ကီၢ်သူလ့ၤဟီၣ်က၀ီၤအပူၤ တၢ်ဒုးတဖၣ်အဃိ ထံလီၢ်ကီၢ်ပူၤပှၤလီၢ်အိၣ်ကမှံဖိနီၣ်ဂံၢ်အါထီၣ်

လါယနူၤအါရံၤ(၂၀)သီ,၂၀၂၅နံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤအပူၤ ခီဖျိတၢ်ဒုးတဖၣ်ဆူၣ်ထီၣ်အဃိ ပှၤလီၢ်က၀ီၤဖိအါအါဂီၢ်ဂီၢ်ဘၣ်ဃ့ၢ်ပူၤဖျဲးသးအဂ့ၢ် ဘီမုၢ်စၢဖှိၣ်ကရၢဘၣ်ထွဲပှၤဟီၣ်ခိၣ်ဖိတၢ်ဒိသူၣ်ဒိသးတၢၣ်ပီၣ်တဲသကိး၀ဲၤဒၢး(UNOCHA) ပၥ်ဖျါဃၥ်တၢ်ကစီၣ်ဖဲလါယနူၤအါရံၤ(၁၈)သီအနံၤန့ၣ်လီၤ.

တၢ်ဒုးတဖၣ်အဃိ ဖဲလါယနူၤအါရံၤ(၆)သီတုၤ(၁၃)သီအနံၤ (၁)နွံအတီၢ်ပူၤ ပှၤလၢလဲၤဃ့ၢ်အိၣ်ကဒုဆူ နိၣ်တကီကီၢ်ဆၣ်ပူၤ(၁၂၀၃)ဂၤ, ဆူဒီၣ်ဖးခိၣ်ကီၢ်ဆၣ်ပူၤ(၉၅)ဂၤ, ဖၣ်ပူၣ်ကီၢ်ဆၣ်ပူၤ(၉၉)ဂၤအဂ့ၢ် ကွဲးဖျါဃၥ်၀ဲဖဲ အလံၥ်ပၥ်ဖျါအပူၤန့ၣ်လီၤ.

ကီၢ်သူလ့ၤတၢ်ပၢဟီၣ်က၀ီၤအပူၤတၢ်ဒုးတဖၣ်ကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးသုးကီၣ်ကးအသုးအဘၢၣ်စၢၤ၀ံၤ ခီဖျိကလံၤကျါတၢ်ဒုးဒီးခးကျိဖးဒိၣ်တဖၣ်အဃိ ကီၢ်ဆၣ်တဖၣ်ဒ်အမ့ၢ် ကီးတရံး, လ့က့ၤကိၥ်, ဖၣ်ပူၣ်, ရၤမတံဟီၣ်က၀ီၤ သ၀ီတဖၣ်အပူၤ လီၢ်က၀ီၤကမျၢၢ်တဖၣ် ဘၣ်ဃ့ၢ်ပူၤဖျဲးသးကဒီးအဂ့ၢ် တၢ်သ့ၣ်ညါဘၣ်န့ၣ်လီၤ.

“ကလံၤကျါတၢ်ဒုးတဖၣ် အိၣ်ကိးမုၢ်နံၤန့ၣ်လီၤ. ပှၤကညီဘၣ်ဒိဘၣ်ထံးဒီးတၢ်သံတၢ်ပှၢ်တဖၣ်အိၣ်အါမးလီၤ. ကျိဖးဒိၣ်ဘၣ်အီၤအဃိ ဘၣ်ဟးဂုၤဟးဂီၤကွံၥ်စ့ၢ်ကီး ဟံၣ်ဃီ, တၢ်သိၣ်လိကၠိဒီး တၢ်ဆါဟံၣ်တဖၣ်”အဂ့ၢ် ပှၤဟူးဂဲၤလၢ ထံလီၢ်ကီၢ်ပူၤပှၤဘၣ်ကီဘၣ်ခဲဖိဂ့ၢ်၀ီ စံး၀ဲန့ၣ်လီၤ.

