ကလံၤထံးကီၫ်ခီသုး၀ဲၤလီၫ်ခိၣ်သ့ၣ် ဘၣ်တၫ်ဒုးအီၤဒီးမျိာ်သၣ်ယူၤတဖၣ်

လါဒံၣ်စ့ဘၢၣ်(၁၃)သီ,၂၀၂၄နံၣ်

Brave Warriors for Myanmar (BWM) ကရၢ တဲ၀ဲလၢ ဖဲလါဒံၣ်စ့ဘၢၣ်(၁၁)သီအနံၤ,မုၫ်နၤခီအကတီၫ်န့ၣ် လဲၤဒုး၀ဲ ကလံၤထံးကီၫ်ခီသုး၀ဲၤလီၫ်ခိၣ်သ့ၣ်ဒီးတီအူကလံၤသုးကလၢၤတဖၣ်လၢ အိၣ်ဆီလီၤအသးဖဲ ပကိကီၫ်ခီ, ကီၫ်ဆၣ် တီအူအပူၤလၢ(၁၀၇)မမ မျိာ်သၣ်ယူၤတဖၣ်န့ၣ်လီၤ.

သုးကီၣ်ကးသူအါထီၣ်ကလံၤကျါဒုးယၤဒီးလၢပကိကီၫ်ခီဒီးကညီကီၫ်စဲၣ်ကလံၤစိးတကပၤ လၢသုးကီၣ်ကး ဒုးယၤဂ့ၫ်၀ီအပူၤ ကလံၤထံးကီၫ်ခီသုး၀ဲၤလီၫ်ခိၣ်သ့ၣ်ဒီးတီအူကလံၤသုးကလၢၤတဖၣ် အံၤမ့ၫ်တၫ်ပၢဆှၢရဲၣ်ကျဲၤဒီးဟ့ၣ်လီၤ တၫ်ကလုၫ်အလီၫ် ဒီးမ့ၫ်တၫ်လီၫ်အရ့ဒိၣ်အဃိ ပညိၣ်ဒုး၀ဲဒ်သိးအံၤအဂ့ၫ် BWMကရၢ ဘၣ်မူဘၣ်ဒါတဂၤတဲ၀ဲလီၤ.

“ပခးအ၀ဲသ့ၣ်ဖဲမုၫ်နၤခီ(၁၁)နၣ်ရံၣ်လီၤ.လၢအ၀ဲသ့ၣ်တကပၤစ့ၫ်ကီးခးဆၢက့ၤတၫ်ဒီးကျိဖးဒိၣ်လီၤ.ဘၣ်ဆၣ်သနာ်က့ ပပှၤသုးဖိတဖၣ် ဟဲက့ၤဂုၤက့ၤအခံလၢပသုးကလၢၤ န့ၫ်က့ၤလၢတၫ်ပူၤဖျဲးအပူၤလီၤ.တၫ်ဘၣ်ဒိဘၣ်ထံးဒု ဃုသ့ၣ်ညါ အဖၢမုၫ်လီၤ.အခဲအံၤပဒုးအီၤန့ၣ်တၫ်လီၫ်ခံတီၤလီၤ.တီအူကလံၤသုးဒီးကလံၤထံးကီၫ်ခီသုး၀ဲၤလီၫ်ခိၣ်သ့ၣ်တဖၣ် ပဒုးအီၤတကတီၫ်ဃီလီၤ.”

ဖဲအပူၤကွံာ် လါအီးကထိဘၢၣ်(၂၀)သီအနံၤစ့ၫ်ကီး တီအူကလံၤသုးကလၢၤန့ၣ် Brave Warriors for Myanmar (BWM)ကရၢ လဲၤဒုးအီၤဒီးမျိာ်သၣ်ယူၤဒံးန့ၣ်လီၤ.