လါဒံၣ်စ့ဘၢၣ်(၂၀)သီ,၂၀၂၄နံၣ်
ဒ၀ဲၫ်ကီၫ်ဆၣ်, မုၫ်ထီၣ်ဟီၣ်က၀ီၤပူၤ ဖဲသုးကီၣ်ကး ဟဲထီၣ်သုးကျိၤဒီးဂံၫ်ဘါအါအါဂီၫ်ဂီၫ်အကတီၫ် KNU-ကညီဒီကလုာ်စၢဖှိၣ်ကရၢ,သုးက့နီၫ်ဂံၫ်(၄),ကညီဒီကလုာ်တၫ်ထူၣ်ဖျဲးသုးမုၫ်ဒိၣ်KNLAဒီးကီၫ်သူလ့ၤသုးမုၫ်ဒိၣ်(KTLA)တဖၣ်အဘၢၣ်စၢၤ တၫ်ဒုးကဲထီၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ခံကပၤသုးတဖၣ် တၫ်ဒုးကဲထီၣ်၀ဲဖဲဟ့ၣ်ဒါသ၀ီဒီးဟ့ၣ်ဒါပၠ့ၣ်သ၀ီအဘၢၣ်စၢၤ ယ့ၣ်ပူၣ်၀းသ၀ီအကပိာ်ကပၤ၀ံၤ ခးလိာ် သးဒီးကျိဖးဒိၣ်ဒီးကျိဖိတဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
KNU,သုးက့နီၫ်ဂံၫ်(၄),ဘျံးဒ၀ဲၫ်ကီၫ်ရ့ၣ် အနဲၣ်ရွဲၣ် ပဒိၣ်စီၤအဲၣ်နၤတဲ၀ဲလၢ”လၢတဂီၤအံၤတၫ်ဒုးကဲထီၣ်၀ဲလီၤ .တၫ်ကဲ ထီၣ်အသးအံၤ မ့ၫ်တၫ်ဂ့ၫ်လၢပိာ်ထွဲထီၣ်အခံတဖၣ်လီၤ.KTLAန့ၣ် ခးသံကွံာ်ပသုးဒ့ခိၣ်ခံတဂၤ၀ံၤအလီၫ်ခံ အ၀ဲသ့ၣ် မၤအါထီၣ်ဂံၫ်ဘါဖဲတၫ်လီၫ်ဖဲန့ၣ်လီၤ.ပသုးဖိတဖၣ်စ့ၫ်ကီး လၢအ၀ဲသ့ၣ်အတၫ်ကူၣ်မၤသံအဖီခိၣ် ပထီၣ်မၤပျီကွံာ် ဟီၣ်က၀ီၤအိၣ်၀ဲ”န့ၣ်လီၤ.
ဖဲလါဒံၣ်စ့ဘၢၣ်(၄)သီနံၤ KNU,သုးက့နီၫ်ဂံၫ်(၄),KNLAသုးရ့ၣ်(၁၂),သုးဒ့(၄),အသုးဒ့ခိၣ်ခံ စီၤဖါကၠိန့ၣ် ကီၫ်သူလ့ၤ သုးမုၫ်ဒိၣ်,ဆၣ်ကဆီသုးတြိၤ,သုးရ့ၣ်(၃) ဘိၣ်ဒါက့ၣ်ဒီးအစုတီၤဖီလာ်သုးတဖၣ် ခးသံကွံာ်အီၤန့ၣ်လီၤ.
တၫ်ကဲထီၣ်အသးအံၤ၀ံၤအလီၫ်ခံ ဒ၀ဲၫ်ကီၫ်ဆၣ်,မုၫ်ထီၣ်ဟီၣ်က၀ီၤပူၤ သုးက့နီၫ်ဂံၫ်(၄)အသုးဒီးKTLA-ကီၫ်သူလ့ၤသုးမုၫ်ဒိၣ်အဘၢၣ်စၢၤ ခံကပၤတၫ်ဖ့ၣ်ဆၢဆူၣ်ထီၣ်၀ဲအဂ့ၫ် လီၫ်က၀ီၤဖိဒီးတၫ်ပၢၫ်ဆၢသုးဖိတဖၣ်တဲ၀ဲလီၤ.
