လါယနူၤအါရံၤ(၈)သီ,၂၀၂၅နံၣ်
တရူးခွါဂဲၤဒိလၢအမ့ၢ် Wang Xing လၢအလီၤမၢ်တဂၤအံၤ တၢ်က့ၤထံၣ်န့ၢ်အီၤလၢ ကၠီၣ်တဲၣ်-ပယီၤကီၢ်ဆၢ၀ံၤ ကၠီၣ်တဲၣ်ပှၤဘၣ်မူဘၣ်ဒါတဖၣ် လဲၤကိးက့ၤ၀ဲဖဲ မဟါအနံၤလါယနူၤအါရံၤ(၇)သီအနံၤအဂ့ၢ် ကၠီၣ်တဲၣ်တၢ်ကစီၣ်သန့တဖၣ် ပၥ်ဖျါဃၥ်၀ဲန့ၣ်လီၤ.
တရူးခွါဂဲၤဒိလၢအမ့ၢ် Wang Xingအံၤ အပူၤကွံၥ်လါယနူၤအါရံၤ(၃)သီအနံၤန့ၣ် စးထီၣ်လီၤမၢ်၀ဲ ဖဲကီၢ်ကၠီၣ်တဲၣ်, တးကီၢ်ရ့ၣ်, ၀့ၢ်မဲးဆီးအကပၤ ကီၢ်ပယီၤတကပၤ၀ံၤ ကၠီၣ်တဲၣ် တၢ်ဒီသဒၢတၢ်ကူလဲၤမၤကၤပှၤကညီ, ဖိသၣ်ဒီးပိၥ်မုၣ်လီၢ်ခၢၣ်သး၀ဲၤကျိၤ ပှၤနဲၣ်တၢ် ပၢၤကီၢ်ခိၣ်ကျၢၢ် Thatchai Pitaneelabutr လဲၤထံၣ်လိၥ်အသးဒီးအီၤအဂ့ၢ် ပၥ်ဖျါဃၥ်၀ဲန့ၣ်လီၤ.
ဘၣ်ဆၣ်ဒီး တၢ်ထံၣ်န့ၢ်က့ၤအီၤလၢ ကီၢ်ပယီၤတပၤ တၢ်လီၢ်ဖဲလဲၣ်ဒီး တၢ်ထံၣ်က့ၤအီၤ အက့ၢ်အဂီၤဒ်လဲၣ်တခီ တပၥ်ဖျါဃၥ်၀ဲ လီၤတံၢ်လီၤဆဲးဘၣ်.
တရူးခွါဂဲၤဒိ Wang Xingအံၤ ဆဲးကျိးလိၥ်သးဒီး ကီၢ်ကၠီၣ်တဲၣ်အိၣ်သူၣ်လီၤတၢ်ကရၢကရိတဖု၀ံၤ ဖဲလါယနူၤအါရံၤ(၂)သီအနံၤန့ၣ် စးထီၣ်ဟးထီၣ်လၢ ရှၣ်ဟဲဒီးဟဲတုၤဖဲ ၀့ၢ်ဘီကီၥ်တခီ ဒိးထီၣ်၀ဲသိလ့ၣ်လၢ ကရၢအံၤရဲၣ်ကျဲၤန့ၢ်အီၤဒီး ယံၤသၢသီန့ၣ် တၢ်ဆဲးကျိးအီၤတန့ၢ်လၢၤဘၣ်န့ၣ်လီၤ.
တၢ်ဆဲးကျိးအီၤတန့ၢ်လၢၤဘၣ်၀ံၤအလီၢ်ခံ တရူးမီၢ်သီ၀ဲၤဒၢးလၢအိၣ်ဖဲ ကီၢ်ကၠီၣ်တဲၣ်ဒီး တရူးမီၢ်လါ၀ဲၤဒၢးလၢအိၣ်ဖဲ ၀့ၢ်ကံၢ်မဲတဖၣ် မၤတၢ်ဆဲးကျိးဒီး ခွါဂဲၤဒိ Wang Xing အဟံၣ်ဖီဃီဖိ၀ံၤ ပၥ်ဖှိၣ်မၤသကိးဒီး ကၠီၣ်တဲၣ်ပှၤဘၣ်မူဘၣ်ဒါတဖၣ်၀ံၤ ဃုက့ၤ၀ဲအဂ့ၢ် တရူးမီၢ်သီ၀ဲၤဒၢး ပှၤကတိၤတၢ်ပၢ စံးဆၢဃၥ်၀ဲ ဆူ ပှၤတၢ်ထၢတၢ်ကစီၣ်ဖိတဖၣ်အအိၣ်န့ၣ်လီၤ.
