ကၠီၣ်တဲၣ်ရဲၣ်ကျဲၤ၀ဲလၢ ကတြီဆၢ ကီၫ်ပယီၤကီၫ်ဆၢ တၫ်ဟၢဖၢလူတၫ်ဆါတၫ်ဘၣ်ကူဘၣ်ဂာ်အဂီၫ်

လါဒံၣ်စ့ဘၢၣ်(၂၃)သီ,၂၀၂၄နံၣ်

ကၠီၣ်တဲၣ်-ပယီၤကီၫ်ဆၢအပူၤ တၫ်ဟၢဖၢလူတၫ်ဆါအဃိ ပှၤဘၣ်သံ(၂)ဂၤ၀ံၤ တၫ်ဟၢဖၢလူတၫ်ဆါ တၫ်ဘၣ်ကူဘၣ်ဂာ် တြီဆၢ၀ဲကန့ၫ်အဂီၫ် ကၠီၣ်တဲၣ်ဆူၣ်ချ့၀ဲၤကျိၤ ရဲၣ်ကျဲၤ၀ဲအဂ့ၫ် Bangkok Post တၫ်ကစီၣ်သန့ပာ်ဖျါ၀ဲ ဖဲမဟါနံၤန့ၣ်လီၤ.

လၢတးကီၫ်ရ့ၣ်အပူၤ အိးထီၣ်ဃာ်၀ဲ ဂ့ၫ်ဂီၫ်အူဆူၣ်ချ့၀ဲၤကျိၤ(EOC)၀ံၤ ကီၫ်ဆၢအကပိာ်ကပၤလီၫ်က၀ီၤတဖၣ်, စဲးဖီကဟၣ်တၫ်မၤလီၫ်တဖၣ်ဒီးပှၤလီၫ်အိၣ်ကမှံဒဲက၀ီၤတဖၣ်အပူၤစ့ၫ်ကီး တၫ်ဆါကဟဲကဲထီၣ် တၫ်အိၣ်သးတဖၣ် အိၣ်ခိးကွၫ်၀ဲအဂ့ၫ် ၀ဲၤကျိၤပှၤဘၣ်မူဘၣ်ဒါတဂၤတဲ၀ဲလီၤ.

လၢရွှ့ၣ်ကိးကိာ် တၫ်ထံၣ်န့ၫ်၀ဲ ပှၤလၢတၫ်ဟၢဖၢလူတၫ်ဆါ ဘၣ်ကူဘၣ်ဂာ်အိၣ်၀ဲ(၂၀၀)ဂၤ၀ံၤ သံလၢမဲဆီး(၂)ဂၤအဂ့ၫ် တဲ၀ဲလီၤ.လၢတးကီၫ်ရ့ၣ်တခီ လၢကတီၫ်အံၤ ပှၤလၢတၫ်ဘၣ်ကူဘၣ်ဂာ်အီၤ အိၣ်ဒံးဒၣ်(၂)ဂၤလီၤအဂ့ၫ်ကွဲးဖျါ၀ဲလီၤ.

ကညီသုးခိးကီၫ်ဆၢ(BGF)လၢပၢဆှၢဃာ်၀့ၫ်ရွှ့ၣ်ကိးကိာ်တခီ လၢဂ့ၫ်ဂီၫ်အူ ထုးထီၣ်ဟ့ၣ်ပလီၫ်ဃာ်၀ဲ တၫ်ဟၢဖၢလူ တၫ်ဆါ တၫ်ဘၣ်ကူဘၣ်ဂာ်အဂ့ၫ် လီၫ်က၀ီၤတၫ်ကစီၣ်တဖၣ် ပာ်ဖျါ၀ဲလီၤ.

တးကီၫ်ရ့ၣ်အပူၤ, ၀့ၫ်မဲၫ်လမးဒီမဲဆီးတဖၣ်အပူၤ စဲးဖီကဟၣ်တၫ်မၤလီၫ်ဒီးခီကီၫ်ပှၤမၤတၫ်ဖိအိၣ်အါ၀ံၤ ကီၫ်ဆၣ် တဖၣ်အံၤအိၣ်ဘူးဒီး ၀့ၫ်ရွှ့ၣ်ကိးကိာ်အဃိ ဘၣ်ကူဘၣ်ဂာ်သ့အဂ့ၫ် တဲ၀ဲလီၤ.လၢကတီၫ်အံၤ လၢနံၣ်သီလါသီ တၫ်အိၣ်ကသုၣ်အကတီၫ် တၫ်ဒုးအီၣ်ဒုးအီၤတဖၣ်အိၣ်အဃိ တၫ်ဘၣ်ယိၣ်အိၣ်၀ဲအဂ့ၫ်တဲ၀ဲလီၤ.

တၫ်န့ၣ်အဃိ ထံအီဒီးနီၫ်တဂၤတၫ်ကဆှဲကဆှီပာ်ဃုာ် တၫ်အီၣ်တၫ်အီကျးဒီးပှၤလၢဆါလီၤန့ၫ်တၫ်တဖၣ် သမံသမိး၀ဲ တကးဘၣ် တၫ်ကကူစါယါဘျါကွၫ် တၫ်ဆါအဃာ် လၢအဆိအချ့အဂီၫ် ရဲၣ်ကျဲၤဃာ်၀ဲ ကသံၣ်ကသီတၫ်ဖိတၫ်လံၤ တဖၣ်အဂ့ၫ်တဲ၀ဲလီၤ.

လၢ၀့ၫ်ရွှ့ၣ်ကိးကိာ်ပူၤ ပှၤလၢတၫ်ဆါဘၣ်ကူဘၣ်ဂာ် အါတက့ၫ် မ့ၫ်တရူးတၫ်မၤကစၫ်တဖၣ်ဒီး ကီၫ်ပယီၤပှၤမၤတၫ်ဖိ တဖၣ်လီၤအဂ့ၫ်န့ၣ် ပှၤကၠီၣ်တဲၣ်ဖိလၢအိၣ်ဖဲကီၫ်ဆၢတဖၣ် တဲ၀ဲအဂ့ၫ် တၫ်ကစီၣ်ပူၤ ပာ်ဖျါ၀ဲလီၤ.

Ref: RFA