လါယနူၤအါရံၤ(၈)သီ,၂၀၂၅နံၣ်
ဖဲလါယနူၤအါရံၤ(၆)သီနံၤ, ဂီၤခီအကတီၫ် ကညီကီၫ်စဲၣ်,ရၤမတံကီၫ်ဆၣ်,ယ့ၣ်ပူၣ်သ၀ီ,က၀ီၤဒ့နီၫ်ဂံၫ်(၅)အပူၤ မ့ၣ်ပိၫ်ပိၫ်ဖးထီၣ်အဃိ ပှၤဘၣ်သံ(၃)ဂၤ၀ံၤ ဘၣ်ဒိဘၣ်ထံး(၃)ဂၤအဂ့ၫ် လီၫ်က၀ီၤဖိတဖၣ်တဲ၀ဲလီၤ.
တၫ်ကဲထီၣ်သးအပူၤ သးနံၣ်(၃၀)ဘျဲၣ် ကိၣ်မ့သါကၠံဒီးအမါ,မိၫ်ဒၢတဂၤ အဟၢဖၢပူၤ ဖိသၣ်(၁)ဂၤသံ၀ံၤ မိၫ်ဒၢ၀ဲန့ၣ်ဒီး ပိာ်မုၣ်လၢအဂၤ(၂)ဂၤ ဘၣ်ဒိဘၣ်ထံး၀ဲအဂ့ၫ်တဲ၀ဲလီၤ.
မ့ၣ်ပိၫ်အံၤ ပိၫ်ဖးထီၣ်၀ဲဖဲကိၣ်မ့သါကၠံလၢသံအံၤ ၀ံဃာ်ထၢၣ်ပူၤအဃိ ပှၤလၢအိၣ်ဖဲတၫ်ကပိာ်ကပၤတဖၣ် ဘၣ်ဒိဘၣ်ထံး ၀ဲအဂ့ၫ် ပှၤ၀့ၫ်ရၤမတံ၀့ၫ်ဖိတဂၤတဲ၀ဲလီၤ.
“မ့ၣ်ပိၫ်န့ၣ် မ့ၫ်စုကွံာ်မ့ၣ်ပိၫ်လီၤ. အ၀ဲဖၢနုာ်ဃာ်စုမ့ၣ်ပိၫ်လၢထၢၣ်ပူၤစ့ၫ်ကီး တသ့ၣ်ညါ၀ဲလီၤတံၫ်ဘၣ်. လီၤဂာ်လၢထုး ဘၣ်၀ဲလၢအစုလီၤ.တၫ်န့ၣ်အဃိပိၫ်ဖးထီၣ်၀ဲလီၤ.အမါတခီ သံဖဲအလီၫ်တဘျီဃီလီၤ.ပိာ်မုၣ်(၃)ဂၤဘၣ်ဒိအကျါ မိၫ်ဒၢ အဖိ(၁)ဂၤလၢဟၢဖၢပူၤ ဘၣ်သံ၀ဲန့ၣ်လီၤ.”
ပှၤဘၣ်ဒိဘၣ်ထံးအကျါ မိၫ်ဒၢလၢဒိးကူစါညါဘျါသးဖဲ၀့ၫ်မဲဆီးတၫ်ဆါဟံၣ်တဂၤတခီ တုၤလၢကတီၫ်အံၤ တသ့ၣ်နီၣ်ထီၣ်အသးဒံးဘၣ်အဂ့ၫ်ဒီးပှၤဘၣ်ဒိအဂၤခံဂၤလၢ ဒိးကူစါညါဘျါသးဖဲ၀့ၫ်ရၤမတံတၫ်ဆါဟံၣ်တခီ တၫ်ဘၣ်ယိၣ်တ အိၣ်ဘၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
လၢကတီၫ်အံၤ တၫ်သံတၫ်ပှၫ်တၫ်ဘၣ်ဒိဘၣ်ထံးတၫ်အိၣ်သးလီၤတံၫ်လီၤဆဲးတၫ်တသ့ၣ်ညါဒံးဘၣ်ဆၣ် ကိၣ်မ့သါကၠံန့ၣ် မ့ၫ်ပှၤပတီၫ်မုၫ်၀ံၤ တမ့ၫ်ပှၤဖီၣ်စုက၀ဲၤကရၢဖိဘၣ်အဂ့ၫ် ပှၤ၀့ၫ်ရၤမတံဖိတဖၣ်တဲ၀ဲလီၤ.
Ref: RFA
