လါယနူၤအါရံၤ(၂၅)သီ,၂၀၂၅နံၣ်
ကီၢ်ပယီၤဒီတဘ့ၣ်အပူၤ တၢ်ပၢၢ်ဆၢကရၢတဖၣ် ထီၣ်ဒုးမၤန့ၢ်ဃၥ်၀ဲ သုးကီၣ်ကးအသုးကလၢၤ(၁၇၄)ဖျၢၣ်အဂ့ၢ် ကီၢ်ပယီၤတၢ်မၤရဲၣ်ကျဲၤခိၣ်သ့ၣ်ဒီးတၢ်ဃိထံၣ်သ့ၣ်ညါသနူအ့ၣ်စတံၣ်ကၠူး (ISP-Myanmar) ဘိးဘၣ်ရၤလီၤဃၥ်၀ဲဖဲ လါယနူၤအါရံၤ(၂၄)သီအနံၤန့ၣ်လီၤ.
တၢ်ထီၣ်ဒုးမၤန့ၢ်ဃၥ် သုးကလၢၤအါကတၢၢ် ဖဲရၢၢ်ခၢၣ်ဒီးယိၤဒိၣ်ကီၢ်စဲၣ်တပၤ၀ံၤ ကီၢ်ခီသုး၀ဲၤလီၢ်ခိၣ်သ့ၣ်(၂)ခါပၥ်ဃုၥ် သုးကလၢၤခဲလၢၥ်ပၥ်ဖှိၣ်တစှၤန့ၣ် (၁၄၁)ဖျၢၣ်ဒုးမၤန့ၢ်ဃၥ်၀ဲအဂ့ၢ် ISP – Myanmar ပၥ်ဖျါဃၥ်၀ဲဖဲ အလံၥ်ပၥ်ဖျါအပူၤန့ၣ်လီၤ.
ဒ်န့ၣ်အသိး တၢ်ဒုးမၤန့ၢ်ဃၥ်၀ဲ သုးကီၣ်ကး(ခမရ)ခီၣ်ချ့သုးရ့ၣ်ခဲလၢၥ်ပၥ်ဖှိၣ်(၅၄)ရ့ၣ်၀ံၤ (၄၆)မျးကယၤလၢ တၢ်ဒုးမၤန့ၢ်ဃၥ်န့ၣ် အိၣ်ဖဲရၢၢ်ခၢၣ်ကီၢ်စဲၣ်ပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံဒီးတုၤ ၂၀၂၄နံၣ်,လါဒံၣ်စ့ဘၢၣ်န့ၣ် တၢ်ဒုးမၤန့ၢ်ဃၥ်၀ဲ သုး၀ဲၤလီၢ်ခိၣ်သ့ၣ်တစှၤန့ၣ်(၁၂)ခါန့ၣ်လီၤ.ဖဲန့ၣ်အကျါယိၤဒိၣ်ကီၢ်စဲၣ်ပူၤမုၢ်ထီၣ်ကလံၤစိးကီၢ်ခီသုး၀ဲၤလီၢ်ခိၣ်သ့ၣ်(ရမခ)ပၥ်ဃုၥ် သုး၀ဲၤလီၢ်ခိၣ်သ့ၣ်တစှၤန့ၣ်(၅)ခါန့ၣ် (MNDAA )ဒုးမၤန့ၢ်ဃၥ်၀ံၤ မုၢ်နုၥ်ကီၢ်ခီသုး၀ဲၤလီၢ်ခိၣ်သ့ၣ်(နပခ)ပၥ်ဃုၥ် သုး၀ဲၤလီၢ်ခိၣ်သ့ၣ်တစှၤန့ၣ် (၇)ဘ့ၣ်န့ၣ် AAဒုးမၤန့ၢ်ဃၥ်၀ဲန့ၣ်လီၤ.
