဲတုၤန့ၣ် တၢ်ကဆှၢက့ၤအီၤဆူ ထံကီၢ်လၢဘၣ်ထွဲလိၥ်သးတဘ့ၣ်စုၥ်စုၥ် တဘျီဃီအဂ့ၢ် စံး၀ဲန့ၣ်လီၤ.
ကၠီၣ်တဲၣ်ပဒိၣ်တခီ ဘၣ်ထွဲဒီးပှၤလၢပူၤဖျဲးထီၣ်တဖၣ်အဖီခိၣ် ဆဲးကျိးဒုးသ့ၣ်ညါဃၥ်၀ဲလၢ ထံကီၢ်လၢဘၣ်ထွဲလိၥ်သးတဖၣ်ဒ်အမ့ၢ် အၣ်ဖရံးကၤ, လဲးတ့ၣ်အမဲရကၤ, ယူရပၤဒီး အ့ရှၢထံကီၢ်တဖၣ်ဒ်အမ့ၢ် ယပၣ်, ဖံးလံးပ့း, အ့ၣ်ဒိၣ်နံရှါ မီၢ်သီ၀ဲၤဒၢးတဖၣ်အဂ့ၢ်တဲလီၤ၀ဲန့ၣ်လီၤ.
တရူးထံဖိကီၢ်ဖိ အဂၤ(၁)ကလးဘျဲၣ်လၢ ဖံးမၤတၢ်ဖဲကၠါဖၠးကဲတဖၣ် တၢ်ကဆှၢက့ၤဆူတရူးလၢ ကၠီၣ်တဲၣ်တဆီအဂီၢ် BGF ရဲၣ်ကျဲၤ၀ဲအိၣ်အဂ့ၢ် တဲလီၤ၀ဲန့ၣ်လီၤ. အသီ(၂၀)အတီၢ်ပူၤ (၁)သီန့ၣ် တၢ်ကဆှၢက့ၤပှၤနီၣ်ဂံၢ်(၅၀၀)ဂၤ ဆူ မဲးဆီတပၤအဂ့ၢ် စံး၀ဲန့ၣ်လီၤ.
ဖဲလါဖ့ၤဘြူၤအါရံၤ(၁၂)သီအနံၤန့ၣ် သုးခိၣ် စိၤခၠံးသူၣ်တီခိၣ်ရိၣ်မဲ ကညီသုးခိးကီၢ်ဆၢ(BGF) အမၤ၀ဲတၢ်အိၣ်ဖှိၣ်ဒီး တၢ်ကဒုးလီၤပှီၢ်ကွံၥ် ကၠါဖၠးဒီးတၢ်ကူလဲၢ်မၤကၤပှၤကညီတဖၣ်အဂီၢ် ဒုးအိၣ်ထီၣ်ဃၥ်၀ဲ ကရၢတဖၣ်အဂ့ၢ်န့ၣ်လီၤ.
လၢန့ၣ်အမဲၥ်ညါ ကၠီၣ်တဲၣ်ပဒိၣ်တပၤ စံး၀ဲလၢ တၢ်ကဒုးလီၤပှီၢ်ကွံၥ် အိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤအဂီၢ်၀ံၤ စးထီၣ်ဖဲလါဖ့ၤဘြူၤအါရံၤ(၅)သီအနံၤန့ၣ် ဒီၣ်တဲၥ်ကွံၥ် စဲးဖီကဟၣ်သူသိ, လီမ့ၣ်အူဒီး အ့ၣ်ထၣ်နဲးတဖၣ်ဖဲ ရၤမတံ, ဃိၣ်သၢဖျၢၣ်, တၣ်ခၠံၣ်လ့း,ကီၢ်ဆၢအိၣ်တၢ်လီၢ် (၅)လီၢ်န့ၣ်လီၤ.
