လါယနူၤအါရံၤ(၃၀)သီ, ၂၀၂၅နံၣ်
၂၀၂၅နံၣ်, လါယနူၤအါရံၤ(၂၉)သီအနံၤန့ၣ် ခ့ၣ်အဲၣ်ယူၣ်-လီၢ်ခၢၣ်သးတၢ်ကစီၣ်ပၥ်ဖျါဃၥ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ ခီဖျိသုးကီၣ်ကးအသုး ပညိၣ်ဒုးကမျၢၢ်လၢ ကလံၤကျါတၢ်ဒုးဒီးခးလီၤကျိဖးဒိၣ်တဖၣ်အဃိ လီၢ်က၀ီၤကမျၢၢ် ဘၣ်သံ၀ဲ(၁)ဂၤဒီး ဘၣ်ဒိ၀ဲ(၈)ဂၤ၀ံၤ ဘၣ်ဟးဂီၤကွံၥ်၀ဲစ့ၢ်ကီး ကမျၢၢ်ဟံၣ်(၄)ဒီးသီခါဖၠၣ်(၂)ဖျၢၣ်အဂ့ၢ်န့ၣ်လီၤ.
လါယနူၤအါရံၤ(၂၄)သီအနံၤ ဟါ(၉း၃၀)နၣ်ရံၣ်အဆၢကတီၢ် သုးကီၣ်ကးအသုး ခးလီၤကျိဖးဒိၣ်ဆူ ကီၢ်ရ့ၣ်ချၢၣ်လွံၢ်ထူၣ်, ဆီထံးကီၢ်ဆၣ်အပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ၀ဲကၠိသ၀ီပူၤဒီး ဘၣ်ဒိ၀ဲသ၀ီဖိခံဂၤအဂ့ၢ် ပၥ်ဖျါဃၥ်၀ဲန့ၣ်လီၤ.
လါယနူၤအါရံၤ(၂၇)သီအနံၤ, မုၢ်ထူၣ်(၁၁း၄၀)နၣ်ရံၣ်အဆၢကတီၢ် သုးကီၣ်ကးအကဘီယူၤ ဟဲတ့ၢ်လီၤမ့ၣ်ပိၢ်ဆူ ညီၣ်ပ့ၣ်ကၠံသ၀ီပူၤအဃိ ဘၣ်ဟးဂီၤကွံၥ်၀ဲ အ့မၠးအီၣ်သီခါဖၠၣ်ဒီးကၠီသ့းကၠီသီခါဖၠၣ်တဖၣ်အသိး ဒူသ၀ီဖိ(၄)ဂၤစ့ၢ်ကီး ဘၣ်ဒိ၀ဲန့ၣ်လီၤ.
တကးဘၣ် သုးကီၣ်ကးအသုး (ခမရ-၂၀)ဒီး (ခလရ-၂၆၄)တဖၣ် အိၣ်ဖဲ ဘိၣ်ကိသ၀ီပူၤဒီး တ့ၢ်လီၤဒြိမ့ၣ်ပိၢ်ဆူ ညီၣ်ပ့ၣ်ကၠံသ၀ီပူၤအဃိ ဒူသ၀ီဖိအဟံၣ်ဘၣ်ဟးဂီၤကဒီး၀ဲ (၂)ဖျၢၣ်အဂ့ၢ် စံး၀ဲန့ၣ်လီၤ.
ဒ်န့ၣ်အသိး ဖဲလါယနူၤအါရံၤ(၂၈)သီအနံၤ, မုၢ်ထူၣ်(၁၂း၃၅)နၣ်ရံၣ်အဆၢကတီၢ် သုးကီၣ်ကးအသုးလၢအိၣ်ဖဲ၀့ၢ်ချၢၣ်လွံၢ်ထူၣ်အံၤ လဲၤတ့ၢ်ဒြိမ့ၣ်ပိၢ် ဆူ ပၠ့ၣ်ယ့ၣ်သ၀ီပူၤအဃိ သ၀ီဖိလၢအမ့ၢ် ဒီၣ်စါမၠ့းသးနံၣ်(၆၉)နံၣ် ဘၣ်ဒိမ့ၣ်ပိၢ်ဒီးသံ၀ဲန့ၣ်လီၤ.
ဖဲအပူၤကွံၥ် လါယနူၤအါရံၤ(၂၅)သီအနံၤန့ၣ် သုးကီၣ်ကးအသုးတဖၣ် အိၣ်ဖဲကိခၠီ၀း၀ံၤ ခးလီၤကျိဖးဒိၣ်ဆူ ခ့ၣ်အဲၣ်ယူၣ်-မူကီၢ်ဆၣ်ပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ယ့ၣ်လဲထံ၀ၣ်ခီသ၀ီပူၤ၀ံၤ ကမျၢၢ်ဟံၣ်ဘၣ်ဟးဂီၤကွံၥ်၀ဲ(၁)ဖျၢၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ၂၀၂၅နံၣ်, လါယနူၤအါရံၤ(၂၇)သီအနံၤ, ဟါ(၇း၅၅)နၣ်ရံၣ်အဆၢကတီၢ် သုးကီၣ်ကးအသုးလၢ အိၣ်ဖဲကိခၠီ၀း ခးလီၤကျိဖးဒိၣ်(၁၂၀-မမ)(၂)ဖျၢၣ်ဆူ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်, နးတလ့သ၀ီပူၤအဃိ ဘၣ်ဒိ၀ဲ ဒူသ၀ီဖိ(၂)ဂၤ ဒီး ဘၣ်ဟးဂီၤကွံၥ်၀ဲဟံၣ်(၁)ဖျၢၣ်န့ၣ်လီၤ.
