လါဖ့ၤဘြူၤအါရံၤ(၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁), ကီၢ်ရ့ၣ်ဒူသထူၣ်, ဘံလ့ကီၢ်ဆၣ်, သုးကီၣ်ကးမဲးပြ့ခံသုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤလၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်အီၤအပူၤ သုးကီၣ်ကးအသုးသံ(၄၀)ဂၤဒီး တၢ်ဖီၣ်န့ၢ်စ့ၢ်ကီး သုးခိၣ်စိ သီၣ်တၣ်ပၥ်ဃုၥ်(၂၇)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲလါဖ့ၤဘြူၤအါရံၤ(၁)သီအနံၤ, ဂီၤ(၁၁)နၣ်ရံၣ်အဆၢကတီၢ်န့ၣ် KNLAတီခိၣ်ရိၣ်မဲ သုးပၥ်ဖှိၣ်တဖၣ် ထီၣ်ဒုးမၤန့ၢ် သုးကီၣ်ကးမဲးပြ့ခံသုးကလၢၤ၀ံၤ တၢ်ထီၣ်ဒုးမၤန့ၢ်သုးကလၢၤအပူၤ တၢ်မၤန့ၢ်(၁၂၀-မမ)ဟီၣ်၀့ၣ်စၣ်ကျိဖးဒိၣ် ပၥ်ဃုၥ် ကျိချံပှၥ်သၣ်အါအါဂီၢ်ဂီၢ်န့ၣ်လီၤ.
ဒ်န့ၣ်အသိး တၢ်ဖီၣ်န့ၢ်မူဒံး သုးကီၣ်ကးအပှၤ(၂၇)ဂၤဒီး ဘၣ်သံ၀ဲအါအါဂီၢ်ဂီၢ်အသိး သုးကီၣ်ကးအပှၤသုးဖိလၢ ဃ့ၢ်ဖျိးကွံၥ်တဖၣ် တၢ်မၤရှဲပျီအီၤအဖၢမုၢ်ဒံးလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဒုးစးထီၣ်လၢ လါယနူၤအါရံၤ(၁၇)သီအနံၤလီၤ. တၢ်မၤန့ၢ်မဲပြ့ခံသုးကလၢၤအပူၤ သံ၀ဲ(၄၀)ဂၤလီၤ. သုးခိၣ်စိ သီၣ်တၣ်ပၥ်ဃုၥ်(၂၇)ဂၤတခီ တၢ်ဖီၣ်န့ၢ်မူဒံးဒီး မ့မ့ၢ်လၢ ဒုးယၤခိၣ်ဒီးသုးရ့ၣ်ခိၣ်တခီ ဃ့ၢ်ပဒ့ၣ်သးအဖၢမုၢ်ဒံးလီၤ”အဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
မဲးပြ့ခံသုးကလၢၤလၢ အိၣ်ဆီလီၤဃၥ်သးဖဲ ခ့ၣ်အဲၣ်ယူၣ်-ဘံလ့ကီၢ်ဆၣ်ပူၤအံၤ မ့ၢ်သုးကလၢၤတဖျၢၣ်လၢ အကဲသုးတၢ်တိၥ်ကူၣ်ကျဲၤခိၣ်သ့ၣ်အသိး အသုးအဂံၢ်အဘါအိၣ်၀ဲဘူးထီၣ်(၁၀၀)ဂၤဃၣ်ဃၣ်န့ၣ်လီၤ.
တၢ်ဒုးတဖၣ်အပူၤ တၢ်ပၢၢ်ဆၢသုးပၥ်ဖှိၣ်တပၤစ့ၢ်ကီး တၢ်သံတၢ်ပှၢ်ဒီးတၢ်ဘၣ်ဒိဘၣ်ထံးတဖၣ်အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
စုက၀ဲၤတဖၣ်လၢ တၢ်မၤန့ၢ်အီၤတဖၣ်အံၤ KNLAတီခိၣ်ရိၣ်မဲ သုးပၥ်ဖှိၣ်တဖၣ် ပၢၤဃၥ်၀ဲ၀ံၤ တၢ်မၤန့ၢ် (၁၂၀-မမ)ဟီၣ်၀့ၣ်စၣ် ကျိဖးဒိၣ် ဒ်အဂ့ၤအသိးအဂ့ၢ်, သုးကီၣ်ကးအပှၤသုးဖိလၢ တၢ်ဖီၣ်န့ၢ်အီၤတဖၣ် တၢ်ကွၢ်ထွဲကဟုးကယၥ်အီၤဂ့ၤဂ့ၤလီၤအဂ့ၢ် တၢ်သ့ၣ်ညါဘၣ်န့ၣ်လီၤ.
မဲးပြ့ခံသုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤလၢတၢ်ထီၣ်ဒုးမၤန့ၢ်အံၤအပူၤ KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ်ဒ်အမ့ၢ် ကမျၢၢ်တၢ်ဒီသဒၢသုး(PDF), ပယီၤကမျၢၢ်တၢ်ထူၣ်ဖျဲးသုးမုၢ်ဒိၣ်(BPLA)ဒီး (FFD)သုးတဖၣ် နုၥ်လီၤဒုး၀ဲန့ၣ်လီၤ.
Ref: Khit Thit
