လါဒံၣ်စ့ဘၢၣ်(၂၆)သီ,၂၀၂၄နံၣ်
အ့ၣ်ယၣ်၀တံၣ်ကီၢ်ခီ, ငပူးတီကီၢ်ဆၣ်, ဟဲကၠံကၠိ တၢ်သူၣ်တၢ်ဖျးလီၢ်တဖၣ်အပူၤ သုးကီၣ်ကးအသုး လဲၤနုၥ်လီၤသုးကျိၤအဃိ လီၢ်က၀ီၤကမျၢၢ်တဖၣ် ဘၣ်ဃ့ၢ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးဒိးန့ၢ်ဘၣ်တၢ်ကစီၣ်လၢ ရၢၢ်ခၢၣ်သုးမုၢ်ဒိၣ်(AA)ဟဲတုၤဆူ ဆူဟဲကၠံကၠိလၢအစဲဘူးလိၥ်သးဒီးရၢၢ်ခၢၣ်ကီၢ်စဲၣ်အပူၤအဃိ စးထီၣ်လၢ လါဒံၣ်စ့ဘၢၣ်(၂၃)သီအနံၤန့ၣ် သုးကီၣ်ကးအသုးလဲၤနုၥ်လီၤသုးကျိၤအဂ့ၢ် စံး၀ဲန့ၣ်လီၤ.
“သုးကီၣ်ကးသုးကျိၤ ဟဲနုၥ်လီၤတုၤလၢတၢ်ဖံးအီၣ်မၤအီၣ်လီၢ်ပူၤလီၤ. ဟဲနုၥ်လီၤလၢဃီထူၣ်ဂၢၢ်ပူၤ၀ံၤ ပၠ့းန့ၢ်၀ဲ AA ဒီး PDF တၢ်ပနီၣ်တဖၣ်ဒီး ဟဲတုၤဖဲအံၤဧါအဂ့ၢ် သံကွၢ်၀ဲဒီး ခးကျိနါစိၤအဃိ မတၤတဂၤမး ဖံးတၢ်မၤတၢ်တဘူၣ်လၢၤဘၣ်. ဘၣ်ဃ့ၢ်ပူၤဖျဲးသးလီၤအဂ့ၢ်” ဟဲကၠံကၠိလီၢ်က၀ီၤဖိတဂၤ စံး၀ဲန့ၣ်လီၤ.
သုးကီၣ်ကးအသုးလၢ အဂံၢ်အဘါအိၣ်(၅၀)ဃၣ်ဃၣ်အံၤ လဲၤနုၥ်လီၤသုးကျိၤဆူ ငပူးတီကီၢ်ဆၣ်, ၀့ၢ်ဟဲကၠံကၠိ, ကည့ၣ်ခၠီသ၀ီ, ကိတါသ၀ီ,ဆါကွ့သ၀ီ တၢ်ဖံးအီၣ်မၤအီၣ်လီၢ်တဖၣ်ပူၤအဂ့ၢ် စံး၀ဲန့ၣ်လီၤ.
“သုးကီၣ်ကးသုး ဟဲနုၥ်လီၤလၢကမျၢၢ်ဖံးအီၣ်မၤအီၣ်လီၢ်ကျဲတဖၣ်အပူၤဒီး ခးနါစိၤကျိန့ၣ်လီၤ. မတၤသါအိၣ်ကဘူၣ်လဲၣ်. ခး၀ဲဒၣ်လၢကျိဖးဒိၣ်တဖၣ်လီၤ. ဒိးန့ၢ်ဘၣ်တၢ်ကစီၣ်အကမၣ်ဒီးမၤ၀ဲန့ၣ်လီၤ. မ့ၢ်လဲၤသးဒ်အံၤန့ၣ် အ့ၣ်ယၣ်၀တံၣ်ကီၢ်ခီအပူၤ တၢ်ဒုးတဖၣ်ကကဲထီၣ်ဒိၣ်ဒိၣ်မုၢ်မုၢ်လီၤအဂီၢ် လီၤတံၢ်လံ”အဂ့ၢ် ဟဲကၠံကၠိလီၢ်က၀ီၤကမျၢၢ်လၢ အိၣ်ဘူးဒီးသုးကီၣ်ကးတဂၤ စံး၀ဲန့ၣ်လီၤ.
သုးကီၣ်ကးဟဲဆီလီၤဃၥ်အသုးဖဲ ငရူးကီ, ကီၣ်ရ့ၣ်ကၠံၣ်ပီၢ်လဲၣ်နံၤလၢ အိၣ်စဲဘူးလိၥ်သးဒီးရၢၢ်ခၢၣ်ကီၢ်စဲၣ်ပူၤအသိး ဟဲပၥ်လီၤခူသူၣ်ဃၥ်အသုးတဖၣ်စ့ၢ်ကီးအိၣ်၀ဲအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
Ref: DVB
