လါအီးကထိဘၢၣ်(၉)သီ,၂၀၂၄နံၣ်
၂၀၂၄နံၣ်,လါအီးကထိဘၢၣ်(၁)သီနံၤတုၤ(၈)သီနံၤ လၢ(၈)သီအတီၫ်ပူၤ လၢထံကီၫ်ဒီတဘ့ၣ် သုးကီၣ်ကးအတၫ်ဒုးတဖၣ်အဃိ ဖိသၣ်(၇)ဂၤပာ်ဃုာ် ခဲလၢာ်ပာ်ဖှိၣ် ဘၣ်သံ၀ဲ (၂၄)ဂၤအဂ့ၫ် တၫ်မၤစၢၤထံရူၫ်ကီၫ်သဲးပှၤလီၤဃိၣ်ဖိကရၢ (AAPP)ဘိးဘၣ်ရၤလီၤ၀ဲဖဲလါအီးကထိဘၢၣ်(၈)သီနံၤန့ၣ်လီၤ.
ပှၤဘၣ်သံအါတက့ၫ်န့ၣ် ခီဖျိလၢကလံၤကျါတၫ်ခးလီၤတၫ်တဖၣ်အဃိ၀ံၤ လၢမကွ့ကီၫ်ခီပူၤ ပှၤဘၣ်သံအဂၤ (၁၀) ဒီးမ့ၫ်အအါကတၢၫ်န့ၣ်လီၤ.ပှၤဘၣ်သံအကျါ သးနံၣ်(၁)နံၣ်ဘျဲၣ်ဖိသၣ်တဂၤပာ်ဃုာ် ,သးနံၣ်(၁၈)နံၣ်အဖီလာ် ဖိသၣ်(၇)ဂၤ,ပိာ်မုၣ်(၁၃)ဂၤ,ပိာ်ခွါ(၁၁)ဂၤ ပာ်ဃုာ်၀ဲအဂ့ၫ် ပာ်ဖျါ၀ဲလီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ(၃)နံၣ်ဘျဲၣ်အတီၫ်ပူၤ ဖိသၣ်ဘၣ်သံ၀ဲ အိၣ်ထီၣ်(၆၃၈)ဂၤလံအဂ့ၫ် AAPPတဲ၀ဲလီၤ.
သုးကီၣ်ကးကလံၤကျါတၫ်ခးလီၤတၫ်တဖၣ်အဃိ တနွံအတီၫ်ပူၤ ပှၤဘၣ်သံ(၁၈)ဂၤဒီး မ့ၫ်အအါကတၢၫ်၀ံၤ ဖဲလါအီးကထိဘၢၣ်(၅)သီနံၤ တ့ၫ်လီၤမ့ၣ်ပိၫ်ဒီးခးလီၤကျိစဲးတဖၣ် ဖဲမကွ့ကီၫ်ခီ,ကီၫ်ဆၣ်ထံလ့ ,ကၠ့ကၠ့ၣ်သ၀ီအဃိ ကမျၢၫ်တၫ်ဘၣ်ဒိဘၣ်ထံးတၫ်သံတၫ်ပှၫ်အိၣ်၀ဲအဂ့ၫ် ကွဲးဖျါဃာ်၀ဲလီၤ.
၂၀၂၁နံၣ်,လါဖ့ၤဘြူၤအါရံၤ(၁)သီနံၤတုၤ ၂၀၂၄နံၣ် လါအီးကထိဘၢၣ်(၈)သီနံၤ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ (၃)နံၣ်ဘျဲၣ်အတီၫ်ပူၤ ပှၤဘၣ်သံ(၅,၇၈၀)ဂၤ၀ံၤ ပှၤလၢဘၣ်တၫ်ဖီၣ်ဃာ်အိၣ်၀ဲ(၂၇,၅၂၂)ဂၤအဂ့ၫ် တၫ်ဘိးဘၣ်ရၤလီၤအပူၤပာ်ဖျါ၀ဲလီၤ.
