လါနိၣ်၀့ဘၢၣ်(၁၅)သီ,၂၀၂၄နံၣ်
လၢတၫ်ကကဲသုးအအဂီၫ် အ့ၣ်ကၠ့ၣ်စံၣ်တဖၣ်လၢ ကိးက့ၤကီၫ်ချၢပှၤမၤတၫ်ဖိတန့ၫ်တဖၣ် တၫ်ဟံးန့ၫ်အီၤဂ့ၫ်၀ီ တုၤလၢ တၫ်ကးတံာ်ကွံာ် အတၫ်ဖံးတၫ်မၤလဲၣ်စ့ၣ်သ့အဂ့ၫ် ပှၤမၤတၫ်ဖိကိတိာ်၀ဲၤကျိၤန့ၣ် ဟ့ၣ်ဒုးသ့ၣ်ညါ ဆှၢဃာ်လံာ်ဆူ အ့ၣ်ကၠ့ၣ်စံၣ်တဖၣ်အိၣ်န့ၣ်လီၤ.
လၢ ၂၀၂၄နံၣ်,လါမ့ၤ(၁၄)သီအနံၤ လံာ်တၫ်နဲၣ်လီၤလၢ ထုးထီၣ်ဃာ်၀ဲအံၤ ပှၤမၤတၫ်ဖိကိတိာ်၀ဲၤကျိၤန့ၣ် ဆှၢဃာ်၀ဲဆူ အ့ၣ်ကၠ့ၣ်စံၣ်ခဲလၢာ်အအိၣ် လၢဖိးသဲစးအပူၤအဂ့ၫ် တၫ်သ့ၣ်ညါဘၣ်လီၤ.
တၫ်အိၣ်သးဒ်သိးအံၤအဃိ အ့ၣ်ကၠ့ၣ်စံၣ်လၢဆှၢပှၤမၤတၫ်ဖိဆူကီၫ်ချၢတဖၣ် ကဲထီၣ်တၫ်ကီတၫ်ခဲလၢအ၀ဲသ့ၣ်အဂီၫ်၀ံၤ တနီၤန့ၣ် တတူၫ်လိာ်ပှၤမၤတၫ်ဖိတဖၣ်လၢာ်ဘၣ်ဒီးမၤလီၤစှၤပှၤမၤတၫ်ဖိအနီၫ်ဂံၫ်နီၫ်ဒွးအိၣ်အဂ့ၫ် ကီၫ်ချၢတၫ်ဃုဖံးဃုမၤ တၫ်မၤကစၫ်တဖၣ် တဲ၀ဲလီၤ.
“တၫ်အံၤလၢပဂီၫ် မ့ၫ်တၫ်ဆီၣ်သနံးဖးဒိၣ်တခါလီၤ.တၫ်ဆှၢလီၤကျိာ်စ့ဆူ ဟံၣ်ဖိဃီဖိအိၣ်တၫ်ဂ့ၫ်ဒၣ်လဲၣ် ကရၢကရိ ၀ဲတန့ၫ်ဘၣ်,အခဲအံၤ တၫ်ဘၣ်ကိးက့ၤန့ၫ်အီၤပှၤကညီဒု ပှၤလၢတအဲၣ်ဒိးဟဲက့ၤတဖၣ် တၫ်ကကိးဆူၣ်အီၤအဂီၫ်တခီ ကီခဲ၀ဲလီၤ.ပကမၤဒ်လဲၣ်.တမ့ၫ်ပမူပဒါဘၣ်ဒီး မၢဟံးန့ၫ်မူဒါဒ်သိးအံၤတခီ တမ့ၫ်ကကဲထီၣ်လိၣ်ထီၣ်ဘၣ်. ပတၫ်ကီတၫ် ခဲတဖၣ် ပတီၣ်ဖျါထီၣ်ဆူ ပှၤဘၣ်မူဘၣ်ဒါလၢဘၣ်ထွဲတဖၣ်အိၣ်ဘၣ်ဆၣ် တၫ်အိၣ်သးန့ၣ်တလီၤဆီဘၣ်. တၫ်ဘျၢသဲ စးအံၤ အက့ၫ်အဂီၤအိၣ်ဒ်သိးဒီးတၫ်တိာ်ကျဲၤတခါအဃိ တမ့ၫ်ကကဲထီၣ်ဘၣ်အဂ့ၫ်” ကီၫ်ချၢတၫ်ဃုဖံးဃုမၤ တၫ်မၤက စၫ်တဂၤ တဲ၀ဲလီၤ.
