တရူးတၢ်နဲၣ်လီၤအဖီခိၣ် တၢ်စးထီၣ်ပျဲ တၢ်ကူလဲၢ်မၤကၤလၢ “၀”ဆူ ကိကးတပၤ

လါယနူၤအါရံၤ(၂၁)သီ,၂၀၂၅နံၣ်

၂၀၂၅နံၣ်, လါယနူၤအါရံၤ(၂၀)သီအနံၤန့ၣ် ၀ကီၢ်သွံၣ်စၢဖှိၣ်သုးမုၢ်ဒိၣ်- UWSA သုး၀ဲၤလီၢ်ခိၣ်သ့ၣ်၀ဲၤဒၢး ဘိးဘၣ်ပၥ်ဖျါ၀ဲလၢ  တရူးတၢ်နဲၣ်လီၤအဖီခိၣ် တၢ်စးထီၣ်ပျဲ တၢ်ကူလဲၢ်မၤကၤသဘျ့လၢ “၀”ဆူ ကိကးလီၢ်က၀ီၤတပၤအဂ့ၢ်န့ၣ်လီၤ.

လံၥ်ပၥ်ဖျါအပူၤတၢ်ဒိးန့ၢ်ဘၣ်လံၥ်ဒုးသ့ၣ်ညါလၢတရူးမီၢ်သီ၀ဲၤဒၢးဘၣ်ထွဲကီၢ်ပယီၤအအိၣ်ဒ်အမ့ၢ် ဖီၣ်ဆ့းတိၤလၢတၢ်ဆဲးကျိးဃၥ် ကိကးလီၢ်က၀ီၤဒီး”၀”ကီၢ်အဖီခိၣ် တၢ်ကပျဲလ့ၤလိၤဟးထီၣ် မီၣ်တီၣ်တုၥ်, ပှၤကညီ, တၢ်ဖိတၢ်လံၤလၢတၢ်ပၢဃၥ်တဖၣ်လၢ တၢ်သဘျ့ပူၤလၢလၢပှဲၤပှဲၤအဂ့ၢ်စံး၀ဲန့ၣ်လီၤ.

တကးဘၣ်ပၥ်ဃုၥ်၀ဲစ့ၢ်ကီးလၢ စးထီၣ်လၢ၂၀၂၅နံၣ်, လါယနူၤအါရံၤ(၂၀)သီအနံၤန့ၣ် တၢ်စးထီၣ်ပျဲ တၢ်ကူလဲၢ်မၤကၤလၢ ကိးကးလီၢ်က၀ီၤအပူၤအဂ့ၢ်န့ၣ်လီၤ.

ထဲဒၣ် သုးဂ့ၢ်၀ီတၢ်ပီးတၢ်လီတဖၣ်တၢ်သုတကူလဲၢ်မၤကၤအီၤအဂီၢ်ဒီး မ့မ့ၢ်လၢပတီၢ်မုၢ်ကမျၢၢ်ကိးမုၢ်နံၤ တၢ်ဖိတၢ်လံၤဟးထီၣ်တဖၣ်, ကိးမုၢ်နံၤတၢ်ဖိတၢ်လံၤလၢလိၣ်ဘၣ်၀ဲတဖၣ်ခဲလၢၥ် တၢ်ကကူလဲၢ်မၤကၤအီၤဒ် ညီနုၥ်အသိးအဂီၢ်စ့ၢ်ကီး ပၥ်ဃုၥ်၀ဲန့ၣ်လီၤ.

စးထီၣ်လၢ မဟါအနံၤန့ၣ် တၢ်စးထီၣ်အိးထီၣ်က့ၤ၀ဲ ကိကး-တရူးကီၢ်ဆၢတြဲၤတဖၣ်ဒ်အမ့ၢ် ခၠ့ရွ့ၣ်ဟီၣ်, လီးကဲၣ်တကးဘၣ် “၀-တရူးကီၢ်ဆၢတြဲၤလၢအမ့ၢ် နးတ့း(မၣ်ခါ)တဖၣ်၀ံၤ ရ့ၣ်နီၣ်သိတဖၣ်စ့ၢ်ကီး ဟဲက့ၤနုၥ်လီၤလံအဂ့ၢ် လီၢ်က၀ီၤဖိတဖၣ် တဲ၀ဲန့ၣ်လီၤ.

