လါယနူၤအါရံၤ(၂၅)သီ,၂၀၂၅နံၣ်
တၢ်မ့ၢ်ဒုးတၢ်လၢ ပှၤဟီၣ်ခိၣ်ဖိခွဲးယၥ်အဂီၢ်န့ၣ် ကီၢ်ပယီၤထံလီၢ်ကီၢ်ပူၤတၢ်ဒုးတၢ်ယၤတၢ်ဂ့ၢ်ကီအံၤ မ့ၢ် တၢ်ဂ့ၢ်လၢကဘၣ်ဘှါရှဲဆိတက့ၢ်အဂ့ၢ် ဘီမုၢ်စၢဖှိၣ်ကရၢဘၣ်ထွဲအမဲရကၤမီၢ်သီ Elise Stefanik လၢ ကီၢ်ခီၣ်ထြဲး ပၥ်ဖျါထီၣ်ဃၥ်တဂၤ စံး၀ဲန့ၣ်လီၤ.
ဖဲလါယနူၤအါရံၤ(၂၁)သီအနံၤ, အမဲရကၤဘျီၣ်ဒိၣ်ထး ထံဂုၤကီၢ်ဂၤတၢ်ရ့လိၥ်ဘၣ်ထွဲကမံးတံၥ်အပူၤ တၢ်ကဘၣ်ဘှါရှဲ ဟီၣ်ခီၣ်ဘီမုၢ်ဂ့ၢ်၀ီတဖၣ်ဒ်လဲၣ်အဂ့ၢ် တဲရှဲတီၣ်ဖျါထီၣ်အဆၢကတီၢ် တဲလီၤ၀ဲန့ၣ်လီၤ.
Elise Stefanik အံၤ တၢ်ကဟ့ၣ်မူဟ့ၣ်ဒါအီၤ ဒ် ဘီမုၢ်စၢဖှိၣ်ကရၢဘၣ်ထွဲအမဲရကၤမီၢ်သီအသိးဒီး ဘျီၣ်ဒိၣ်ထးအပူၤ တၢ်ကပၥ်ဂၢၢ်ပၥ်ကျၢၤဆၢတဲၥ်၀ဲလၢ တၢ်ဖးန့ၣ်လီၤ.
တၢ်အိၣ်ခိးကွၢ်ပှၤဟီၣ်ခိၣ်ဖိခွဲးယၥ်ကရၢ(HRW) အလါယနူၤအါရံၤ(၁၆)သီအနံၤ လံၥ်ပၥ်ဖျါလၢ ဟီၣ်ခိၣ်ဘီမုၢ်လံၥ်ပၥ်ဖျါအပူၤ ၂၀၂၄နံၣ်အတီၢ်ပူၤ သုးကီၣ်ကးလၢ ဘၣ်ပျၢ်ကွံၥ်ဟီၣ်က၀ီၤတဖၣ်အံၤ မၤအါထီၣ်ဒုးယၤရဲၣ်ကျဲၤတဖၣ်လၢ ကလုၥ်ဒူၣ်ပၢဆှၢဟီၣ်က၀ီၤတဖၣ်အပူၤအဂ့ၢ် နဲၣ်ဖျါဃၥ်၀ဲန့ၣ်လီၤ.
HRWအပှၤနဲၣ်တၢ် Elaine Pearson မၤ၀ဲတၢ်မၤနၢ်ပၢၢ်တၢ်ပရၢအမူး ဖဲကီၢ်ကၠီၣ်တဲၣ်, ၀့ၢ်ဘီကီၥ်အဆၢကတီၢ် တဲလီၤ၀ဲလၢ တၢ်ထၢဖှိၣ်ဃၥ်မၤနီၣ်မၤဃါလၢ ဘၣ်ထွဲကီၢ်ပယီၤသုးမုၢ်ဒိၣ် အတၢ်မၤကမၣ် ပှၤဟီၣ်ခိၣ်ခွဲးယၥ်တဖၣ်တကးဘၣ် ကလုၥ်ဒူၣ်တၢ်ပၢၢ်ဆၢကရၢတဖၣ် အတၢ်မၤကမၣ်ပှၤဟီၣ်ခိၣ်ဖိခွဲးယၥ်တဖၣ်အဂ့ၢ် ဒီး နဲၣ်ဖျါဃၥ်၀ဲအဒိလၢ ရၢၢ်ခၢၣ်သုးမုၢ်ဒိၣ်န့ၣ်လီၤ.
လၢန့ၣ်အမဲၥ်ညါအၣ်စံၣ်ယၣ်ပှၤပၢၤလီၢ်ဆ့ၣ်နီၤကီၢ်မလ့ရှါတခီကဟ့ၣ်မၤစၢၤပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤတဖၣ်ဆူ ကီၢ်ပယီၤအဂီၢ် ဒီး ဘီမုၢ်စၢဖှိၣ်ကရၢတၢ်ဘံၣ်တၢ်ဘၢကီၣ်ကး အတၢ်ဆၢတဲၥ်လၢဘၣ်ထွဲ တၢ်ကကးတံၥ် တၢ်ဆါလီၤစုက၀ဲၤတဖၣ်ဆူ ကီၢ်ပယီၤအအိၣ်အဖီခိၣ် ကတူၢ်လိၥ်ဘၣ်အဂီၢ် ဆၢမုၢ်လၢ်၀ဲအဂ့ၢ် Elaine Pearson တဲလီၤ၀ဲန့ၣ်လီၤ.
Ref: RFA
