လါယနူၤအါရံၤ(၂၇)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁),ကီၢ်ရ့ၣ်ဒူသထူၣ်, ဘံလ့ကီၢ်ဆၣ်အပူၤ သုးကီၣ်ကးမဲးပြ့ခံးသုးကလၢၤအဂီၢ် သုးကီၣ်ကးအကဘီယူၤဟဲဆှၢန့ၢ် တၢ်ဘိၣ်တဖၣ်အကျါ ပၥ်ဃုၥ်ဒီးရၣ်ပးတၢ်မူၤတၢ်ဘှီၤကသံၣ်ကသီ(ကသံၣ်ကသ့ၣ်)ဒီး သံးတဖၣ်အါအါဂီၢ်ဂီၢ်အဂ့ၢ် တၢ်ပၢၢ်ဆၢသုးဖိလၢ ထၢန့ၢ်တၢ်ဘိၣ်တနီၤ စံး၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုးသုးကီၣ်ကးမဲးပြ့ခံးသုးကလၢၤဒီး ဒီၣ်တဲၥ်ကွံၥ်ကျဲတဖၣ်အဃိ သုးကီၣ်ကးကဘၣ်ဟဲဆှၢန့ၢ် အသကိးတၢ်အီၣ်တၢ်အီလၢ ကလံၤကျါအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးပၥ်ဖှိၣ်တဖၣ်အအိၣ်န့ၣ်လီၤ.
လါယနူၤအါရံၤ(၂၅)သီအနံၤန့ၣ် သုးကီၣ်ကးအသုးဟဲဆှၢန့ၢ် မဲးပြ့ခံးသုးကလၢၤအဂီၢ်တၢ်ဖိတၢ်လံၤတဖၣ်အကျါ တၢ်ဖိတၢ်လံၤတနီၤန့ၣ် ဟဲလီၤတဲၥ်၀ဲဒၣ်ဖဲ တၢ်ပၢၢ်ဆၢသုးပၥ်ဖှိၣ်တဖၣ် ဟူးဂဲၤ၀ဲတၢ်လီၢ်အပူၤအဂ့ၢ် စံး၀ဲန့ၣ်လီၤ.
“ဟါ ၆နၣ်ရံၣ်ဃၣ်ဃၣ်န့ၣ် ဟဲကွံၥ်လီၤန့ၢ်လၢကဘီယူၤလီၤ. သုးပၥ်ဖှိၣ်တဖၣ် မၤန့ၢ်၀ဲလီၤ. တၢ်ဘိၣ်တနီၤတခီ လီၤတဲၥ်၀ဲဒၣ်ဖဲ သုးကီၣ်ကးသုးကလၢၤပူၤအဃိ အ၀ဲသ့ၣ်မၤန့ၢ်၀ဲလီၤ. တၢ်ဘိၣ်တဖၣ်အကျါ စုက၀ဲၤကျိချံပှၥ်သၣ် ပၥ်ဃုၥ် တစဲးတမွဲးလီၤ. ပၥ်အါအါဂီၢ်ဂီၢ်လၢ သံးဒီးကသံၣ်ကသ့ၣ်တဖၣ်အဂ့ၢ်” စံး၀ဲန့ၣ်လီၤ.
ဒ်န့ၣ်အသိး လါယနူၤအါရံၤ(၂၄)သီအနံၤစ့ၢ်ကီး သုးကီၣ်ကးအသုးသိလ့ၣ်(၁၀)ခိၣ် ဟဲမၤပှဲၤအါထီၣ်သုးအဂံၢ်အဘါ ဆူ ဘံလ့အိၣ်သူၣ်လီၤ (ခမရ-၃)အဂ့ၢ် လီၢ်က၀ီၤပှၤဘၣ်မူဘၣ်ဒါ တဂၤစံး၀ဲန့ၣ်လီၤ.
“ဘံလ့ (ခမရ-၃)အပူၤ ဟဲမၤပှဲၤအါထီၣ်အသုးအဂံၢ်အဘါဒီး သိလ့ၣ်(၁၀)ခိၣ်န့ၣ်လီၤ. ဟဲကိးန့ၢ်ဆူၣ် ကမျၢၢ်သိလ့ၣ်(၂)ခိၣ်၀ံၤ ဟဲတီၣ်၀ဲကျိဖးဒိၣ်တဖၣ်လီၤ. ကျိဖးဒိၣ်လၢ တၢ်ဟဲတီၣ်အီၤလၢကမျၢၢ်သိလ့ၣ်အပူၤန့ၣ် ကမ့ၢ်(၁၂၀-မမ)ကျိဖးဒိၣ်အဂ့ၢ်” လီၢ်က၀ီၤပှၤဘၣ်မူဘၣ်ဒါတဲ၀ဲလီၤ.
တကးဘၣ် သုးကီၣ်ကးအသုး (ခမရ-၃)အံၤ ခီဖျိခးလီၤကျိဖးဒိၣ်တဖၣ်ဆူ ဘံလ့ကီၢ်ဆၣ်ပူၤ အိၣ်ထီၣ်၀ဲကိးမုၢ်နံၤလီၤအဃိ လီၢ်က၀ီၤကမျၢၢ်တဖၣ် ဘၣ်အိၣ်ဒီးတၢ်ဘၣ်ယိၣ်ဘၣ်ဘှီအပူၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်ဒုး မဲးပြ့ခံသုးကလၢၤ၀ံၤ ဒီၣ်တဲၣ်ကွံၥ်ကျဲတဖၣ်အဃိ သုးကီၣ်ကးအသုးကဟဲမၤစၢၤတၢ်လၢခီၣ်တပၤတန့ၢ်ဘၣ်အဃိ ဘၣ်ဟဲမၤစၢၤ၀ဲဒၣ်လၢ ကလံၤကျါအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ သုးကီၣ်ကးတပၤ ခးစၢၤကျိဖးဒိၣ်တဖၣ်ပၥ်ဃုၥ် ဟဲဒုးတၢ်လၢဒြိဒီးကဘီယူၤတဖၣ် အိၣ်၀ဲအသိး ဟဲကွၢ်ဟုၣ်ကွၢ်စုၢ်တၢ်လၢ ကလံၤကျါအိၣ်ထီၣ်၀ဲ ကိးမုၢ်နံၤလီၤအဂ့ၢ် တၢ်ကစီၣ်ဂံၢ်ထံးစံး၀ဲန့ၣ်လီၤ.
Ref: Salween Press
