လါယနူၤအါရံၤ(၃၀)သီ,၂၀၂၅နံၣ်
အမဲရကၤကီၢ်စၢဖှိၣ်လၢ အဟ့ၣ်တၢ်ဆီၣ်ထွဲမၤစၢၤ ဆူကီၢ်ချၢထံကီၢ်တဖၣ်အံၤ ပတုၥ်ကွံၥ်တၢ်ဆီၣ်ထွဲမၤစၢၤတဖၣ်အပူၤ မ့မ့ၢ်လၢတၢ်လိၣ်ဘၣ်ဂ့ၢ်ဂီၤအူတၢ်ဆီၣ်ထွဲမၤစၢၤတဖၣ်တခီ တၢ်ကပျဲဆီၣ်ထွဲမၤစၢၤအီၤလၢ တၢ်ပၥ်လီၤဆီအသိးအဂ့ၢ် အမဲရကၤ ထံဂုၤကီၢ်ဂၤကိတိၥ် Marco Rubio တဲလီၤ၀ဲန့ၣ်လီၤ.
တၢ်ကပတုၥ်ကွံၥ် အမဲရကၤတၢ်ဆီၣ်ထွဲမၤစၢၤတဖၣ်အဂီၢ် ကီၢ်ခိၣ် Donald Trump ဘိးဘၣ်ရၤလီၤတၢ်ကလုၢ်၀ံၤအလီၢ်ခံ ပိၥ်ထွဲထီၣ်အခံန့ၣ် ဖဲလါယနူၤအါရံၤ(၂၈)သီအနံၤ ကိတိၥ် Rubio အလံၥ်ပၥ်ဖျါအပူၤ နဲၣ်လီၤဃၥ်၀ဲလၢ တၢ်ကပျဲဆီၣ်ထွဲမၤစၢၤ၀ဲ ဂ့ၢ်ဂီၤအူတၢ်ဆီၣ်ထွဲမၤစၢၤတဖၣ်ဒ်အမ့ၢ် ကသံၣ်ကသီ, ဆူၣ်ချ့တၢ်ကဟုးကယၥ်တဖၣ်, တၢ်အီၣ်တၢ်အီတဖၣ်, တၢ်အိၣ်ဆိးအလီၢ်, တၢ်မၤစၢၤလၢတၢ်ဟ့ၣ်တ့ၢ်တဖၣ်, ၀ဲၤဒၢးသုတၢ်ပီးတၢ်လီတဖၣ်, ပှၤမၤတၢ်ဖိလါလဲတဖၣ်တကးဘၣ် တၢ်တိစၢၤမၤစၢၤတဖၣ်စ့ၢ်ကီး ပၥ်ဃုၥ်၀ဲန့ၣ်လီၤ.
ကီၢ်အမဲရကၤလၢ အဟ့ၣ်ဆီၣ်ထွဲမၤစၢၤ ဆူဟီၣ်ခိၣ်ဒီဘ့ၣ်အံၤ တၢ်ကသမံသမိးက့ၤ တၢ်ဆီၣ်ထွဲမၤစၢၤတဖၣ်အဂီၢ် ကပတုၥ်ဃၥ်၀ဲ တၢ်ဟ့ၣ်တၢ်ဆီၣ်ထွဲလၢ အသီ(၉၀)အတီၢ်ပူၤအဂ့ၢ်န့ၣ် ဖဲအပူၤကွံၥ်နွံအတီၢ်ပူၤ ကီၢ်ခိၣ် Trump လၢဆိၣ်တၢ်အၢၣ်လီၤကဲထီၣ်ကီၢ်ခိၣ်အံၤ ထုးထီၣ်ပၥ်ဖျါလီၤ၀ဲလၢ ကီၢ်ခိၣ်တၢ်ကလုၢ်အသိးန့ၣ်လီၤ.
အမဲရကၤဖဲၣ်ဒရဲၣ် စံၣ်ညီၢ်ကွီၢ်တဂၤတခီ တၢ်ကတြီဃၥ် ကီၢ်ခိၣ် Trump တၢ်ကလုၢ်လၢ တၢ်ကပတုၥ်ကွံၥ် အမဲရကၤထံကီၢ်အပူၤ တၢ်ဟ့ၣ်တၢ်ဆီၣ်ထွဲဒ်အမ့ၢ် တၢ်ဂုၥ်ထီၣ်ပသီထီၣ်တၢ်မၤစၢၤတဖၣ်,ဒုးလိၢ်ကျိၥ်စ့တဖၣ်ပၥ်ဃုၥ် တၢ်တိစၢၤမၤစၢၤတဖၣ် တစိၤတလီၢ်အဂီၢ် ဆဲတဲၥ်လီၤ၀ဲ ဖဲမဟါအနံၤန့ၣ်လီၤ.
ကီၢ်ခိၣ် Trumpတၢ်ကလုၢ် အသးဘူးမူထီၣ်ဖဲ မုၢ်ဆၣ်အနံၤ လိၣ်စှၤမံးနံးအတီၢ်ပူၤန့ၣ် စံၣ်ညီၣ်ကွီၢ် အတၢ်ကလုၢ်ဟဲဟးထီၣ်၀ဲအသိး တၢ်ဟ့ၣ်သးကညီၤတၢ်ကရၢတဖၣ် အတၢ်ထီဒါဂ့ၢ်လိၥ်တဖၣ်စ့ၢ်ကီး ဟးထီၣ်၀ဲန့ၣ်လီၤ.
Ref: VOA
