WFPဟ့ၣ်ပလီၫ်၀ဲလၢ ၂၀၂၅နံၣ်အပူၤ ကီၫ်ပယီၤပှၤနီၫ်ဂံၫ်(၁၅)ကကွဲၫ်ဃၣ်ဃၣ် ကကွၫ်ဆၢၣ်မဲာ်ဘၣ် တၫ်သၣ်၀ံၤလီၤဒိ

လါယနူၤအါရံၤ(၃၀)သီ,၂၀၂၅နံၣ်

ဖဲလါယနူၤအါရံၤ(၂၉)သီနံၤအနံၤန့ၣ် ဟီၣ်ခိၣ်ဒီဖျၢၣ်တၫ်အီၣ်တၫ်အီတၫ်ရဲၣ်တၫ်ကျဲၤ(WFP) ဘိးဘၣ်ရၤလီၤ၀ဲလၢ တၫ်အီၣ်တၫ်အီတလၢတပှဲၤအဃိ ကီၫ်ပယီၤပူၤတၫ်သၣ်၀ံၤလီၤဒိတၫ်အိၣ်သးန့ၣ် အပတီၫ်ဆူၣ်ထီၣ်၀ံၤ လၢတနံၣ်အံၤ ၂၀၂၅နံၣ်အပူၤ ထံကီၫ်ပှၤနီၫ်ဂံၫ်(၁၅)ကကွဲၫ်ဃၣ်ဃၣ် ကကွၫ်ဆၢၣ်မဲာ်ဘၣ် တၫ်သၣ်၀ံၤလီၤဒိအဂ့ၫ်န့ၣ်လီၤ. တၫ်န့ၣ် မ့ၫ်လၢတနံၣ်အံၤ ပှၤနီၫ်ဂံၫ်ဟဲအါထီၣ်၀ဲ(၁၃.၃)ကကွဲၫ်အဃိအဂ့ၫ် WFPတဲ၀ဲလီၤ.

လၢကတီၫ်အံၤ ပှၤလၢအိၣ်ဆိး၀ဲဖဲတၫ်သဘံၣ်သဘုၣ်ကဲထီၣ်အလီၫ် ဒ်သိးခၠီကီၫ်စဲၣ်,ကခၠ့ၣ်ကီၫ်စဲၣ်, ရၢၫ်ခၢၣ်ကီၫ်စဲၣ်ဒီးစကဲကီၫ်ခီတၫ်လီၫ်အပူၤတဖၣ်န့ၣ် ကွၫ်ဆၢၣ်မဲာ်ဘၣ် ထံကီၫ်ပူၤတၫ်အီၣ်တၫ်အီတလၢတပှဲၤ၀ံၤ တနံၣ်အံၤ ပှၤနီၫ်ဂံၫ်အကကွဲၫ် ၂၀ဃၣ်ဃၣ် (ပှၤသၢဂၤ တဂၤ)န့ၣ် ကလိၣ်ဘၣ်ပှၤတ၀ၢတၫ်မၤစၢၤအဂ့ၫ် န့ၣ်လီၤ.

လၢထံကီၫ်ဒီတဘ့ၣ် တၫ်သဘံၣ်သဘုၣ်တဖၣ်ဒိၣ်ထီၣ်,တၫ်တြီဃာ်တၫ်လဲၤမၤစၢၤတၫ်တဖၣ်, မုာ်ကျိၤ၀ဲၤကွာ်လီၤပှီၫ်,မူခိၣ်ကလံၤသီၣ်ဂီၤတၫ်ဃံးတၫ်စ့ၤတဖၣ် ကဲထီၣ်တပယူာ်ဃီအဃိ တၫ်သၣ်၀ံၤလီၤဒိတၫ်အိၣ်သးနးထီၣ်၀ဲအဂ့ၫ် WFPအကီၫ်ပယီၤခၢၣ်စး Michael Dunfordတဲဃာ်၀ဲလၢ တၫ်ဘိးဘၣ်ရၤလီၤအပူၤန့ၣ်လီၤ.

