လါဒံၣ်စ့ဘၢၣ်(၁၃)သီ,၂၀၂၄နံၣ်
ရၢၢ်ခၢၣ်ကီၢ်စဲၣ်အပူၤ ရၢၢ်ခၢၣ်သုးမုၢ်ဒိၣ်(AA)ထီၣ်ဒုးမၤန့ၢ်၀ဲ သုးကီၣ်ကးသုးခိးကီၢ်ဆၢသုးကလၢၤအဂ့ၢ် (AA)ဘိးဘၣ်ရၤလီၤ၀ဲ၀ံၤအလီၢ်ခံ ကီၢ်ဘ့ကလါဒ့း မၤအါထီၣ်သုးတၢ်ဘံၣ်တၢ်ဘၢဖဲ ကီၢ်ပယီၤကီၢ်ဆၢအဂ့ၢ် ဘ့ကလါဒ့း ပှၤဘၣ်မူဘၣ်ဒါတဖၣ် တဲလီၤ၀ဲအဂ့ၢ် Arab Newsပၥ်ဖျါဃၥ်၀ဲန့ၣ်လီၤ.
(AA) ထီၣ်ဒုးမၤန့ၢ် သုးကီၣ်ကးသုခိးကီၢ်ဆၢသုးကလၢၤလၢအိၣ်ဖဲ ရၢၢ်ခၢၣ်ကီၢ်စဲၣ်ကလံၤစိး, မီၣ်တီ၀့ၢ်အကပၤ၀ံၤအလီၢ်ခံ (AA)ပၢဆှၢန့ၢ်၀ဲ ပယီၤ-ဘ့ကလါဒ့းကီၢ်ဆၢဒီတကျိၤလၢအထီၣ်အိၣ် ကံၣ်လိၣ်မံၣ်ထၢၣ်(၂၇၀)လံအဂ့ၢ် ပၥ်ဖျါဃၥ်၀ဲန့ၣ်လီၤ.
အပူၤကွံၥ် (၂)နံၣ်လံၤလံၤန့ၣ် (AA)စးထီၣ်ပၢဆှၢ၀ဲ လီၢ်က၀ီၤတဖၣ်လၢ အိၣ်ဖဲပယီၤ-ဘ့ကလါဒ့းကီၢ်ဆၢအပူၤဒီး အခဲအံၤန့ၣ် ပၢဆှၢန့ၢ်၀ဲ ကီၢ်ဆၢဒီတကျိၤလံအဂ့ၢ် တကနဲးကီၢ်ရ့ၣ်လၢအိၣ်ဘူးလိၥ်သးဒီး၀့ၢ်မီၣ်တီ ကီၣ်ဘ့ကလါဒ့း သုးခိးကီၢ်ဆၢ ပှၤဘၣ်မူဘၣ်ဒါတဂၤ တဲ၀ဲန့ၣ်လီၤ.
(AA) မ့ၢ်တၢ်ကရၢကရိတဖုလၢ ကီၢ်ဘ့ကလါဒ့း တပၥ်ပနီၣ်ဃၥ်၀ဲလၢ အဖိးသဲစးဒံးဘၣ်အဃိ တရ့လိၥ်ဘၣ်ထွဲဒီး(AA)လိၤလိၤဒံးဘၣ်အဂ့ၢ်, ကီၢ်ဆၢဒီတကျိၤ တၢ်ဟဲနုၥ်လီၤခူသူၣ်သုတအိၣ်တဂ့ၤအဂီၢ် အိၣ်ခိးကွၢ်သမံသမိး၀ဲအဂ့ၢ် ဒီး မၤအါထီၣ်၀ဲတၢ်ဘံၣ်တၢ်ဘၢတဖၣ်အဂ့ၢ် အ၀ဲတဲ၀ဲန့ၣ်လီၤ.
တၢ်နၢ်ဟူဘၣ်၀ဲ တၢ်ခးကျိပိၢ်အကလုၢ်တဖၣ်လၢ ကီၢ်ပယီၤတပၤအဂ့ၢ်, တၢ်သဘံၣ်သဘုၣ်တဖၣ်လၢ ကီၢ်ပယီၤတပၤ သုတဟဲနုၥ်လီၤဆူ ကီၢ်ဘ့ကလါဒ့းဟီၣ်က၀ီၤအပူၤတဂ့ၤအဂီၢ် အိၣ်ကတီၤဆိပၥ်၀ဲ ထံသုး, သုးခိးပီၢ်လဲၣ်နံၤဒီး ပၢၤကီၢ်သုးတဖၣ်အဂ့ၢ် ပှၤဘၣ်မူဘၣ်ဒါ စံး၀ဲအဂ့ၢ် ပၥ်ဖျါဃၥ်၀ဲန့ၣ်လီၤ.
Ref: RFA
