လါဒံၣ်စ့ဘၢၣ်(၂၄)သီ,၂၀၂၄နံၣ်
သုးကီၣ်ကးအသုးဒီးပၠူၣ်စီထံသုးပၥ်ဖှိၣ် သုးကျိၤတဖၣ် လဲၤနုၥ်လီၤသုးကျိၤဆူ မကွ့ကီၢ်ခီ, ပခိးကူၣ်ကီၢ်ဆၣ်, သ၀ီယဲၢ်ဖျၢၣ်ပူၤအဃိ စးထီၣ်လၢလါဒံၣ်စ့ဘၢၣ်(၁၃)သီအနံၤတုၤ(၂၃)သီအနံၤ, (၁၀)သီအတီၢ်ပူၤ သုးကီၣ်ကးသုးကျိၤတဖၣ် ဒွဲၣ်အူမၤဟးဂီၤကွံၥ် လီၢ်က၀ီၤကမျၢၢ်ဟံၣ်ဃီအဖျၢၣ်(၁၀၀)ဘျဲၣ်အဂ့ၢ် လီၢ်က၀ီၤဖိတဖၣ် တဲ၀ဲန့ၣ်လီၤ.
သုးကီၣ်အသုးဒွဲၣ်အူမၤဟးဂီၤကွံၥ် ယ့ၣ်လၣ်ကၠံသ၀ီပူၤ ဟံၣ်(၆၂)ဖျၢၣ်, ယွၣ်သၣ်အ့သ၀ီပူၤ (၂၁)ဖျၢၣ်, ၀ါကၠိတွ့သ၀ီပူၤ (၂၀)ဖျၢၣ် ယ့ၣ်မၠဲးသ၀ီပူၤ ဟံၣ်(၈)ဖျၢၣ်ဒီး ပၠ့းအဲၣ်သ၀ီပူၤဟံၣ်(၁)ဖျၢၣ်အဂ့ၢ် စံး၀ဲန့ၣ်လီၤ.
လါဒံၣ်စ့ဘၢၣ်(၁၁)သီအနံၤန့ၣ် တၢ်ပၢၢ်ဆၢသုးတဖၣ် လဲၤဒုး၀ဲ သုးကီၣ်ကးအစုတီၤဖီလၥ် ယ့ၣ်လၣ်လ့သ၀ီ ပၠူၣ်စီထံသုးကလၢၤ၀ံၤအလီၢ်ခံ သုးကီၣ်ကးအသုးက့ၤဒွဲၣ်အူမၤဟးဂီၤကွံၥ် သ၀ီလၢအိၣ်ဘူးဖဲန့ၣ်တဖၣ် အဂ့ၢ်လီၢ်က၀ီၤဖိတဖၣ် တဲ၀ဲန့ၣ်လီၤ.
“ပၠူၣ်စီထံသုးကလၢၤတဖၣ် ဘၣ်တၢ်ဒုးအီၤအဃိ အ၀ဲသ့ၣ်ဟးနုၥ်လီၤသုးကျိၤဒီးဒွဲၣ်အူမၤဟးဂီၤကွံၥ် ဟံၣ်ဃီတဖၣ်လီၤ. ခဲအံၤစ့ၢ်ကီး သုးကျိၤအဂံၢ်အဘါအါအါဂီၢ်ဂီၢ် ဟဲတုၤကဒီး၀ဲအဂ့ၢ် စံး၀ဲန့ၣ်လီၤ.”
ကတီၢ်ခဲအံၤန့ၣ် ပှၤလီၢ်က၀ီၤဖိတဖၣ် ဟဲက့ၤအိၣ်လၢဒူသ၀ီလၢ ဘၣ်တၢ်ဒွဲၣ်အူမၤဟးဂီၤကွံၥ်တဖၣ်အပူၤ အိၣ်၀ဲဘၣ်ဆၣ် ယ့ၣ်မၠဲးဒူသ၀ီဖိလၢအိၣ်ဘူးဒီး ပၠူၣ်စီထံပှၤဖီၣ်စုက၀ဲၤအိၣ်ဆီၤဃၥ်သ၀ီတခီ တဟဲက့ၤအိၣ်၀ဲဒံးဘၣ်ဒီး ဘၣ်ဃ့ၢ်ပူၤဖျဲးသးအဖၢမုၢ်ဒံးန့ၣ်အဂ့ၢ် အ၀ဲစံး၀ဲန့ၣ်လီၤ.
ပၠူၣ်စီထံပှၤဖီၣ်စုက၀ဲၤ ဆီလီၤဃၥ်သ၀ီတဖၣ်ဒ်အမ့ၢ် ညီၣ်ကၠ့းပ့ၣ်ဒီးအီၣ်သၣ်သ၀ီအပူၤ သုးကီၣ်ကးမၤပှဲၤအါထီၣ်အသုးအဂံၢ်အဘါတုၤ(၃၀၀)ဃၣ်ဃၣ်၀ံၤ ဂုၥ်ကျဲးစၢးန့ၢ်ပၢ၀ဲ ဟီၣ်က၀ီၤအဂ့ၢ် တၢ်ဒီသဒၢသုးတဖၣ် စံး၀ဲန့ၣ်လီၤ.
Data for Myanmar အလါနိၣ်၀့ဘၢၣ်(၁၀)သီအနံၤ, လံၥ်ဘိးဘၣ်ရၤလီၤအပူၤပၥ်ဖျါဃၥ်၀ဲလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအတီၢ်ပူၤ ထံကီၢ်ဒီတဘ့ၣ်အပူၤ သုးကီၣ်ကးဒွဲၣ်အူမၤဟးဂီၤကွံၥ် ကမျၢၢ်ဟံၣ်ဃီ(၁)ကလီၢ်ဘျဲၣ်((၁၀၅,၃၁၄)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
Ref: RFA
