လါယနူၤအါရံၤ (၃)သီ,၂၀၂၅နံၣ်
ဖဲလါယနူၤအါရံၤ(၁)သီအနံၤန့ၣ် ကရ့ၣ်နံၣ်ကမျၢၢ်တၢ်လဲၤထီၣ်လဲၤထီဂံၢ်ဘါကရူၢ်(PKPF)ထုးထီၣ်ပၥ်ဖျါ၀ဲလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဘူးထီၣ်(၄)နံၣ်အတီၢ်ပူၤကီၢ်ကရ့ၣ်နံၣ်ဒီးယိၤဒိၣ်ကီၢ်စဲၣ်ကလံၤထံးမိဘၠဲ,ပ့ၣ်လီလီၢ်က၀ီၤအပူၤ သုးကီၣ်ကးမၤ၀ဲကလံၤကျါတၢ်ဒုးအိၣ်ထီၣ်တု (၁၇၆၅)ဘျီအဂ့ၢ်န့ၣ်လီၤ.
သုးကီၣ်ကးမၤ၀ဲ ကလံၤကျါတၢ်ဒုးဖဲ၂၀၂၁နံၣ်န့ၣ် (၂)ဘျီ, ၂၀၂၂နံၣ်န့ၣ် (၁၈၂)ဘျီ, ၂၀၂၃နံၣ်န့ၣ် အဘျီ(၈၀၀)ဒီး ၂၀၂၄နံၣ်န့ၣ် မၤ၀ဲ (၇၈၁)ဘျီအဂ့ၢ် ပၥ်ဖျါဃၥ်၀ဲန့ၣ်လီၤ.
လါဒံၣ်စ့ဘၢၣ်(၃၁)သီ, ၂၀၂၄နံၣ်စ့ၢ်ကီး သုးကီၣ်ကးအသုး လဲၤတ့ၢ်လီၤမ့ၣ်ပိၢ် ဖဲလွဲၢ်ကီၢ် ကီၢ်ဆၣ်, မုၢ်နုၥ်တပၤ ကဆီလီၢ် ထံလီၢ်ကီၢ်ပူၤပှၤဘၣ်ကီဘၣ်ခဲဒဲက၀ဲၤအဃိ ဘၣ်သံ၀ဲ ဖိသၣ်လၢသးနံၣ်အိၣ်(၃)နံၣ်တဂၤပၥ်ဃုၥ် ကမျၢၢ်(၃)ဂၤအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ခီဖျိ သုးကီၣ်ကးမၤကလံၤကျါတၢ်ဒုးတဖၣ်, ခးလီၤကျိဖးဒိၣ်တဖၣ်, ဒြိဒုးယၤတဖၣ်ဒီး ဒွဲၣ်အူမၤဟးဂီၤကွံၥ်တၢ်တဖၣ်အဃိ ဘၣ်ဟးဂီၤကွံၥ်၀ဲ တၢ်ဘူၣ်တၢ်ဘါတၢ်သူၣ်ထီၣ်(၅၄)ဖျၢၣ်, တၢ်သိၣ်လိကၠိ(၂၆)ဖျၢၣ်, တၢ်ဆါဟံၣ်ဒီးတၢ်ဟ့ၣ်ကသံၣ်ဒၢး(၁၆)ဖျၢၣ် ဒီး ဟံၣ်ဃီ(၂၈၆၆)ဖျၢၣ်အဂ့ၢ် စံး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအတီၢ်ပူၤ ကီၢ်ကရ့ၣ်အပူၤ သုးကီၣ်ကးဒုးယၤတဖၣ်ဒီး ဖီၣ်န့ၢ်ဆူၣ်မၤသံမၤ၀ီတၢ်တဖၣ်အဃိ ဘၣ်သံ၀ဲလီၢ်က၀ီၤကမျၢၢ်(၅၃၆)အသိး စံၣ်သုးအဆၢကတီၢ် ဘၣ်သံ၀ဲ(၁၇၃)ဂၤအဂ့ၢ် PKPFပၥ်ဖျါဃၥ်၀ဲန့ၣ်လီၤ.
