၀့ၫ်တကူၣ်ကီၫ်ခီအပူၤ လါယနူၤအါရံၤအပူၤ သးစၫ်(၅၀၀)ဂၤဃၣ်ဃၣ် ဘၣ်တၫ်ဖီၣ်အီၤ၀ံၤ လၢသိလ့ၣ်ဘၢး(စ်)အပူၤဒၣ်လဲၣ် ထီၣ်ဖီၣ်၀ဲအိၣ်အဂ့ၫ်

လါယနူၤအါရံၤ(၆)သီ,၂၀၂၅နံၣ်

၀့ၫ်တကူၣ်ကီၫ်ခီ,ကီၫ်ဆၣ်တဖၣ်အပူၤ သးစၫ်တဖၣ် သုးကီၣ်ကးဖီၣ်န့ၫ်ဆူၣ်အီၤဒီးလါယနူၤအါရံၤ (၁)လါ အတီၫ်ပူၤ သးစၫ်(၅၀၀)ဂၤဃၣ်ဃၣ် ဘၣ်တၫ်ဖီၣ်အီၤန့ၣ်လီၤ.

လါယနူၤအါရံၤအပူၤ ပှၤလၢဘၣ်တၫ်ဖီၣ်အီၤခဲလၢာ်အိၣ်၀ဲ ၄၇၅ဂၤဒီး  ပှၤ (၅၈)ဂၤ ဟဲက့ၤဟးထီၣ်၀ံၤ လၢအကျါ ၁၇ဂၤတခီ တပျၫ်၀ဲဘၣ်ဒီးဖီၣ်တ့ၫ်ကဒီး၀ဲအဂ့ၫ်တၫ်သ့ၣ်ညါဘၣ်လီၤ.

“အခဲအံၤပှၤလၢဘၣ်တၫ်ဖီၣ်အီၤတဖၣ်န့ၣ် တၫ်ဖီၣ်အီၤခီဖျိလၢဖးဖီမုၫ်စရီဒီး တၫ်ဘၣ်မၤသုးတၫ်ဘျၢတဖၣ် အဖီခိၣ် ဘၣ်တၫ်ဖီၣ်အ၀ဲသ့ၣ်န့ၣ်လီၤ.သမံသမိးလီတဲစိ၀ံၤ ဖိသၣ်လၢဖီၣ်၀ဲစ့ၫ်ကီးအိၣ်၀ဲအဂ့ၫ်” ပိာ်မုၣ်လၢ အိၣ်ဖဲ၀့ၫ်တကူၣ်တဂၤတဲ၀ဲလီၤ.

ပှၤလၢဘၣ်တၫ်ဖီၣ်အီၤအကျါ (၃၉၇)ဂၤန့ၣ် တၫ်ဖီၣ်ကဒီးအီၤ၀ံၤ ဟဲက့ၤဟးထီၣ်ဘၣ်လံဧါန့ၣ် တၫ်ဃုသ့ၣ်ညါတန့ၫ်ဒံး ဘၣ်အဂ့ၫ် Rangoon Scout Network-RSNအတၫ်ဃုသ့ၣ်ညါအဖီခိၣ် တၫ်သ့ၣ်ညါဘၣ်လီၤ.

ပှၤလၢထံၣ်၀ဲလၢကျဲမုၫ်ဖီခိၣ်ဒီးက့ၤဖီၣ်၀ဲအိၣ် (၂၄၁)ဂၤ၀ံၤ လၢအကျါ(၃)ဂၤတခီဃ့ၫ်ပူၤဖျဲး၀ဲလီၤ. ပှၤလၢတၫ်သမံသမိး ဖးဖီမုၫ်စရီ၀ံၤဘၣ်တၫ်က့ၤဖီၣ်အိၣ်၀ဲ(၇၇)ဂၤ,ဟးထီၣ်ဟးလီၤလၢကျဲမုၫ်ခိၣ်အကတီၫ် ဘၣ်တၫ်သမံသမိး၀ံၤ ဘၣ်တၫ်က့ၤဖီၣ်(၅၈)ဂၤ, ပှၤလၢဘၣ်တၫ်လူၤဃုဖီၣ်အီၤလၢတၫ်ဂ့ၫ်တၫ်ကျိၤအပူၤ ဘၣ်တၫ်ဖီၣ်အီၤ(၅၁)ဂၤဒီးပာ်ဃုာ်လၢ တၫ် ဘၣ်ကဲသုးတၫ်ဘျၢပူၤအဃိ ဘၣ်တၫ်က့ၤဖီၣ်(၄၈)ဂၤ အဂ့ၫ်တၫ်သ့ၣ်ညါဘၣ်လီၤ.

တၫ်ထီထီၣ်အမံၤလၢ တၫ်ပၢၫ်ဆၢသုးဖိ၀ံၤ ပှၤလၢဘၣ်တၫ်လူၤဖီၣ်န့ၫ်အီၤအိၣ်၀ဲ(၁၇)ဂၤ, တဲ၀ဲလၢ ပှၤထိၣ်ဟူးထိၣ်ဂဲၤ တၫ်လၢအိၣ်လဲပူၤအဃိ ပှၤလၢဘၣ်တၫ်ဖီၣ်အိၣ်၀ဲ(၁)ဂၤဒီးထီၣ်ဖီၣ်၀ဲလၢ YBSသိလ့ၣ်အဖီခိၣ်အိၣ်၀ဲ(၂၄)ဂၤအဂ့ၫ် တၫ်သ့ၣ်ညါဘၣ်လီၤ.

အပူၤကွံာ်လါ ဖဲသၣ်လ့ၣ်တိၤအစံာ်လီၤန့ၣ် မၢYBSသိလ့ၣ်အိၣ်ပတုာ်၀ံၤ သမံးသမိး၀ဲသးစၫ်တဖၣ် အတၫ်ဂီၤတၫ်ဖီၣ်တဖၣ်ဒီး က့ၤဖီၣ်၀ဲန့ၣ် ထံၣ်ဘၣ်၀ဲလၢအမဲာ်အဂ့ၫ်”သၣ်လ့ၣ်ပှၤလီၫ်က၀ီၤဖိတဂၤတဲ၀ဲလီၤ.

လၢတၫ်လူၤဖီၣ်သးစၫ်တဖၣ်အပူၤ သုးကီၣ်ကးအကရၢဖိတဖၣ်တကးဘၣ်,သုးကီၣ်ကးအစုတီၤဖီလာ် ပၢပြး ကရၢဖိတဖၣ်ဒီးပှၤမၢးဖိကရၢပာ်ဖှိၣ်တဖၣ်စ့ၫ်ကီး လူၤဖီၣ်တၫ်အိၣ်၀ဲ၀ံၤ၀့ၫ်တကူၣ်ကီၫ်ခီပူၤ ယၣ်က့,တၣ်မွ့ၣ်, တီၣ်တကိၣ်ကီၫ်ဆၣ်တဖၣ်အပူၤ လူၤဖီၣ်၀ဲတုၤလၢကျဲမုၫ်ခိၣ်ဒီးလၣ်ဖးထံကျးတဖၣ်အပူၤဒၣ်လဲၣ်အိၣ်အဂ့ၫ် တၫ်သ့ၣ်ညါဘၣ်လီၤ.

Ref: Ayeyarwaddy Times