လါအီးကထိဘၢၣ်(၈)သီ,၂၀၂၄နံၣ်
ရၢၫ်ခၢၣ်ကီၫ်စဲၣ် ,ကီၫ်ဆၣ်ကွး,ဖဲစှၤသီအတီၫ်ပူၤ တၫ်ဒုးဆူၣ်ထီၣ်အဃိ လီၫ်က၀ီၤကမျၢၫ်ဘၣ်သုးလီၫ်သုးကျဲအဂ့ၫ် တၫ်သ့ၣ်ညါဘၣ်လၢ ပှၤမၤစၢၤ ပှၤလီၫ်အိၣ်ကမှံဖဲန့ၣ်တဖၣ်အိၣ်န့ၣ်လီၤ.
အပူၤကွံာ် စးထီၣ်ဖဲလါအီကထိဘၢၣ်(၂)သီနံၤ သုးကီၣ်ကးဒီးရၢၫ်ခၢၣ်သုးမုၫ်ဒိၣ် (AA)အဘၢၣ်စၢၤ တၫ်ဒုးဆူၣ်ထီၣ် လၢကီၫ်ဆၣ်ကွး အဃိ ကီၫ်ဆၣ်အပူၤ ကလါပၠ့ၣ,ကဲခိၣ်,ကၠ့ၣ်ခၠဲၤ, မီၣ်ရွှ့ၣ်ကၠဲၣ်,ရတနၣ်မၠဲၣ်,ဆါခၠဲး,သပြုးခၠီ,ကးကီၣ်တီၣ်,ယ့ၣ်ကၠီၣ်သ၀ီတဖၣ်အပူၤ လီၫ်က၀ီၤကမျၢၫ်တဖၣ် ဘၣ်ဃ့ၫ်ပူၤဖျဲးသးလီၤ.
“အခဲအံၤလၢ၀့ၫ်ပူၤ ပှၤအိၣ်တ့ၫ်တအါလၢၤဘၣ်.ပှၤလၢအိၣ်တ့ၫ်တဖၣ် ကလဲၤထီၣ်က့ၤလီၤအဂီၫ် တၫ်လၢာ်ဘူၣ်လၢာ်စ့ၤ အိၣ်၀ဲအဃိ, ဒီးလၢတၫ်ဂ့ၫ်အကလုာ်ကလုာ်အဃိ အိၣ်တ့ၫ်၀ဲလီၤ.တနီၤဒု ဟးလူၤဃ့ၫ်အိၣ်ကဒု ဖဲတၫ်လီၫ် လၢအဘူးတဖၣ်အိၣ်အသိး,တနီၤလဲၤပဒ့ၣ်ဟးဆှဲးအသး လၢအ့ၣ်ယၣ်၀တံၣ်ကီၫ်ခီဒီး၀့ၫ်တကူၣ်ကီၫ်ခီတကပၤ အိၣ်၀ဲ လီၤ.တၫ်ဒုးတၫ်အိၣ်သးလၢကတီၫ်ခဲအံၤတခီ တၫ်တဲလီၤတံၫ်တန့ၫ်ဒံးဘၣ်အဂ့ၫ် ပှၤမၤစၢၤပှၤလီၫ်အိၣ်ကမှံဖိတဖၣ် တဲ၀ဲလီၤ.
လၢကတီၫ်အံၤ ရတနၣ်မၠဲၣ်,ကဲခိၣ်,ဆါခၠဲးဒီး ကလါပၠ့ၣ်သ၀ီလၢအိၣ် စီၤစုၤဒီး၀့ၫ်ကွးထဲမံးလာ်(၃၀)အံၤအကပၤ ဖဲကးကီၣ်ကစၢၫ်ကလိကျါ တၫ်ဒုးကဲထီၣ်ဒီးကလံၤကျါတၫ်ခးလီၤတၫ်တ ဖၣ်တကးဘၣ် ကျိဖးဒိၣ်အချံလီၤတဲာ်ပိၫ်ဖး၀ဲအိၣ်န့ၣ်လီၤ.
ရၢၫ်ခၢၣ်ကီၫ်စဲၣ်အပူၤ အပူၤကွံာ် စးထီၣ်ဖဲ၂၀၂၃နံၣ်,လါနိၣ်၀့ဘၢၣ် တၫ်ဒုးကဲထီၣ်ကဒါက့ၤကဒီးတဘျီအပူၤ ရၢၫ်ခၢၣ် သုးမုၫ်ဒိၣ်(AA)န့ၣ် ထီၣ်ဒုးပၢဃာ်၀ဲ ရၢၫ်ခၢၣ်(ကလံၤစိး)၀့ၫ်တဖၣ်၀ံၤ လၢကတီၫ်အံၤ ၂၀၂၄နံၣ်အပူၤတခီ တၫ်ဒုးတဖၣ် ဟဲခီဃီၤဆူရၢၫ်ခၢၣ်ကလံၤထံး၀့ၫ်တဖၣ်အိၣ်န့ၣ်လီၤ.
ကီၫ်ဆၣ်ကွးအပူၤ စးထီၣ်လၢတၫ်ဒုးကဲထီၣ်အဆၢကတီၫ် တၫ်လဲၤထီၣ်က့ၤလီၤတဖၣ် တၫ်ကးတံာ်ဃာ်အဃိ ပနံာ်ကၤထီၣ်ဒီးလီၫ်က၀ီၤကမျၢၫ် ကွၫ်ဆၢၣ်မဲာ်ဘၣ် တၫ်အီၣ်တၫ်အီကသံၣ်ကသီတၫ်ဂ့ၫ်ကီတဖၣ်န့ၣ်လီၤ.
ဘၣ်ထွဲဒီးလၢကတီၫ်အံၤ ကီၫ်ဆၣ်ကွး သုးဂ့ၫ်၀ီတၫ်အိၣ်သးန့ၣ် သုးကီၣ်ကးမ့ၫ်ဂ့ၤ,ရၢၫ်ခၢၣ်သုးမုၫ်ဒိၣ်မ့ၫ်ဂ့ၤ တထုးထီၣ် ဘိးဘၣ်ပာ်ဖျါတၫ်နီတမံၤဒံးဘၣ်.
