လါယနူၤအါရံၤ(၃၁)သီ,၂၀၂၅နံၣ်
ရၢၫ်ခၢၣ်သုးမုၫ်ဒိၣ်(AA)ထီၣ်ဒုးတၫ်တပယုာ်ဃီအဃိ သုးကီၣ်ကးသုးန့ၣ် လၢအ့ၣ်ယၣ်၀တံၣ်ကီၫ်ခီ, ပသံၣ် ကီၫ်ဆၣ်,ခၠီသၣ်ဒီးငွ့ၣ်ဆီၣ်အပူၤ ဒူသ၀ီပၢပြးသးပှၫ်ဒီးပၢပြးကရၢဖိတဖၣ် တၫ်ရဲၣ်ကျဲၤ၀ဲလၢ တၫ်ကဟ့ၣ် သုးတၫ်မၤလိဒီးထီန့ၫ်၀ဲတၫ်စုက၀ဲၤတဖၣ်အဂ့ၫ် တၫ်သ့ၣ်ညါဘၣ်လၢ ပၢပြကရၢတဖၣ်အိၣ်န့ၣ်လီၤ.
ရၢၫ်ခၢၣ်သုးမုၫ်ဒိၣ်မ့ၢ်ဟဲန့ၣ် လၢတၫ်ကခီၣ်ဆၢဒုး၀ဲအဂီၫ် သုးကီၣ်ကးန့ၣ် ဖဲလါဖ့ၤဘြူၤအါရံၤ အဆိကတၢၫ် တနွံအပူၤ ကဟ့ၣ်၀ဲ ခၠီသၣ်ဒီးငွ့ၣ်ဆီၣ် က၀ီၤဒ့ဒီးဒူသ၀ီပၢပြးတဖၣ် သုးတၫ်မၤလိဒီးထီထီၣ်န့ၫ်၀ဲ တၫ်စုက၀ဲၤအဂ့ၫ်န့ၣ်လီၤ.
ပၢပြးကရၢဖိတဂၤတဲ၀ဲလၢ”ကဟ့ၣ်သုးတၫ်မၤလိလီၤ.မၤ၀ဲလၢသုးရိၣ်မဲခိၣ်ကျၢၫ်တၫ်ကလုၫ်လီၤ.ပှၤရဲၣ်ကျဲၤတၫ်န့ၣ် မ့ၫ်ကီၫ်ခီပတီၫ်လီၤ.ဟံးန့ၫ်ဃာ်စရီ၀ံၤ ကဟ့ၣ်လီၤဆီ၀ဲ သ၀ီသးပှၫ်ဒီးပၢပြးကရၢဖိတဖၣ် တၫ်မၤလိ အဂ့ၫ်”န့ၣ်လီၤ.
ဒီးသ၀ီသးပှၫ်ဒီးပၢပြးကရၢဖိတဖၣ်န့ၣ် ခီဖျိလၢသုးကီၣ်ကးအကီၫ်ခီပတီၫ် ရဲၣ်ကျဲၤ၀ဲအဖီခိၣ် တၫ်ကဟ့ၣ်အ ၀ဲသ့ၣ်သုးတၫ်မၤလိ ဖဲ၀့ၫ်ပသံၣ်,ရွှ့ၣ်မၠ့ၣ်တ့ၣ်သ၀ီ,နီၫ်ဂံၫ်(၆)ဂ့ၫ်ခီၣ်ထံးသုးတၫ်မၤလိသုးအပူၤန့ၣ်လီၤ.
လီၫ်က၀ီၤ ပှၤဘၣ်ကဲသုးအဟံၣ်ဖိဃိဖိတဂၤတဲ၀ဲလၢ”သုးကီၣ်ကးမၤတၫ်ဒ်သိးအံၤန့ၣ် တကဲထီၣ်တၫ်ဘျူး တၫ်ဖှိၣ်အမဲာ်ညါ အိၣ်ဒၣ်တၫ်မူးတၫ်ရၤတဖၣ်ကအါထီၣ်န့ၣ်လီၤ. တမၤနၢၤတၫ်ဒုးဘၣ်ဒီးဟ့ၣ်ပှၤကိးဂၤဒဲး သုးတၫ်မၤလိဒုတသ့ဘၣ်.အခဲအံၤ တမၤနၢၤတၫ်ဒုးဘၣ်န့ၣ် မ့ၫ်လၢဟ့ၣ်သးစၫ်လၢဒုးတၫ်တသ့တဖၣ် တၫ်မၤလိ၀ံၤ မၢဒုးတၫ်အဃိန့ၣ်လီၤ.
လၢကတီၫ်အံၤ ရၢၫ်ခၢၣ်သုးမုၫ်ဒိၣ်(AA)ဒီးသုးပာ်ဖှိၣ်တဖၣ်န့ၣ် ဟဲတုၤဃီၤ၀ဲ ဖဲပသံၣ်ကီၫ်ဆၣ် ,၀့ၫ်ရွှ့ၣ်သီၣ် ယၣ်,သၣ်ပီကီၫ်ဆၣ်,ယ့ၣ်ကၠံၣ်ကီၫ်ဆၣ်တဖၣ်အပူၤ၀ံၤ တၫ်ဘၣ်သဂၢၫ်ခးလိာ်သးအိၣ်ထီၣ်၀ဲ ဒီးသုးကီၣ်ကး အသုးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ဒ်န့ၣ်အသိး ရၢၫ်ခၢၣ်ဒီးအ့ၣ်ယၣ်၀တံၣ်အဆၢတၫ်ဒုးကဲထီၣ်ဒီးတၫ်ဒုးတၫ်ကစီၣ်တဖၣ်အဃိ စးထီၣ်ဖဲလါယနူၤ အါရံၤ(၁၈)သီအနံၤန့ၣ် ပှၤလဲၤဟးကသုၣ်လၢ ခၠီသၣ်,ငွ့ၣ်ဆီၣ်ဒီးရွှ့ၣ်သီၣ်ယၣ်ပီၣ်လဲၣ်နံၤ တအိၣ်လၢၤဘၣ်အဂ့ၫ် တၫ်သ့ၣ်ညါဘၣ်လီၤ.
Ref: DVB
