လါယနူၤအါရံၤ(၃၁),၂၀၂၅နံၣ်
ဖဲလါယနူၤအါရံၤ(၂၉)သီအနံၤန့ၣ် ကၠီၣ်တဲၣ်ပၢၤကီၫ်တဖၣ် နုာ်လီၤဖီၣ် ကီၫ်ပယီၤပှၤလီၫ်အိၣ်ကမှံကၠိဖိလၢ အမၤလိတၢ်ဖဲ ကီၫ်ကၠီၣ်တဲၣ်,စူၣ်ရးထၣ်နံၣ်ကီၫ်ရ့ၣ်,ကီးဖငါကီး တၫ်ဘူၣ်တၫ်ဘါကၠိတခါ အိးထီၣ်၀ဲကၠိအပူၤအဂ့ၢ် ကၠီၣ်တဲၣ် မံၣ်ဒံၣ်ယၣ် Khaosodပာ်ဖျါ၀ဲလီၤ.
လၢကၠိ၀ဲအံၤ သးနံၣ်(၃)နံၣ် တုၤ သးနံၣ်(၁၂)နံၣ် အဘၢၣ်စၢၤ ကီၫ်ပယီၤဖိသၣ်(၁၉၀)ဂၤဘျဲၣ် မၤလိတၫ်၀ံၤ ဖိသၣ်တဖၣ်န့ၣ် မ့ၫ်ကီၫ်ပယီၤခီကီၫ်ပှၤမၤတၫ်ဖိ အဖိတဖၣ်န့ၣ်လီၤ.
ကၠီၣ်တဲၣ်ပၢၤကီၫ် လိာ်ဘၢလိာ်ကွီၫ်ဒီးဖီၣ်ဃာ်၀ဲ ကၠိ၀ဲအံၤအသရၣ်သရၣ်မုၣ်(၄)ဂၤ ခီဖျိလၢ တၫ်အိးထီၣ်ကၠိ တဖိးသဲစးတၫ်ဘျၢအဖီခိၣ်၀ံၤ လၢအကျါခံဂၤတခီ တၫ်ကလိာ်ဘၢလိာ်ကွီၫ်ကဒီးအီၤခီဖျိလၢ တၫ်ဟဲမၤတၫ် လၢတဖိးသဲစးအဂ့ၫ် တၫ်သ့ၣ်ညါဘၣ်လီၤ.
ကၠီၣ်တဲၣ်ပၢၤကီၫ်တကပၤ ကသမံသမိးကဒီး၀ဲ ဖိသၣ်အမိၫ်အပၫ်တဖၣ် မ့ၫ်အလံာ်အလဲၢ်အိၣ်,တအိၣ်၀ံၤ ကဃုထံၣ်သ့ၣ်ညါ၀ဲ ပှၤဒုးအိၣ်ထီၣ်ကၠိ၀ဲအံၤန့ၣ်လီၤ.
ကၠီၣ်တဲၣ်မံၣ်ဒံၣ်ယၣ်တဖၣ်အတၫ်ပာ်ဖျါအဖီခိၣ် ဖိသၣ်မိၫ်ပၫ်တဖၣ်န့ၣ် ဖဲအ၀ဲသ့ၣ်မၤတၫ်မၤအကတီၫ် လၢတၫ်ကကွၫ်ဖိသၣ်အဂီၫ် ပာ်၀ဲကၠိ၀ံၤ ဒ်ကၠိလါလဲအသိး ဖိသၣ်(၁)ဂၤန့ၣ် ဟံးန့ၫ်၀ဲစ့(၃၀၀) ဘးတုၤ(၅၀၀) ဘးန့ၣ်လီၤ.
အပူၤကွံာ် ၂၀၂၄နံၣ်အပူၤစ့ၫ်ကီး လၢကီၫ်ကၠီၣ်တဲၣ်(ကလံၤထံး)စူၣ်ရးထၣ်နံၣ်ကီၫ်ရ့ၣ်ပူၤ မ့းတၣ်ယ့း ပှၤလီၫ် အိၣ်ကမှံကၠိန့ၣ် သး၀ံၣ်ပယီၤထံကီၫ်တၫ်သး၀ံၣ်အဃိ ဘၣ်တၫ်ကးတံာ်ကွံာ်အီၤန့ၣ်လီၤ.
ဒ်န့ၣ်အသိး စူၣ်ရးထၣ်နံၣ်ကီၫ်ရ့ၣ်ပူၤ ကၠိ(၆)ဖျၢၣ်လၢ ကီၫ်ပယီၤပှၤလီၫ်အိၣ်ကမှံဖိထီၣ် ဒီးတၫ်သိၣ်လိ၀ဲလၢ ပယီၤကျိာ်အံၤ ဖဲအပူၤကွံာ် ၂၀၂၄နံၣ် လါစဲးပထ့ဘၢၣ်အပူၤ တဲ၀ဲလၢတတီၣ်ဖျါထီၣ်၀ဲလၢ ကူၣ်သ့၀ဲၤကျိၤ အိၣ်ဘၣ်အဃိ ကၠီၣ်တဲၣ်ပဒိၣ်ကးတံာ်ကွံာ်၀ဲလီၤ.