ကတီၢ်ခဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်က၀ီၤ, ကီၢ်ရ့ၣ်(၇)ဘ့ၣ်အပူၤ ထံလီၢ်ကီၢ်ပူၤပှၤလီၢ်အိၣ်ကမှံဖိ အိၣ်ထီၣ်တုၤ(၁.၂)ကကွဲၢ်ဘျဲၣ်၀ံၤ ထဲဒၣ် ဖဲအပူၤကွံၥ်၂၀၂၄နံၣ်အတီၢ်ပူၤန့ၣ် ထံလီၢ်ကီၢ်ပူၤပှၤလီၢ်အိၣ်ကမှံဖိ အိၣ်ဒိၣ်ထီၣ်ခံစးဒီး တၢ်အံၤမ့ၢ် ခီဖျိကလံၤကျါတၢ်ဒုးတဖၣ်အဃိ အဂ့ၢ်အ၀ဲစံး၀ဲန့ၣ်လီၤ.

တၢ်ဒုးတဖၣ်အဃိ ထံလီၢ်ကီၢ်ပူၤပှၤလီၢ်အိၣ်ကမှံဖိလၢ ဘၣ်ဃ့ၢ်ပူၤဖျဲးသးတဖၣ်အံၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ကးတံၥ်ဃၥ် တၢ်တီဆှၢတၢ်အီၣ်တၢ်အီအခွဲးတဖၣ် ဒီးတၢ်ဖိတၢ်လံၤအပှ့ၤကလံၤဒိၣ်ထီၣ်အဃိ ဘၣ်ကွၢ်ဆၢၣ်မဲၥ်ဘၣ်ဒီးတၢ်ကီတၢ်ခဲအါမးအဂ့ၢ် စံး၀ဲန့ၣ်လီၤ.

ကတီၢ်ခဲအံၤန့ၣ် သုးကီၣ်ကးတပၤဒ်သိးက့ၤအိးထီၣ်ကဒါက့ၤအ့ရှၢကျဲမုၢ်ကန့ၢ်အဂီၢ်ဒီးတၢ်ကူလဲၢ်မၤကၤတၢ်ဖံးတၢ်မၤတဖၣ် ကလဲၤသရံးက့ၤဘၣ်ဂ့ၤဘၣ်၀ီအဂီၢ် ကတဲၥ်ကတီၤသုးဂ့ၢ်၀ီတဖၣ်ဒီးမၤပှဲၤအါထီၣ်သုးအဂံၢ်အဘါတဖၣ်၀ံၤ ဟဲထီၣ်ဆူကီးတရံးတပၤအဂ့ၢ် တၢ်သ့ၣ်ညါဘၣ်န့ၣ်လီၤ.

စးထီၣ်ဖဲအပူၤကွံၥ် ၂၀၂၃နံၣ်, လါနိၣ်၀့ဘၢၣ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကးတံၥ်ဃၥ်၀ဲ အ့ရှၢကျဲမုၢ်ဖးဒိၣ်အံၤအဃိ သုးကီၣ်ကးတပၤ ဒ်သိးက့ၤအိးထီၣ်ကဒါက့ၤကန့ၢ်အဂီၢ် မၤ၀ဲသုးတၢ်ဟူးတၢ်ဂဲၤတဖၣ်အဃိ ကီၢ်သူလ့ၤတၢ်ပၢဟီၣ်က၀ီၤအပူၤ တၢ်ဒုးတဖၣ်ဆူၣ်ထီၣ်သ့အဂီၢ် ပှၤလၢပဲၥ်ထံနီၣ်ဖး သုးဂ့ၢ်၀ီတဖၣ် ပဲၥ်ထံနီၣ်ဖးဃၥ်၀ဲန့ၣ်လီၤ.

Ref: VOM