လါဖ့ၤဘြူၤအါရံၤ(၆)သီ,၂၀၂၅နံၣ်
၂၀၂၅နံၣ်, လါဖ့ၤဘြူၤအါရံၤ(၁)သီအနံၤ, မုၢ်ထူၣ်(၁၁း၄၂)နၣ်ရံၣ်အဆၢကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(K.N.L.A) တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးမဲးပြ့ခံသုးကလၢၤလၢ အိၣ်ဖဲခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်, ဘံလ့ကီၢ်ဆၣ်, မဲးပြ့ခံကရူၢ်, မဲးပြ့ခံသ၀ီအကပၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး တၢ်ကစီၣ်ပၥ်ဖျါဃၥ်၀ဲန့ၣ်လီၤ.
သုးကီၣ်ကးနီၣ်ဂံၢ်(၈) ဒုးယၤရဲၣ်ကျဲၤတၢ်နဲၣ်လီၤအဖီလၥ် ဒုးယၤခိၣ်ခံ သုးခိၣ်ဒိၣ်စီ သဲးလွ့ၣ်ဒီး နီၣ်ဂံၢ်(၄၀၅)ခီၣ်ချ့သုးရ့ၣ် သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စဲသူၣ်ရးထ့တဖၣ် တီခိၣ်ရိၣ်မဲ၀ဲ မဲးပြ့ခံသုးကလၢၤအံၤန့ၣ်လီၤ.
တၢ်ဒုးမၤန့ၢ် သုးကလၢၤအပူၤ သုးကီၣ်ကးအပှၤ သုးခိၣ်ဒိၣ်ဖိ(၁)ဂၤ, သုးခိၣ်စိ(၁)ဂၤဃုၥ်ဒီး သုးဖိ(၂၉)ဂၤအသိး တၢ်ဖီၣ်န့ၢ်မူဒံး သုးခိၣ်စိ(၁)ဂၤ, သုးဒ့ သုးစကီၤ(၁)ဂၤ, သုးစကီၤ(၄)ဂၤ, သုးစကီၤဖိ(၅)ဂၤ, သုးစကီၤပြံၤ(၄)ဂၤ, သုးဖိ(၁၄)ဂၤဒီး တၢ်ဖီၣ်န့ၢ်အီၤကျါ ဘၣ်ဒိ၀ဲ(၁၃)ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
တၢ်မၤန့ၢ်စ့ၢ်ကီး ကျိးဖဒိၣ်,ကျိဖိ ခဲလၢၥ်ပၥ်ဖှိၣ်(၄၂)ခိၣ်အသိး တၢ်မၤန့ၢ်စ့ၢ်ကီး ကျိဖးဒိၣ်အဆၣ်(၁၃၃)ဖျၢၣ်ဒီး ကျိဖိအဆၣ်(၁၇၂၆၄)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ. ဒ်န့ၣ်အသိး တၢ်ပၢၢ်ဆၢသုးပၥ်ဖှိၣ်တပၤစ့ၢ်ကီဒီး ဘၣ်သံ၀ဲ(၃)ဂၤဒီး ဘၣ်ဒိ၀ဲ(၃၃)ဂၤန့ၣ်လီၤ.
တၢ်ဒုးအပူၤ သုးကီၣ်ကးတပၤ ဟဲခးစၢၤတၢ်လၢ Jet Fighter(၃၃)ဘျီ ဒီး Y−12(၁)ဘျီတကးဘၣ် နီၣ်ဂံၢ်(၄၄)ခီၣ်ချ့သုး၀ဲၤလီၢ်ခိၣ်သ့ၣ် အစုတီၤဖီလၥ် နီၣ်ဂံၢ်(၃)ခီၣ်ချ့သုးရ့ၣ်စ့ၢ်ကီး ခးစၢၤတၢ်လၢ ကျိဖးဒိၣ်တဖၣ်အိၣ်၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ထီၣ်ဒုး သုးကီၣ်ကးမဲးပြ့ခ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအဆၢကတီၢ်ပူၤ သုးကီၣ်ကးမၤ၀ဲကလံၤကျါတၢ်ဒုးတဖၣ်ဒီးခးလီၤကျိဖးဒိၣ်တဖၣ်အဃိ ကီၢ်ရ့ၣ်ဒူသထူၣ်, ဘံလ့ကီၢ်ဆၣ်, သ၀ီ(၁၉)ဖျၢၣ်အပူၤ လီၢ်က၀ီၤကမျၢၢ်(၃၉၈၆)ဂၤ ဘၣ်ဃ့ၢ်ပူၤဖျဲးသးအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
