လါဖ့ၤဘြူၤအါရံၤ(၆)သီ,၂၀၂၅နံၣ်
တၢ်လီၢ်ယဲၢ်လီၢ်လၢ အဟ့ၣ်လီမ့ၣ်အူ ဆူကၠီၣ်တဲၣ်-ပယီၤကီၢ်ဆၢ ကၠါဖၠၣ်တၢ်လံၣ်တၢ်လီကျိၥ်စ့တၢ်မၤလီၢ်တဖၣ်အပူၤ ကၠီၣ်တဲၣ်ပဒိၣ်ပတုၥ်ကွံၥ် တၢ်ဟ့ၣ်လီမ့ၣ်အူ, အ့ၣ်တၢ်နဲးဒီး ရ့ၣ်နီၣ်သိတဖၣ် ဖဲလါဖ့ၤဘြူၤအါရံၤ(၉)နၣ်ရံၣ်အဂ့ၢ် ကၠီၣ်တဲၣ်ဒီကလုၥ်ဘံၣ်ဘၢကီၣ်ကး(NSC)ထုးထီၣ်ပၥ်ဖျါဃၥ်၀ဲ ဖဲမဟါအနံၤန့ၣ်လီၤ.
ကၠီၣ်တဲၣ်ပဒိၣ် ပတုၥ်ကွံၥ် တၢ်ဟ့ၣ်လီၤမ့ၣ်အူ, အ့ၣ်တၢ်နဲၣ်ဒီး ရ့ၣ်နီၣ်သိတဖၣ်အဃိ ၀့ၢ်ရၤမတံကမျၢၢ်ဖိတဖၣ် အိၣ်ရဲၣ်လီၤအသး ပှ့ၤရ့ၣ်နီၣ်သိတဖၣ်လၢ တၢ်ဆါရ့ၣ်နီၣ်သိကျးတဖၣ်အမဲၥ်ညါအါအါဂီၢ်ဂီၢ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
တကးဘၣ် ခီဖျိကၠီၣ်တဲၣ်ပဒိၣ် ပတုၥ်ကွံၥ် တၢ်ဟ့ၣ်လီမ့ၣ်အူဆူ ရၤမတံကီၢ်ဆၣ်, ဃိၣ်သၢဖျၢၣ်ဒီးတၢ်ခၠံၣ်လံး၀့ၢ်အဃိ ၀့ၢ်ရၤမတံကမျၢၢ်ဖိတဖၣ် ဟးလူၤပှ့ၤ၀ဲ ဆိၣ်လၣ်တဖၣ်ဒီး စဲးဖီကဟၣ်သူသိတဖၣ်အါအါဂီၢ်ဂီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
လီမ့ၣ်အူလၢ ကၠီၣ်တဲၣ်ဟ့ၣ်အီၤအံၤ တၢ်သူအီၤလၢကၣ်စံၣ်နိၣ်တၢ်မၤလီၢ်တဖၣ်တကးဘၣ် ကမျၢၢ်တၢ်ဆါဟံၣ်တဖၣ်, ၀ဲၤကျိၤ၀ဲၤဒၢးတဖၣ်, စဲးဖီကဟၣ်တၢ်မၤလီၢ်တဖၣ်, က၀ီၤဒ့တဖၣ်ဒီး ဒူသ၀ီတနီၤအပူၤအဂ့ၢ်တၢ်သ့ၣ်ညါဘၣ်န့ၣ်လီၤ.
ကၠီၣ်တဲၣ်ပဒိၣ် ပတုၥ်ကွံၥ် တၢ်ဟ့ၣ်လီမ့ၣ်အူန့ၣ် ခီဖျိလၢ ရၤမတံကီၢ်ဆၣ်အပူၤ ဖဲလါယနူၤအါရံၤ(၃)သီအနံၤ, တရူးမံၤဟူသၣ်ဖျါခွါဂဲၤဒိတဂၤ ဘၣ်တၢ်ကူၤလဲၢ်မၤကၤအီၤ၀ံၤအလီၢ်ခံ တရူးဟ့ၣ်ဆီၣ်သနံး ကၠီၣ်တဲၣ်အဃိအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအစုတီၤဖီလၥ် ကညီသုးခိးကီၢ်ဆၢ(BGF)သုးခိၣ် စီၤခၠံးသူၣ်ပၢဆှၢဃၥ် ရွ့ၣ်ကိကိၣ်၀့ၢ်သီဒီး KK parkအံၤ မံၤဟူသၣ်ဖျါဒ်တၢ်လီၢ်တဖၣ်လၢအကူလဲၢ်မၤကၤပှၤကညီတကးဘၣ်မံၤဟူသၣ်ဖျါစ့ၢ်ကီဒီးလၢ တၢ်မၤအိၣ်လဲတၢ်လံၣ်တၢ်လီကျိၥ်စ့တၢ်ဖံးတၢ်မၤ(ကၠါဖၠး)ဒီး ကသံၣ်မူၤဘှီၤတၢ်ဖံးတၢ်မၤအလီၢ်တဖၣ်အသိးန့ၣ်လီၤ.
တၢ်ပတုၥ်ကွံၥ် လီမ့ၣ်အူအဃိ ကမျၢၢ်တၢ်ဆါဟံၣ်တဖၣ်, ၀ဲၤကျိၤ၀ဲၤဒၢးတဖၣ်, စဲးဖီကဟၣ်တၢ်မၤလီၢ်တဖၣ်စ့ၢ်ကီး ဘၣ်ကွၢ်ဆၢၣ်မဲၥ်ဘၣ်တၢ်ကီတၢ်ခဲအဂ့ၢ် တၢ်သ့ၣ်ညါဘၣ်န့ၣ်လီၤ.
လါဖ့ၤဘြူၤအါရံၤ(၅)သီအနံၤလၢ ကၠီၣ်တဲၣ်ကိတိၥ်ခိၣ်ကျၢၢ်ခံ, တၢ်ဒီသဒၢကိတိၥ်ဒီး NSCတဖၣ် မၤ၀ဲတၢ်အိၣ်ဖှိၣ်အပူၤ ဆဲတဲၥ်လီၤ၀ဲလၢ ကပတုၥ်ကွံၥ် တၢ်ဟ့ၣ်လီၤမ့ၣ်အူအဂ့ၢ် ကၠီၣ်တဲၣ်တၢ်ကစီၣ်သန့တဖၣ် ပၥ်ဖျါဃၥ်၀ဲန့ၣ်လီၤ.