ပှၤလၢဘၣ်ပာ်တ့ၫ်တၫ်အိၣ်ဆိးလီၫ်ကျဲတဖၣ်အဂီၫ် တၫ်အီၣ်တၫ်အီန့ၣ် မ့ၫ်တၫ်ဂ့ၫ်ခိၣ်သ့ၣ်တခါလၢ အရ့ဒိၣ်ဘၣ်ဆၣ် ပနံာ်အပှ့ၤကလံၤဒိၣ်ထီၣ်ကယီကယီဒီးကျိာ်စ့အပှ့ၤကလံၤလီၤချ့သဒံးအဃိ တၫ်အီၣ်တၫ်အီလၢ တၫ်လိၣ်ဘၣ်တဖၣ် တၫ်မၤလၢထီၣ်ပှဲၤထီၣ်တန့ၫ်ဘၣ်အဂ့ၫ် WFPတဲ၀ဲလီၤ.

ထံကီၫ်ပူၤ ပနံာ်တၫ်အီၣ်တၫ်အီဒ်သိးဒီးဟု,သိ,အံသၣ်ဒီးပဲတဖၣ်အပှ့ၤကလံၤန့ၣ် အါထီၣ်ဒိၣ်န့ၫ်ဒံး အပူၤကွံာ်နံၣ်(၃၀)မၠးကယၤန့ၣ်လီၤ.

“ကီၫ်ပယီၤပူၤ ပနံာ်အပှ့ၤကလံၤတဖၣ် ဒိၣ်ထီၣ်ကိးလါဒဲးလီၤ.လၢထံလီၫ်ကီၫ်ပူၤတၫ်ကူၣ်လဲၫ်မၤကၤအပူၤ ပနံာ်လၢတၫ်ဆါမ့ၫ်အိၣ်ဒၣ်လဲၣ် ပှၤကပှ့ၤဂ့ၫ်ခီၣ်ထံးတၫ်အီၣ်တၫ်အီအဂီၫ် ကျိာ်စ့တအိၣ်န့ၣ်လီၤ. အဃိ ဘၣ်အီၣ်စှၤလီၤတၫ်အီၣ်အိၣ်၀ဲအဂ့ၫ်” Mr. Dunfordတဲ၀ဲလီၤ.

ကီၫ်ပယီၤပူၤ စုက၀ဲၤတၫ်သဘံၣ်သဘုၣ်အဃိ ပှၤ(၃.၅)ကကွဲၫ်ဘျဲၣ် ဘၣ်ကဲထီၣ်ပှၤဟံၣ်ဃီတအိၣ်တဖၣ် ဒီးတၫ်သဘံၣ်သဘုၣ်တဖၣ်ဆူၣ်ထီၣ်၀ံၤ ဘၣ်ကူဘၣ်ဂာ်၀ဲတၫ်လီၫ်တတီၤဆူတတီၤအဃိ တနံၣ်အံၤ ပှၤနီၫ်ဂံၫ်(၄.၅)ကကွဲၫ်ဘျဲၣ် ကကဲထီၣ်ပှၤဟံၣ်ဃီတအိၣ်သ့အဂ့ၫ် WFPတယာ်ဃာ်၀ဲအဂ့ၫ် ပာ်ဖျါ၀ဲလီၤ.

ဘၣ်ထွဲ ထံကီၫ်ပှၤတ၀ၢတၫ်ဆီၣ်ထွဲမၤစၢၤဒီးတၫ်အီၣ်ကုၤအီပှဲၤအဂီၫ် တၫ်လိၣ်ဘၣ်တဖၣ်န့ၣ် လီၤဘျၢကွံာ်၀ဲလၢ တၫ်တဂၢၫ်တကျၢၤဒီးတၫ်သဘံၣ်တဘုၣ်တဖၣ်အကျါ၀ံၤ တဒိးန့ၫ်ထံဂုၤကီၫ်ဂၤ တၫ်ပာ်သူၣ်ပာ်သးအီၤတဖၣ်အဂ့ၫ်,ဒီးလၢတနံၣ်အံၤ WFPမုၫ်လၫ်၀ဲလၢ ကဆီၣ်ထွဲမၤစၤ ပှၤနီၫ်ဂံၫ်အစှၤကတၢၫ်(၁.၆)ကကွဲၫ် တၫ်အီၣ်တၫ်အီတၫ်ဆီၣ်ထွဲမၤစၢၤတဖၣ်အဂ့ၫ် ဘိးဘၣ်ရၤလီၤဃာ်၀ဲလီၤ.