လါအီးကထိဘၢၣ်(၂၅)သီ,၂၀၂၄နံၣ်
တၢ်ဒုးတဖၣ်ဒီး သုးကီၣ်ကးအဒွဲၣ်မၤဟးဂီၤကွံၥ် ဟံၣ်ဃီတဖၣ်အဃိ စကဲကီၢ်ခီ, ကလ့ကီၢ်ဆၣ် ပှၤစံၣ်သုးပှၤလီၢ်အိၣ်ကမှံဖိ(၃၀,၀၀၀၀)ဘျဲၣ်လၢလဲၤအိၣ်ကဒု၀ဲဖဲပှၤဃ့ၢ်သုးထံလီၢ်ကီၢ်ပူၤပှၤဘၣ်ကီဘၣ်ခဲဒဲက၀ီၤပူၤတဖၣ်တၢ်ဆီၣ်ထွဲမၤစၢၤဟဲစှၤလီၤအဃိကအီၣ်ဘၣ်အီဘၣ်အဃိကီခဲ၀ဲ၀ံၤလိၣ်ဘၣ်၀ဲကသံၣ်ကသီတၢ်မၤစၢၤတဖၣ်အဂ့ၢ် ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ် တဃံးတစ့ၢ်ထဲသိး သုးကီၣ်ကးစးထီၣ်ဒွဲၣ်အူမၤဟးဂီၤကွံၥ် ဟံၣ်ဃီတဖၣ်အဆၢကတီၢ်ဘၣ်ဆၣ် ကတီၢ်ခဲအံၤ တၢ်ဆီၣ်ထွဲမၤစၢၤတဖၣ်တအိၣ်လၢၤဘၣ်အဃိ လိၣ်ဘၣ်တၢ်မၤစၢၤတဖၣ်အဖၢမုၢ်လီၤအဂ့ၢ် နးခၠီသ၀ီ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိ အူအ့မီၣ် စံး၀ဲန့ၣ်လီၤ.
ကလ့ကီၢ်ဆၣ်အပူၤ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဒဲက၀ီၤ အိၣ်၀ဲအဖျၢၣ်(၁၀)ဘျဲၣ်၀ံၤ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိအါတက့ၢ်အံၤစးထီၣ်လၢ၂၀၂၁နံၣ်,သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအဆၢကတီၢ်န့ၣ် ဘၣ်ဃ့ၢ်ပူၤဖျဲးသးန့ၣ်လီၤ.
ဘၣ်ဃ့ၢ်ပူၤဖျဲးသုးတစိၤတလီၢ်ဘၣ်ဆၣ် ခီဖျိသုးကီၣ်ကးဒွဲၣ်အူမၤဟးဂီၤကွံၥ် ဟံၣ်ဃီတဖၣ်အဃိ က့ၤဆူဟံၣ်တန့ၢ်လၢၤဘၣ်ဒီး ဘၣ်အိၣ်၀ဲဒၣ်လၢဒဲက၀ီၤတဖၣ်အဃိ ဘၣ်ကွၢ်ဆၢၣ်မဲၥ်ဘၣ်ဒီး တၢ်အိၣ်ဆူၣ်အိၣ်ချ့ဒီးတၢ်အီၣ်တၢ်အီတၢ်ဂ့ၢ်ကီတဖၣ်အဂ့ၢ် ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဂၤ စံး၀ဲန့ၣ်လီၤ.
ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ်အကျါ ပၥ်ဃုၥ်၀ဲ သူၣ်ခ့သးပှၢ်တဖၣ်, နီၢ်ခိၣ်က့ၢ်ဂီၤတဂ့ၤတဖၣ်, မိၢ်ဒၢတဖၣ်, ပှၤဆါယံၤထၢတဖၣ် ဒီးတၢ်အိၣ်ဆူၣ်အိၣ်ချ့တဂ့ၤတဖၣ်န့ၣ်လီၤ.
ကလ့ကီၢ်ဆၣ်အပူၤ ခီဖျိသုးကီၣ်ကးအသုး ဒွဲၣ်အူမၤဟးဂီၤကွံၥ် ကမျၢၢ်ဟံၣ်ဃီတဖၣ်အဃိ လီၢ်က၀ီၤကမျၢၢ်ဟံၣ်ဃီ(၁၀၀၀၀)ဘျဲၣ် မ့ၣ်အူအီၣ်ဟးဂီၤကွံၥ်၀ဲ၀ံၤ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ် ဟဲအါထီၣ်၀ဲ တပယူၥ်ဃီလီၤအဂ့ၢ် ပှၤလၢမၤစၢၤ ပှၤဃ့ၢ်သုးထံလီၢ်ကီၢ်ပူၤပှၤလီၢ်အိၣ်ကမှံဖိတဖၣ် စံး၀ဲန့ၣ်လီၤ.
ဘီမုၢ်စၢဖှိၣ်ကရၢဘၣ်ထွဲပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤဒီးတၢ်ထိၣ်ဃူ၀ဲၤဒၢး(UN OCHA) ၂၀၂၄နံၣ်, လါအီကူး(၁၇)သီ အတၢ်ဘိးဘၣ်ရၤလီၤစရီအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ပှၤလၢပၥ်တ့ၢ်ဟံၣ်ဃီဘၣ်ဃ့ၢ်ပူၤဖျဲးသး အိၣ်ထီၣ်၀ဲ(၃)ကကွဲၢ်ဃၣ်ဃၣ်န့ၣ်လီၤ.
Ref: DVB