ကီၫ်ပယီၤပှၤမၤတၫ်ဖိတဖၣ်လၢ ကလဲၤဖံးလဲၤမၤဆူထံဂုၤကီၫ်ဂၤတဖၣ် တချူးဟးထီၣ်ကီၫ်ချၢဒံးဘၣ်အကတီၫ်န့ၣ် ဘၣ်မၤလံာ်တၫ်အၢၣ်လီၤဒီးအ့ၣ်ကၠ့ၣ်စံၣ်တဖၣ်လၢ လါလဲလၢဒိးန့ၫ်၀ဲလၢကီၫ်ချၢ(၂၅)မၠးကယၤန့ၣ် လၢဖိးသဲစး တၫ်ပာ် ပနီၣ်ဃာ်စ့တၢးတဆီ တၫ်ကဆှၢက့ၤဆူကီၫ်ပူၤအဂီၫ်,တၫ်ကဟ့ၣ်ခိသွဲအဂီၫ်,(၃)နံၣ်မ့ၫ်ပှဲၤထီၣ်န့ၣ် တၫ်ကကဲသုးအဂီၫ် တၫ်ကဘၣ်ဟဲက့ၤဆူ ကီၫ်ပယီၤ တၫ်ဂ့ၫ်တဖၣ် ဖၢနုာ်ဃာ်၀ဲအဂ့ၫ် တၫ်သ့ၣ်ညါဘၣ်လီၤ.
ကီၫ်ပယီၤပှၤမၤတၫ်ဖိလၢလဲၤတုၤဆူကီၫ်ချၢတဖၣ် (၃)နံၣ်မ့ၫ်ပှဲၤထီၣ် လၢတၫ်ကဘၣ်ကဲသုးအဂီၫ် မ့ၫ်တဟဲက့ၤဘၣ်န့ၣ် အ့ၣ်ကၠ့ၣ်စံၣ်လၢ ဆှၢပှၤမၤတၫ်ဖိ၀ဲန့ၣ် ကဘၣ်ဟံးန့ၫ်မူဒါ၀ံၤ ပှၤမၤတၫ်ဖိလၢမၤတၫ်(၃)နံၣ်ပှဲၤတဖၣ် တၫ်ကဟဲက့ၤဆူ ထံကီၫ် ကဲသုးအဂီၫ် ကိး၀ဲမ့ၫ်တန့ၫ်န့ၣ် ကဃ့အီၣ်လိး၀ဲစ့,ပတုာ်ကွံာ် တၫ်ကိးပှၤမၤတၫ်ဖိလံာ်အသီသ့, ကးတံာ်ကွံာ် အ့ၣ်ကၠ့ၣ်စံၣ်လဲၣ်စ့ၣ်သ့ဒီးဖၢနုာ်၀ဲဆူ မံၤဟးဂီၤစရီပူၤသ့၀ံၤ ကဟံးန့ၫ်၀ဲဂ့ၫ်၀ီတဆီဘၣ်တဆီအဂ့ၫ် တၫ်သ့ၣ်ညါဘၣ် လီၤ.
“တၫ်ကကဲသုးအဂီၫ် ဖဲလံာ်ဟဲတုၤလၢဟံၣ်အကတီၫ် ပှၤမ့ၫ်တအိၣ်န့ၣ်ဒီး လံာ်တၫ်အၢၣ်လီၤမ့ၫ်ပှဲၤထီၣ်န့ၣ် အ့ၣ်ကၠ့ၣ်စံၣ် တဖၣ်ကဘၣ်ကိးက့ၤန့ၫ်၀ဲလီၤ.တၫ်ဂ့ၫ်လၢကဲထီၣ်သးတသ့တဖၣ် မၢဟံးန့ၫ်မူဒါလီၤ.လၢမၢတၫ်ဆှၢလီၤ(၂၅)မၠးကယၤ တၫ်ဂ့ၫ်လံၤလံၤ ပ၀ဲအ့ၣ်ကၠ့ၣ်စံၣ်တဖၣ် ကဲထီၣ်တၫ်ကီတၫ်ခဲလီၤ.မ့ၫ်မၤ၀ဲဒ်သိးအံၤဒု အိၣ်တ့ၫ်ဒၣ်လၢ ဘၣ်ကးတံာ်ကွံာ် တၫ်မၤလီၤအဂ့ၫ် “ တၫ်မၤကစၫ်လၢအသီတဂၤတဲ၀ဲလီၤ.
