လါယနူၤအါရံၤ(၂၀)သီ,၂၀၂၅နံၣ်
ကီၢ်ကၠီၣ်တဲၣ်ပူၤ ကၠီၣ်တဲၣ်ပဒိၣ်ရဲၣ်ကျဲၤလၢ ကဟ့ၣ်တၢ်ပျဲ အိၣ်လဲတၢ်လိၣ်ခိၣ်လိၣ်ကွဲတၢ်ဖံးတၢ်မၤ ဒ်အဖိးသဲစးတၢ်ရဲၣ်တၢ်ကျဲၤတဖၣ်အဃိတၢ်မူၤတၢ်ရၤကဲတဖၣ် တၢ်ဘၣ်ယိၣ်အိၣ်ထီၣ်လၢ အ၀ဲသ့ၣ်တၢ်ဖံးတၢ်မၤတဖၣ် ကပတုၥ်ကွံၥ်အသးန့ၣ်လီၤ.
သဲစးတၢ်ဘျၢလၢ ကဟ့ၣ်တၢ်ပျဲအိၣ်လဲတၢ်လိၣ်ခိၣ်လိၣ်ကွဲတၢ်ဖံတၢ်မၤအံၤ ကဟးထီၣ်၀ဲလၢတလါအတီၢ်ပူၤအဂ့ၢ် ကီၢ်ကၠီၣ်တဲၣ်ဒံၣ်ကၠံးတဲၣ်မုၥ်ကျိၤ၀ဲၤကွၢ်ကိတိၥ် ပရၣ်ဆဲးကၠဲၣ်တၣ်ရူးရၣ်တီၣ် တဲလီၤ၀ဲဖဲအပူၤကွံၥ်အနွံန့ၣ်လီၤ.
ကိတိၥ်ခိၣ်ကျၢၢ်လီၢ်လံၤ တဲးဆ့ၣ်ရှ့ၣ်န၀ဲးလၢ ဘၣ်တၢ်သ့ၣ်ညါအီၤဒ်အအိၣ်လၢခဲအံၤပဒိၣ်ကရၢအလီၢ်ခံစ့ၢ်ကီး တူၢ်လိၥ်ဆီၣ်ထွဲ၀ဲတၢ်ရဲၣ်တၢ်ကျဲၤအံၤန့ၣ်လီၤ. တၢ်မ့ၢ်ဟ့ၣ်တၢ်ပျဲအိၣ်လဲတၢ်လိၣ်ခိၣ်လိၣ်ကွဲဒ်အဖိးသဲစးန့ၣ် ပဒိၣ်အဂီၢ် တနံၣ်န့ၣ် စ့ကဟဲနုၥ်လီၤအါထီၣ်တုၤ အမဲရကၤစ့ဒီၣ်လၣ် သၢဘံၣ်လံၣ်ယၣ်အဂ့ၢ် ကိတိၥ်ခိၣ်ကျၢၢ်လီၢ်လံၤ တဲးဆ့ၣ်စံး၀ဲန့ၣ်လီၤ.
တၢ်ဖံးတၢ်မၤလၢအိၣ်ဒ်တဖိးသဲစးလၢ သဲစးတၢ်ဘျၢအချၢတဖၣ်စ့ၢ်ကီး တၢ်မ့ၢ်ဟ့ၣ်တၢ်ပျဲအဖိးသဲစးန့ၣ် တၢ်နီဟးထီၣ်ကွံၥ် ပှၤလၢမၤကမၣ်တၢ်မူၤတၢ်ရၤကဲတဖၣ်ကန့ၢ်စ့ၢ်ကီးအဂ့ၢ် ကိတိၥ် Prasert စံး၀ဲန့ၣ်လီၤ.
တဖိးသဲစးတၢ်လိၣ်ခိၣ်လိၣ်ကွဲတၢ်ဖံးတၢ်မၤတဖၣ် တၢ်ကသြီနုၥ်လီၤလၢ အဖိးသဲစးတၢ်ဘျၢအတကွီၢ်ပူၤ၀ံၤ တၢ်ပညိၣ်လၢကဒိးန့ၢ်ဘၣ်အခိအလဲတဖၣ်အဂ့ၢ် Prasert တဲလီၤ၀ဲဆူ ပှၤထၢတၢ်ကစီၣ်ဖိတဖၣ်အအိၣ်န့ၣ်လီၤ.
တၢ်ကဟ့ၣ်တၢ်ပျဲ အိၣ်လဲတၢ်ဖံးတၢ်မၤတဖၣ်ဒ်အဖိးသဲစးတၢ်ဘျၢအဆၢကတီၢ်တကတီၢ်ဃီပူၤ ကၠီၣ်တဲၣ်ပဒိၣ်ကတဲၥ်ကတီၤမၤ၀ဲလၢ တၢ်ကဟ့ၣ်တၢ်ပျဲအဖိးသဲစး တၢ်ဟးကသုၣ်အလီၢ်တဖၣ်, ကၣ်စံၣ်နိၣ်တၢ်ဖံးတၢ်မၤလၢတၢ်အိးထီၣ်ဃၥ်ဟိၣ်ထဲပူၤတဖၣ်အဂီၢ်န့ၣ်လီၤ.
သဲးစးတၢ်ဘျၢလၢကဟ့ၣ် တၢ်ပျဲအိၣ်လဲတၢ်လိၣ်ခိၣ်လိၣ်ကွဲတၢ်ဖံးတၢ်မၤဒ်အဖိးသဲစးအံၤ ကိတိၥ်ခိၣ်ကျၢၢ်၀ဲၤဒၢး ပၥ်ဂၢၢ်ပၥ်ကျၢၤမ့ၢ်၀ံၤန့ၣ် ကတၢၣ်ပီၣ်တဲသကိး၀ဲဒၣ်လၢ ကၠီၣ်တဲၣ်ဘျီၣ်ဒိၣ်အပူၤန့ၣ်လီၤ.
