လါယနူၤအါရံၤ(၁၃)သီ,၂၀၂၅နံၣ်
စးထီၣ်လၢ ၂၀၂၄နံၣ်, လါယနူၤအါရံၤ(၁)သီတုၤလါဒံၣ်စ့ဘၢၣ်(၃၁)သီအနံၤ, (၁)နံၣ်အတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၃),ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုးတၢ်မၤကမၣ်ပှၤဂ့ၢ်၀ီခွဲးယၥ်တဖၣ်အပူၤလီၢ်က၀ီၤကမျၢၢ်လၢတၢ်ကမၣ်တအိၣ်ဘၣ်သံ၀ဲ(၉၇)ဂၤဒီး ဘၣ်ဒိ၀ဲ(၃၆၄)ဂၤအဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ချၢၣ်လွံၢ်ထူၣ် တၢ်မၤနီၣ်စရီတဖၣ်အဖီခိၣ်န့ၣ်လီၤ.
(၁)နံၣ်အတီၢ်ပူၤ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ သုးကီၣ်ကးအသုးတဖၣ် မၤကမၣ်ပှၤဂ့ၢ်၀ီခွဲးယၥ်တဖၣ်အပူၤ လီၢ်က၀ီၤကမျၢၢ်ပိၥ်မုၥ်ဘၣ်သံ၀ဲ(၃၀)ဂၤ, ပိၥ်ခွါဘၣ်သံ၀ဲ(၆၇)ဂၤ ဒီး ကမျၢၢ်ပိၥ်မုၣ်ဘၣ်ဒိ၀ဲ(၁၄၀)ဂၤ, ပိၥ်ခွါဘၣ်ဒိ၀ဲ(၂၂၄)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုး မၤကမၣ်ပှၤဂ့ၢ်၀ီခွဲးယၥ်တဖၣ်အကျါ ဖီၣ်န့ၢ်ဆူၣ်ကမျၢၢ် ပိၥ်မုၣ်(၁၄၀)ဂၤဒီး ကမျၢၢ်ပိၥ်ခွါ(၉၃)ဂၤ ခဲလၢၥ်ပၥ်ဖှိၣ် (၁၂၀)ဂၤန့ၣ်လီၤ.
တကးဘၣ် ဘၣ်ဟးဂီၤကွံၥ်၀ဲစ့ၢ်ကီး လီၢ်က၀ီၤကမျၢၢ်ဟံၣ်(၃၀၉)ဖျၢၣ်, ကၠိ(၉)ဖျၢၣ်, တၢ်ဘါယွၤသရိၥ်(၆)ဖျၢၣ်, ဘျီၣ်ရိဖှိၣ်(၁)ဖျၢၣ်, သီခါဖၠၣ်(၁၅)ဖျၢၣ် ဒီးတၢ်ဆါဟံၣ်ဘၣ်ဟးဂီၤကွံၥ်၀ဲ (၄)ဖျၢၣ်အဂ့ၢ် တၢ်သ့ၣ်ညါဘၣ်လၢ ကီၢ်ရ့ၣ်ချၢၣ်လွံၢ်ထူၣ် တၢ်မၤနီၣ်စရီတဖၣ်အဖီခိၣ်န့ၣ်လီၤ.
(၁)နံၣ်အတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးတၢ်မၤကမၣ်ပှၤဂ့ၢ်၀ီခွဲးယၥ်တဖၣ်မ့ၢ်၀ဲ မၤကလံၤကျါတၢ်ဒုးတဖၣ်, ဒြိတၢ်ဒုးတဖၣ်, ခးလီၤကျိဖးဒိၣ်တဖၣ်, ဖီၣ်န့ၢ်ဆူၣ်ကမျၢၢ်ဒီးဃ့န့ၢ်ဆူၣ်ကျိၥ်စ့တဖၣ် ဒီး မၤကမၣ်၀ဲပှၤဂ့ၢ်၀ီခွဲးယၥ်လၢ ကျဲအကလုၥ်လုၥ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ သုးကီၣ်ကးအစုတီၤဖီလၥ် သုးတဖၣ်လၢဟူးဂဲၤ၀ဲတဖၣ်မ့ၢ်၀ဲ (ခလရ-၂၆၄),(ခလရ-၆၀), (ခမရ-၃၀၇), (ခမရ-၃၄၀), (ခမရ-၅၉၀), (ခမရ-၄၃၉), (ခမရ-၃၅၁), (ခလရ-၅၇), သုးဒီးပၢၤကီၢ်သုးလၢအိၣ်ဖဲကၠီးတခါ,(ခမရ-၂၀), (ခမရ-၅၉၈), (ခမရ-၃၅၁), (ခမရ-၇၃), (ခမရ-၅၉၉)ဒီး(ခမရ-၃၄၉)န့ၣ်လီၤ.