ကတီၫ်အံၤ လၢတၫ်ပျၫ်လီၤကီၫ်ချၢပှၤမၤတၫ်ဖိတဖၣ်အပူၤ သးနံၣ်(၂၂)နံၣ်တုၤ(၃၂)နံၣ်အဘၢၣ်စၢၤ ပိာ်ခွါတဖၣ် တၫ်ကိး၀ဲအခွဲးတအိၣ်ဘၣ်အဃိ ကဲထီၣ်ပှၤမၤတၫ်ဖိကၤအဂ့ၫ် အ၀ဲတဲ၀ဲလီၤ.
“(၃၂)နံၣ်မ့ၫ်ပှဲၤထီၣ်န့ၣ် ဟးထီၣ်လၢကီၣ်ချၢတန့ၫ်လၢၤဘၣ်. ယံာ်ထီၣ်ဒီးပှၤမၤတၫ်ဖိကၤထီၣ်လီၤ. ပှၤမၤတၫ်ဖိလၢ ကလဲၤလၢဖိးသဲစးတဖၣ် တမ့ၫ်လၢကအိၣ်လၢၤဘၣ်ဒီးလၢတဖိးသဲစးအကျဲတဖၣ် တၫ်မၤကကဲထီၣ်လီၤ. အဃိ ဘၣ်ဒိ၀ဲပတၫ်မၤလီၤ.လၢတၫ်ကီတၫ်ခဲဒ်သိးအံၤအကျါ (၂၅)မၠးကယၤတခီခီ,လၢခံတခါ တၫ်ဘၣ်က့ၤကိးန့ၫ်အီၤ ပှၤလၢကဘၣ်ကဲသုးတဖၣ်အဃိ ကဲထီၣ်တၫ်ကီတၫ်ခဲအဂ့ၫ် ကီၫ်ချၢတၫ်ဃုဖံးဃုမၤတၫ်မၤကစၫ်တဖၣ် တဲ၀ဲလီၤ.
လၢကတီၫ်အံၤ အ့ၣ်ကၠ့ၣ်ဟံၣ်တဖၣ်တကပၤ ကီၫ်ချၢပှၤမၤတၫ်ဖိအစ့ဟဲနုာ် (၂၅)မၠးကယၤ တၫ်ဆှၢလီၤစ့စရီတဖၣ် စ့ၫ်ကီး ဟံးန့ၫ်ဃာ်မူဒါ၀ံၤ လၢတၫ်ပာ်ပနီၣ်မုၫ်နံၤမုၫ်သီအပူၤ တၫ်ပာ်ဖျါထီၣ်စရီမ့ၫ်တန့ၫ်ဘၣ်န့ၣ် ပှၤမၤတၫ်ဖိကိတိာ်၀ဲၤ ကျိၤ ဟံးန့ၫ်အီၤဂ့ၫ်၀ီတဆီဘၣ်တဆီသ့၀ဲန့ၣ်လီၤ.
ကီၫ်ပယီၤပူၤ ကီၫ်ချၢတၫ်ဃုဖံးဃုမၤ အ့ၣ်ကၠ့ၣ်စံၣ်ခဲလၢာ်ပာ်ဖှိၣ် အိၣ်(၅၀၀)ဘျဲၣ်၀ံၤ လၢအကျါ အ့ၣ်ကၠ့ၣ်စံၣ် (၃၀၀) ဃၣ်ဃၣ် ဆှၢထီၣ်၀ဲကျိာ်စ့စရီတၫ်ဂ့ၫ်တၫ်ကျိၤတန့ၫ်ဒံးဘၣ်အဂ့ၫ် ပှၤမၤတၫ်ဖိကိတိာ်၀ဲၤကျိၤ ဘိးဘၣ်ရၤလီၤ၀ဲ ဖဲ လါနိၣ်၀့ဘၢၣ်အံၤအပူၤန့ၣ်လီၤ.
Ref:VOM
