လါအီးကထိဘၢၣ်(၂၅)သီ,၂၀၂၄နံၣ်
ကီၫ်တူၤရကံၫ်,၀့ၫ်ခိၣ် အၣ်ကၣ်ရၣ်အကပၤ မူကပိာ်ကလံၤကျါခီပနံၣ်တခါ အ၀ဲၤလီၫ်ခိၣ်သ့ၣ် တၫ်ဒုးခးတၫ်အပူၤ ပှၤဘၣ်သံ(၅)ဂၤ၀ံၤ ဘၣ်ဒိဘၣ်ထံး(၂၂)ဂၤအဂ့ၫ် ပှၤဘၣ်မူဘၣ်ဒါတဖၣ်တဲ၀ဲလီၤ.
ပှၤဟဲခးတၫ်အကျါ ပိာ်ခွါ(၁)ဂၤဒီးပိာ်မုၣ်တဂၤဘၣ်သံ၀ံၤ တၫ်အံၤမ့ၫ် ကးပှၤပူထီၣ်တၫ်ဖိကရၢ ပံၣ်က့ၣ်က့ၣ် အတၫ်မၤသ့အဂ့ၫ် တူၤရကံၫ်ထံလီၫ်ကီၫ်ပူၤကိတိာ် အလံၣ်ယၣ်လံၣ်ကၣ်ရၣ် တဲ၀ဲလီၤ.
တၫ်ဒုးတဘျီအံၤ ကဲထီၣ်အသး ဖဲ၀့ၫ်ခိၣ်အၣ်ကၣ်ရၣ်အချၢ စီၤစုၤယံၤ ကံၣ်လိၣ်မံထၢၣ်(၄၀)ဒီး တူၤရကံၫ်မူကပိာ်ဒီး ကလံၤကျါခီပနံၣ် ထံၣ်အ့ၣ်အဲၣ် တြဲၤနုာ်လီၤအကပၤ၀ံၤ ပှၤဖီၣ်စုက၀ဲၤတစှၤန့ၫ်(၂)ဂၤ ဒုးခးတၫ်န့ၣ်လီၤ.
ပှၤဘၣ်သံ(၄)ဂၤန့ၣ် မ့ၫ်ကလံၤကျါခီပနံၣ် ပှၤမၤတၫ်ဖိတဖၣ်၀ံၤ (၅)ဂၤတဂၤန့ၣ် မ့ၫ်ပှၤနီသိလ့ၣ်ဖိအဂ့ၫ် တူၤရကံၫ် ပဒိၣ်ဘၣ်မူဘၣ်ဒါတဲ၀ဲလီၤ.တၫ်ဒုးအပူၤ ပှၤဘၣ်ဒိဘၣ်ထံး(၂၂)ဂၤအကျါ တူၤရကံၫ် သုးလီၤဆီ ပာ်ဃုာ်(၇)ဂၤအဂ့ၫ် တဲ၀ဲလီၤ.
တၫ်ဒုးတဘျီအံၤ ဖီၣ်ပျံၤမၤ၀ဲအဂ့ၫ် လၢကတီၫ်အံၤ ကရၢနီတဖု တထုးထီၣ်ပာ်ဖျါ၀ဲဒံးဘၣ်.လၢကတီၫ်အံၤ လၢအံၣ်ရး ကလံၤစိးဒီးဆံရံယါကလံၤစိးအပူၤ တၫ်ဒုး၀ဲ ကးပှၤပူထီၣ်တၫ်ဖိအတၫ်ခးပနီၣ်လီၫ်တဖၣ် လၢကလံၤကျါအဂ့ၫ် တူၤရကံၫ်တၫ်ဒီသဒၢကိတိာ်၀ဲၤကျိၤ ထုးထီၣ်ပာ်ဖျါဃာ်၀ဲလီၤ.
ဖံၣ်က့ၣ်က့ၣ်ကရၢန့ၣ် တူၤရကံၫ်,အမဲရကၤ,အဲကလံးထံကီၫ်တဖၣ် ပာ်ပနီၣ်၀ဲဒ်ကရၢလၢမၤအၢအမၤသီတၫ်လီၤ. မ့မ့ၫ်ဖံၣ်က့ၣ်က့ၣ်တခီ တဲ၀ဲလၢကးကလုာ်ဒူၣ်ဆံးအတၫ်ခွဲးတၫ်ယာ်အဂီၫ်၀ံၤ စးထီၣ်လၢ ၁၉၈၀နံၣ်လံၤလံၤန့ၣ် မ့ၫ်ကရၢတဖုလၢ ဒုးထီဒါ၀ဲ တူၤရကံၫ်ပဒိၣ်န့ၣ်လီၤ.
