(၁)နံၣ်အတီၢ်ပူၤ ကီၢ်ရ့ၣ်ဒူသထူၣ်ဟီၣ်က၀ီၤအပူၤ ခီဖျိသုးကီၣ်ကး မၤကလံၤကျါတၢ်ဒုးဒီးခးလီၤကျိဖးဒိၣ်အဃိ ကမျၢၢ်ဘၣ်သံ၀ဲ(၂၃)ဂၤဒီး ဘၣ်ဒိ၀ဲ(၁၁၇)ဂၤ

လါယနူၤအါရံၤ(၂၁)သီ,၂၀၂၅နံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁), ကီၢ်ရ့ၣ်ဒူသထူၣ်ဟီၣ်က၀ီၤအပူၤ စးထီၣ်လၢ ၂၀၂၄နံၣ်, လါယနူၤအါရံၤ(၁)သီတုၤလါဒံၣ်စ့ဘၢၣ်(၃၁)သီနံၤ (၁)နံၣ်အတီၢ်ပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး မၤ၀ဲကလံၤကျါတၢ်ဒုးအကလုၥ်ကလုၥ်ဒီးခးလီၤကျိးဖးဒိၣ်တဖၣ်အဃိ လီၢ်က၀ီၤကမျၢၢ်ဘၣ်သံ၀ဲ(၂၃)ဂၤဒီး ဘၣ်ဒိ၀ဲ(၁၁၇)ဂၤအဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ဒူသထူၣ်တၢ်မၤနီၣ်စရီအဖီခိၣ်န့ၣ်လီၤ.

(၁)နံၣ်အတီၢ်ပူၤ ကီၢ်ရ့ၣ်ဒူသထူၣ်ဟီၣ်က၀ီၤအပူၤ သုးကီၣ်ကးအစုတီၤဖီလၥ်သုးတဖၣ် မၤ၀ဲကလံၤကျါတၢ်ဒုး (၂၄)ဘျီဒီး ခးလီၤကျိဖးဒိၣ်အိၣ်ထီၣ်၀ဲအဘျီ(၂၄၉)ဘျီအပူၤ လီၢ်က၀ီၤကမျၢၢ်ဟံၣ်ဃီဘၣ်ဟးဂီၤကွံၥ်၀ဲ(၁၈၅)ဖျၢၣ်, တၢ်သိၣ်လိကၠိ(၅)ဖျၢၣ်ဒီးသီခါဖၠၣ်(၈)ဖျၢၣ်န့ၣ်လီၤ.

တကးဘၣ်လီၢ်က၀ီၤကမျၢၢ်စုလီၢ်ခီၣ်ခိၣ်တၢ်ဖိတၢ်လံၤလၢအမ့ၢ်ရီဘၢၣ်ကရၢၢ်(၁၅)အ့ကၢၣ်ဒီးကရၢၢ်(၁)ကရၢၢ်မ့ၣ်အူအီၣ်ဟးဂီၤကွံၥ်၀ဲအသိး ပနၢ်ဘၣ်သံ၀ဲ(၉)ဒု,ဘၣ်ဒိ၀ဲ(၅)ဒု, ကျီၢ်ဘၣ်ဒိ၀ဲ(၅)ဒုအသိး  ဘၣ်ဟးဂီၤကွံၥ်စ့ၢ်ကီး သိလ့ၣ်(၂)ခိၣ်ဒီး မီၣ်တီၣ်တုၥ်, သ၀ီထံကမါ, တၢ်ဆါစဲးသိကျးတဖၣ်န့ၣ်လီၤ.

တကတီၢ်ဃီ (၁)နံၣ်အတီၢ်ပူၤ ကီၢ်ရ့ၣ်ဒူသထူၣ်ဟီၣ်က၀ီၤအပူၤ တၢ်ဒုးအကလုၥ်ကလုၥ်ကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးကီၣ်ကးအသုးအဘၢၣ်စၢၤ အိၣ်ထီၣ်၀ဲအဘျီ(၃၆)ဘျီအပူၤ သုးကီၣ်ကးအသုးဘၣ်သံ၀ဲ(၃၅)ဂၤ, ဘၣ်ဒိ၀ဲ(၄၀)ဂၤ၀ံၤ တၢ်ပၢၢ်ဆၢသုးပၥ်ဖှိၣ်တပၤစ့ၢ်ကီး ဘၣ်သံ၀ဲ(၂)ဂၤဒီးဘၣ်ဒိ၀ဲ(၃)ဂၤအဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ဒူသထူၣ်တၢ်မၤနီၣ်စရီအဖီခိၣ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၁), ကီၢ်ရ့ၣ်ဒူသထူၣ်ဟီၣ်က၀ီၤအပူၤ သုးကီၣ်ကးအစုတီၤဖီလၥ် သုးတဖၣ်လၢအမၤကမၣ်ပှၤဟီၣ်ခိၣ်ခွဲးယၥ်တဖၣ်ဒ်အမ့ၢ် ခမရ(၂၀၆), (ခမရ-၉),(ခမရ-၄၁၀),(ခမရ-၄၀၉), (၄၀၂) မျိာ်သုး, (နီၣ်ဂံၢ်-၃၁၀မျိၥ်သုး)၊(၆၀၂-ဒြိသုးရ့ၣ်)ဒီး  (ခမရ-၂၀၇)သုးရ့ၣ်တဖၣ်န့ၣ်လီၤ.