“စးထီၣ်လၢမဟါအနံၤန့ၣ် တရူးကိၣ်ဒီး ဘံၣ်ယၣ်တဖၣ် စးထီၣ်နုၥ်လီၤလံန့ၣ်လီၤ. ခၠ့ရွ့ၣ်ဟီၣ်, လီးကဲၣ်တြဲၤတဖၣ်စ့ၢ်ကီး က့ၤအိးထီၣ်လံ”အဂ့ၢ် စံး၀ဲန့ၣ်လီၤ.

ခီဖျိ တရူးကးတံၥ်ကွံၥ် တြဲၤတဖၣ်အဃိ “၀”ကီၢ်စဲၣ်, ဟိၣ်ပၣ်ကီၢ်ရ့ၣ်, ၀့ၢ်တဖၣ်အပူၤ စဲးဖီကဟၣ်သူသိတဖၣ် ကၤကွံၥ်၀ဲလၢ တနွံအတီၢ်ပူၤအဃိ ကမျၢၢ်ဖိတဖၣ် ဘၣ်ကွၢ်ဆၢၣ်မဲၥ်ဘၣ်ဒီးတၢ်ကီတၢ်ခဲန့ၣ်လီၤ.

တၢ်အိၣ်သးအံၤအဖီခိၣ် “၀”ကီၢ်စၢဖှိၣ်သွံၣ်သုးမုၢ်ဒိၣ်- UWSA ပှၤကတိၤတၢ်ပၢ အူညံၣ်ရါ စံး၀ဲလၢ” တရူးအကျဲသနူအဖီခိၣ် ကးတံၥ်တြဲၤတဖၣ်အဃိ “၀”ကီၢ်အပူၤ ဘၣ်ကွၢ်ဆၢၣ်မဲၥ်ဘၣ်ဒီး သိကၤတဆံးတက့ၢ်န့ၣ်လီၤ. ဘၣ်ဆၣ် စးထီၣ်လၢမဟါအနံၤန့ၣ် တရူးအိးထီၣ်က့ၤတြဲၤတဖၣ်အဃိ သိတဖၣ်က့ၤနုၥ်လီၤလံ. တၢ်သူၣ်ထီၣ်တၢ်ပီးတၢ်လီတနီၤ စ့ၢ်ကီးဟဲနုၥ်လီၤလံန့ၣ် တၢ်သ့ၣ်ညါဘၣ်၀ဲလီၤ. မ့မ့ၢ်စဲးဖီကဟၣ်တၢ်ပီးတၢ်လီတခီ တနၥ်ဟူဘၣ်၀ဲဒံးဘၣ်”အဂ့ၢ်န့ၣ်လီၤ.

ကီၢ်တရူးပဒိၣ်အံၤ စးထီၣ်လၢ(၁၀၂၇)ဒုးယၤရဲၣ်ကျဲၤ(၂)၀ီတ၀ီန့ၣ် ကးတံၥ်ကွံၥ် တၢ်ကူလဲၢ်မၤကၤအခွဲးလၢ တရူး-ပယီၤကီၢ်ဆၢတြဲၤလၢ ယိၤဒိၣ်ကီၢ်စဲၣ်ကလံၤစိးအပူၤ ကလုၥ်ဒူၣ်ပှၤဖီၣ်စုက၀ဲၤကရၢပၢဆှၢဃၥ်၀ဲတဖၣ်န့ၣ်လီၤ.

သုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအံၤ ဘၣ်ပျၢ်ကွံၥ်၀ဲ တရူး-ပယီၤကီၢ်ဆၢတြဲၤ(၅)ခါဒ်အမ့ၢ် ကၠ့ၣ်စါကၠီး, ခၠ့ရွ့ၣ်ဟီၣ်, ယၣ်လိၣ်ကၠဲ, မိကိဒီးနါခါတြဲၤတဖၣ်၀ံၤ တြဲၤတဖၣ်အံၤ သိၣ်မှံကရၢသၢဖုလၢအမ့ၢ် MNDAA၊ TNLA၊ AA တဖၣ် ထီၣ်ဒုးမၤန့ၢ်၀ဲန့ၣ်လီၤ.

Ref: Wa News Land