လါယနူၤအါရံၤ(၁၁)သီ, ၂၀၂၅နံၣ်
၂၀၂၅နံၣ်, လါယနူၤအါရံၤ(၁၀)သီအနံၤ,မုၢ်ထူၣ်(၁း၂၃)နၣ်ရံၣ်အဆၢကတီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ကၠဲးထိၣ်ကီၢ်ဆၣ်အပူၤ သုးကီၣ်ကးကျိဖးဒိၣ်သုး(၄၄) ခးလီၤ(၁၂၀-မမ)ကျိဖးဒိၣ်အဃိ လဲၤလီၤတံၥ်ပိၢ်ဖးထီၣ်၀ဲဒၣ်ဖဲ ငပၠီတီကရူၢ်, ငပၠီတီသ၀ီပူၤ ယၣ်အီၣ်မၣ်အီဃိၣ်ကျဲ အူအီၣ်စိအဟံၣ်ဖီခိၣ်အဃိ
အဟံၣ်မ့ၣ်အူအီၣ်ဟးဂီၤကွံၥ်၀ဲအသိး စ့ပယီၤကၠး(၆၅)ကလီၢ်ဒီး ထူ(၇)ပဲစ့ၢ်ကီး ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ.
တကတီၢ်ဃီ ဖဲမုၢ်ထူၣ်(၁း၃၈)နၣ်ရံၣ်အဆၢကတီၢ်န့ၣ် (၁၂၀-မမ)ကျိဖးဒိၣ် ဟဲလီၤတဲၥ်ကဒီး ဖဲငပၠီတီသ၀ီပူၤ, အူ၀့သ့ထိဟံၣ်အကပၤအဃိ သ၀ီပိၥ်မုၣ်တဂၤဘၣ်ဒိ၀ဲ၀ံၤ အဟံၣ်စ့ၢ်ကီး ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါယနူၤအါရံၤ(၁)သီအနံၤန့ၣ် သုးကီၣ်ကးအသုးအဂံၢ်အဘါအါအါဂီၢ်ဂီၢ် ဟဲထီၣ်ဆူ ကၠဲးထိၣ်ကီၢ်ဆၣ်, ငပၠီတီကရူၢ်, တက့ခၠီဖၠါတဆီ ဆူ ငပၠီတီသ၀ီတပၤအဂ့ၢ် လီၢ်က၀ီၤကမျၢၢ်တဖၣ် တဲ၀ဲအဖီခိၣ် သ့ၣ်ညါဘၣ်၀ဲအဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
သုးကျိၤလၢ ဟဲထီၣ်အံၤ ခးလီၤကျိဖးဒိၣ်အဃိ လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ကၠဲးထိၣ်ကီၢ်ဆၣ်, ငပၠီတီကရူၢ်, တက့ခၠီဖၠါအဃိ ကၠိဖိမုၣ်တဂၤ အခၣ်ဘၣ်ဒိ၀ဲန့ၣ်လီၤ.
ဖဲအပူၤကွံၥ် ၂၀၂၄နံၣ်,လါဒံၣ်စ့ဘၢၣ်(၂၈)သီအနံၤစ့ၢ်ကီး သုးကီၣ်ကးအသုး ခးလီၤကျိဖးဒိၣ် ဆူ ကၠဲးထိၣ်ကီၢ်ဆၣ်, ငပၠီတီကရူၢ်, ငပၠီတီသ၀ီပူၤအဃိ လဲၤလီၤတဲၥ်ပိၢ်ဖးထီၣ်၀ဲဒၣ် ဖဲအူငမိးတ့ၣ်တၢ်ဖံးအီၣ်မၤအီၣ်ကရၢၢ်ပူၤ ခံဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ကီၢ်ရ့ၣ်ဒူသထူၣ်, ဘံလ့ကီၢ်ဆၣ်အပူၤ တၢ်ဒုးတဖၣ်ကဲထီၣ်သးအဃိ ရွ့ၣ်လီၣ်အ့သ၀ီ, နးကၠံသ၀ီဒီး သ၀ီလၢဖဲန့ၣ်တဖၣ် ဘၣ်ဃ့ၢ်ပူၤဖျဲးသးအဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
ကတီၢ်ခဲအံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူသထူၣ်ဟီၣ်က၀ီၤအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး မၤအါထီၣ်သုးအဂံၢ်အဘါတဖၣ်အသိး ဟူးဂဲၤအါထီၣ်၀ဲသုးဂ့ၢ်၀ီတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
