လါအီးကထိဘၢၣ်(၉)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ သုးကီၣ်ကးအသုး မၤ၀ဲတၢ်သမံးသမိးဃံးဃံးလီၤအဂ့ၢ် ဂံၢ်ခီၣ်ထံးတၢ်ကစီၣ်ဖိတဂၤ စံး၀ဲန့ၣ်လီၤ.
“ခဲအံၤ တၢ်ဒုးကဲထီၣ်သးတအိၣ်ဘၣ်. တၢ်အိၣ်သးန့ၣ် ဘၣ်တဲဂၢၢ်လီၤလံ. သုးကီၣ်ကးတခီ ခးလီၤကျိဖးဒိၣ်တဖၣ်အိၣ်ထီၣ်၀ဲ ကိးမုၢ်နံၤဃၣ်ဃၣ်လီၤ.” အဂ့ၢ် စံး၀ဲန့ၣ်လီၤ.
ကတီၢ်ခဲအံၤ သုးကီၣ်ကးအသုး(ခမရ-၄၃၉)လၢ အိၣ်ဆီလီၤအသး ဖဲကီၢ်ဆၣ်မူဟီၣ်က၀ီၤ, ကညိးကွ့သုးကလၢၤအပူၤ တၢ်မၤတၢ်သမံးသမိးဃံးဒိၣ်မးလီၤ. သမံသမိး၀ဲ ခိၣ်ဂီၤတဖၣ်ဃံးဃံးလီၤအဂ့ၢ်” စံး၀ဲန့ၣ်လီၤ.
လီၤဆီဒၣ်တၢ် သုးကီၣ်ကးမၤတၢ်သမံသမိး ပှၤလ့ၤလိၤဟးထီၣ်ဖိလၢ ဟဲလၢ၀့ၢ်လၢၢ်ဒိၣ်တပၤတဖၣ် ဃံးဃံးလီၤအဂ့ၢ် စံး၀ဲန့ၣ်လီၤ. မၤတၢ်သမံသမိးဒ်သိးအံၤန့ၣ် အိၣ်ထီၣ်၀ဲ (၂)နွံဃၣ်ဃၣ်လံအဂ့ၢ် တၢ်သ့ၣ်ညါဘၣ်န့ၣ်လီၤ.
လါစဲးပထ့ဘၢၣ်(၃၀)သီအနံၤ, ဟါ(၂)နၣ်ရံၣ်အဆၢကတီၢ် လၢၢ်ဒိၣ်ကီၢ်ဆၣ်ဟီၣ်က၀ီၤ, နိၣ်ထိးအ့ၣ်သ၀ီဖိလၢအမ့ၢ် စီၤထံမူဒီးနီၢ်သဒါဖီ(၂)ဂၤ လဲၤပှ့ၤတၢ်လၢ ၀့ၢ်လၢၢ်တြဲၤအံၤ ခီဖျိ၀့ၢ်လၢၢ်တြဲၤပၢၤကီၢ်သုး ပှၤဟ့ၣ်တၢ်ကစီၣ်ဖိ စီၤစိနၢၤ၀့ က့ၤကိးအီၤဆူ ပၢၤကီၢ်သုးကလၢၤ၀ံၤ ဖီၣ်ဒုးဃၥ် မၤသမံးသမိးတဖၣ်အဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ဘိးဘၣ်ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲၥ်ညါ သုးကီၣ်ကးအသုးခးလီၤကျိဖးဒိၣ်ဒီးဒြိမ့ၣ်ပိၢ်တဖၣ်ဆူ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤအပူၤအဃိ ကမျၢၢ်တၢ်ဘၣ်ဒိဘၣ်ထံး,တၢ်သံတၢ်ပှၢ် ဒီး ကမျၢၢ်အိၣ်ဆိးလီၢ်ကျဲ, ဖံးအီၣ်မၤအီၣ်လီၢ်ကျဲတၢ်ဟးဂုၤဟးဂီၤတဖၣ် အိၣ်ထီၣ်၀ဲ ကိးမုၢ်နံၤဃၣ်ဃၣ်န့ၣ်လီၤ.
