လါယနူၤအါရံၤ(၃၁)သီ,၂၀၂၅နံၣ်
၂၀၂၅နံၣ်, လါယနူၤအါရံၤ(၃၁)သီအနံၤန့ၣ် မ့ၢ်ကညီဒီကလုၥ်တၢ်ပၢၢ်ဆၢပှဲၤထီၣ်၀ဲ (၇၆)နံၣ်အမုၢ်နံၤန့ၣ်လီၤ. ဘၣ်ဆၣ်ဒီး ကညီတၢ်ပၢၢ်ဆၢတဒိးန့ၢ်ဘၣ်ကညီကလုၥ်ထံရူၢ်ကီၢ်သဲးအတၢ်မိၣ်န့ၢ်သးလီလၢအအိၣ်ဒီးထံရူၢ်ကီၢ်သဲးဒီးသဲစးအတၢ်အုၣ်ကီၤသး အလၢအပှဲၤဒံးဘၣ်အဂ့ၢ် ခ့ၣ်အဲၣ်ယူၣ်ကရၢခိၣ် ကတိၤလီၤဃၥ်၀ဲလၢ အလံၥ်ဟ့ၣ်ယုၢ်အပူၤန့ၣ်လီၤ.
စးထီၣ်ဖဲ(၂၀၁၂)နံၣ်တုၤလီၤလၢ(၂၀၂၁)နံၣ်အတီၢ်ပူၤန့ၣ်ကညီဒီကလုၥ်စၢဖှိၣ်ကရၢဃုၥ်ဒီးကလုၥ်ဒူၣ်တၢ်ပၢၢ်ဆၢကရၢတနီၤန့ၣ် တၢ်ထံၣ်လိၥ်စံးကတိၤကျဲၤဘၣ်လိၥ်ထံရူၢ်ကီၢ်သဲးတၢ်ဂ့ၢ်ကီအဂီၢ် မၤ၀ဲတၢ်ပတုၥ်တၢ်ခးန့ၣ်လီၤ.
“တၢ်ပတုၥ်တၢ်ခးလၢကီၢ်ဒီဘ့ၣ် အလံၥ်ဃံးဃၥ်”အိၣ်၀ဲအသိး တၢ်ကထံၣ်လိၥ်စံးကတိၤထံရူၢ်ကီၢ်သဲးတၢ်ဂ့ၢ်ကီလၢ အဒုးအိၣ်ထီၣ်တၢ်ဒုးတၢ်ယၤတဖၣ်ဒီး တၢ်ထံၣ်လိၥ်စံးကတိၤထံရူၢ်ကီၢ်သဲးအစၢအိၣ်ထီၣ်၀ဲအသိး တၢ်ကသူၣ်ထီၣ်”ဖဲၣ်ဒရဲၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်” လၢအအိၣ်ဒီးတၢ်သဘျ့, တၢ်ထဲသိးတုၤသိးဒီး တၢ်စံၣ်ညီၣ်ပၢလီၤသးခွဲးယၥ်တဖၣ်န့ၣ်လီၤ.
ဘၣ်ဆၣ်ဒီးလၢတၢ်စံးကတိၤကျဲၤဘၣ်ထံရူၢ်ကီၢ်သဲးတၢ်ဂ့ၢ်ကီဒီးသူၣ်ထီၣ်ထံကီၢ်အံၤဆူ”ဖဲၣ်ဒရဲၣ်ဒံၣ်မိၣ်ကခြ့ၣ်စံၣ်ကီၢ်စၢဖှိၣ်”နီၢ်နီၢ်န့ၣ် တအိၣ်ဖျါ၀ဲဒၣ်လၢ ကီၢ်ပယီၤပှၤပၢတၢ်အစိၤစိၤတဖၣ် ဒီး လီၤဆီဒၣ်တၢ် ပယီၤသုးမီၤစိရိၤသုးတဖၣ် အသးပူၤဘၣ်အဂ့ၢ် ခ့ၣ်အဲၣ်ယူၣ်ကရၢခိၣ် ကတိၤလီၤဃၥ်၀ဲလၢ လံၥ်ဟ့ၣ်ယူၢ်အပူၤန့ၣ်လီၤ.