တၫ်ဒုးကဲထီၣ်၀ံၤအလီၫ်ခံ, ဖဲတၫ်ဒုးကဲထီၣ်အလီၫ်အကပၤ ဖဲဖိလမဲန့ၣ် ပှၤဃုစၢၫ်ထးခဲလၢာ် ကီၫ်သူလ့ၤသုးမုၫ်ဒိၣ် တဟ့ၣ်တၫ်ပျဲလၢကမၤကဒီး၀ဲလၢၤဘၣ်ဒီးမၢက့ၤ၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ကီၫ်သူလ့ၤသုးမုၫ်ဒိၣ်န့ၣ် ဖဲအပူၤကွံာ်၂၀၂၂နံၣ်အပူၤ KNDOသုးရိၣ်မဲခိၣ်ကျၢၫ်လီၫ်လံၤ သုးခိၣ်ကျၢၫ်ဖိစီၤနၢၤဒါမၠးန့ၣ် ဟးထီၣ်ကွံာ် လၢကညီဒီကလုာ်စၢဖှိၣ်ကရၢ(KNU)တၫ်တီခိၣ်ရိၣ်မဲအဖီလာ်၀ံၤ ကရၢကရိဒုးအိၣ်ထီၣ်၀ဲန့ၣ်လီၤ.
လၢဒ၀ဲၫ်ကီၫ်ရ့ၣ်ပူၤတခီ ဘိၣ်အဲၣ်ခွံ(ကီၤလၤဖိ)တီခိၣ်ရိၣ်မဲသုးဖိတဖၣ်ဒီး KNLA သုးက့နီၫ်ဂံၫ်(၄)သုးတဖၣ်အဘၢၣ်စၢၤ ဖဲအပူၤကွံာ်နံၣ်န့ၣ် ခံကပၤတၫ်ခးလိာ်သးအိၣ်ထီၣ်၀ဲဒီး ခံကပၤလၢာ် ခိၣ်နၫ်ဒီးသုးဖိတဖၣ် ဘၣ်သံဒီးဘၣ်ဒိဘၣ်ထံး အိၣ်၀ဲလီၤ.
သုးကီၣ်ကးအသုးစ့ၫ်ကီး ဖဲလါဒံၣ်စ့ဘၢၣ်(၁၉)သီနံၤ ဂီၤအကတီၫ်န့ၣ် အိၣ်လၢပကၣ်ရံၣ်သ၀ီဒီး ဆှထီၣ်အသုးဖိဂံၫ်ဘါ (၃၀၀)ဂၤဃၣ်ဃၣ်ဒီးနီၤဖးလီၤသုးကျိၤခံကျိၤ ဟဲထီၣ်၀ဲ ဖဲကညီဖီၣ်စုက၀ဲၤကဒဲကဒဲခးလိာ်သး တၫ်လီၫ်အဂ့ၫ် လီၫ်က ၀ီၤဖိတဖၣ် တဲ၀ဲလီၤ.
ဒ၀ဲၫ်ကီၫ်ဆၣ်,မုၫ်ထီၣ်ဟီၣ်က၀ီၤန့ၣ် ကီၫ်သူလ့ၤသုးမုၫ်ဒိၣ်,ကညီတၫ်ထူၣ်ဖျဲးသုးမုၫ်ဒိၣ်တကးဘၣ် မ့ၫ်ဟီၣ်က၀ီၤတခါ လၢ NUGအစုတီၤဖီလာ် ကမျၢၫ်တၫ်ဒီသဒၢသုး,ပကဖ သုးတဖၣ်ဒီးLocal PDFသုးဖိတဖၣ် ဟူးဂဲၤဆီလီၤသး အလီၫ်န့ၣ်လီၤ.
Ref: The Tanintharyi Times