လီၤဆီဒၣ်တၢ် ပယီၤသုးမီၤစိရိၤသုးတဖၣ်အံၤ ဘၣ်ယိၣ်ဘၣ်ဘှီတၢ်လၢတၢ်စိကမီၤကလီၤမၢ်ဒီးတၢ်တသးအိၣ်သူၣ်ထီၣ် ကီၢ်အံၤဆူ”ဖဲၣ်ဒရၢၣ်ဒံၣ်မိၣ်ကခြ့ၣ်စံၣ်ကီၢ်စၢဖှိၣ်”ဘၣ်အဃိ ဟံးန့ၢ်ဆူၣ်ကဒီး၀ဲထံကီၢ်တၢ်စိတၢ်ကမီၤ ဖဲ၂၀၂၁နံၣ် လါဖ့ၤဘြူၤအါရံၤ(၁)သီအနံၤန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ သုးမီၤစိရိၤသုးတဖၣ်မၤဟးဂီၤကွံၥ်ဒံၣ်မိၣ်ကခြ့ၣ်စံၣ်အကျဲသနူဒီးသူၣ်ထီၣ်က့ၤသုးမီၤစိရိၤအတၢ်ပၢတၢ်ပြးဒီးတၢ်မၤကျဲတဖၣ်န့ၣ်လီၤ. ပၥ်ဖျါထီၣ်၀ဲစ့ၢ်ကီးလၢ ပယီၤသုးမီၤစိရိၤတဖၣ် တအိၣ်ဒီးတၢ်ပၥ်သးလၢကသူၣ်ထီၣ်၀ဲထံကီၢ်အံၤဆူ“ဖဲၣ်ဒရၢၣ်ဒံၣ်မိၣ်ကခြ့ၣ်စံၣ်ကီၢ်စၢဖှိၣ်”လ့ၤတက့ၤဘၣ်ဒီးအကမၤဆံးလီၤစှၤလီၤအတၢ်စိတၢ်ကမီၤဒီးအတၢ်ဘၣ်ဘျူးဘၣ်ဖှိၣ်လ့ၤတက့ၤဘၣ်အဃိဟံးဃၥ်၀ဲ၂၀၀၈တၢ်သူၣ်ထီၣ်ထံကီၢ်တၢ်ဘျၢသဲးစးခိၣ်သ့ၣ်လၢအဟ့ၣ်စိကမီၤသုးတဖၣ်လၢတၢ်တီခိရိၣ်မဲထံကီၢ်အထံရူၢ်ကီၢ်သဲးတၢ်မၤအပူၤဂၢၢ်ဂၢၢ်ကျၢၤကျၢၤအဂ့ၢ် စံး၀ဲန့ၣ်လီၤ.
ကညီကလုၥ်စုက၀ဲၤတၢ်ဒုးပၢၢ်ဆၢတၢ်ဂဲၤလိၥ် ပှဲၤထီၣ်(၇၆)နံၣ်အတီၢ်ပူၤ ခီဖျိဒုၣ်ဒါအတၢ်ခဲၣ်သူခဲၣ်ဂီၤအဃိမ့ၢ်ဂ့ၤ,ခီဖျိကရၢတၢ်တီခိၣ်ရိၣ်မဲအပူၤ,ထံရူၢ်ကီၢ်သဲးတၢ်တူၢ်ခီၣ်ပၥ်သးဒီးတၢ်အိၣ်ဆၢထၢၣ်, ထံရူၢ်ကီၢ်သဲးတၢ်ထံၣ်ဒီးအတၢ်လဲၤကျဲတဖၣ် တဒ်သိးလိၥ်သးအဃိမ့ၢ်ဂ့ၤ ကရၢဘၣ်ကွၢ်ဆၢၣ်မဲၥ်လဲၤခီဖျိဘၣ်၀ဲ တၢ်ပၥ်ဒ့ၣ်ပၥ်ကမၣ်လိၥ်သး, တၢ်လီၤမုၢ်လီၤဖးတဖၣ် တုၤဒၣ်လဲၥ်လၢ စုက၀ဲၤတၢ်သဘံၣ်သဘုၣ်အိၣ်ထီၣ်၀ဲလၢ ကညီကလုၥ်ကဒဲကဒဲအဘၢၣ်စၢၤအဂ့ၢ် စံး၀ဲန့ၣ်လီၤ.
လၢန့ၣ်အမဲၥ်ညါ စုက၀ဲၤတၢ်ဒုးပၢၢ်ဆၢ(၇၆)နံၣ်အတီၢ်ပူၤ ခီဖျိပယီၤကလုၥ်ဒိၣ်စိပှၤပၢတၢ်တဖၣ်ဒီး ပယီၤသုးတဖၣ် စူးကါ၀ဲဒုးယၤဂ့ၢ်၀ီတၢ်မၤအကျဲလၢ အတကြၢးတဘၣ်ဒီးအၢအၢသီသီ အကလုၥ်ကလုၥ်အဃိ ပပှၤကလုၥ်ဃုၥ်ဒီးထံဖိကီၢ်ဖိကမျၢၢ် ဘၣ်သံဘၣ်ပှၢ်, ဘၣ်ကဲထီၣ်၀ဲမုၣ်ကမဲဖိၣ်ဃဲ, ဘၣ်ပၥ်တ့ၢ်ကွံၥ်၀ဲ တၢ်အိၣ်တၢ်ဆိးဟံၣ်ဃီ, ဒူသ၀ီဒီးဘၣ်လီၤပြံလီၤပြါတ့ၢ်လံ၀ဲဒီး တၢ်သူၣ်ထီၣ်က့ၤတၢ်အိၣ်မူအဂီၢ်, ဘၣ်ဟံးန့ၢ်၀ဲတၢ်အိၣ်ကဒုလၢထံကီၢ်အါဘ့ၣ်အပူၤန့ၣ်လီၤ.
