လါအီးကထိဘၢၣ်(၈)သီ,၂၀၂၄နံၣ်
အ့ၣ်ယၣ်၀တံၣ်ကီၫ်ခီ,ကီၫ်ဆၣ်တနီၤအပူၤ ဖဲလါအီးကထိဘၢၣ်(၁)သီနံၤ တၫ်စးထီၣ်ထၢဖးဖီမုၫ်စရီအပူၤ တဲ၀ဲလၢ တၫ်ဘံၣ်တၫ်ဘၢအဂီၫ်၀ံၤ သုးကီၣ်ကး လူၤဆီလီၤဃာ်အသုးဖိအိၣ်၀ဲန့ၣ်လီၤ.
ဖဲလါအီးကထိဘၢၣ်(၁)သီနံၤ သုးကီၣ်ကးသုးဖိဂံၫ်ဘါအိၣ်(၅၀)ဂၤဃၣ်ဃၣ် ဟဲဆူကီၫ်ဆၣ်ငပူတီ,ဖၠၣ်ယ့ၣ်ကၠီၣ်သ၀ီ (ဖျံရေကျော်ကျေးရွာ) ခီဖျိလၢ လီၤက၀ီၤတၫ်အိၣ်ဂၢၫ်ဆိးကျၢၤအဂီၫ်၀ံၤ ဆီလီၤအသုးမံဖဲသီခါဖၠၣ်အဂ့ၫ် တၫ်သ့ၣ်ညါ ဘၣ်လၢလီၫ်က၀ီၤဖိတဖၣ်အိၣ်န့ၣ်လီၤ.
“သုးမ့ၫ်ဟဲန့ၣ် သ၀ီသးပှၫ်ပာ်ဖျါထီၣ်အတၫ်စိတၫ်ကမီၤလီၤ.ပှၤလၢကွၫ်၀ဲတန့ၫ်ဘၣ်တဖၣ် တဲ၀ဲလၢပှၤမၤစၢၤဆီၣ်ထွဲ တၫ်၀ံၤ မၢပှၤဖီၣ်၀ဲလီၤ.သုးမ့ၫ်ဟဲန့ၣ် ပှၤဒ်န့ၣ်သိးတဖၣ် ဘၣ်ပဒ့ၣ်ဟးဆှဲးအသးလီၤ. ဟးလူၤကွၫ်တၫ်လၢ သ၀ီပူၤယံာ် တနွံ၀ံၤအလီၫ်ခံ က့ၤလီၤ.သုးမ့ၫ်ဟဲန့ၣ် တၫ်ဘၣ်ယိၣ်ထဲကဖီၣ်တီၣ်ပှၤကညီလီၤအဂ့ၫ်” ပှၤလီၫ်က၀ီၤဖိတဂၤတဲ၀ဲလီၤ.
ကီၫ်ဆၣ်ဟီကတး,မၠၣ်အီၣ်ဒီးအ့ကပူၣ်တဖၣ်အပူၤ သ၀ီတဖၣ်စ့ၫ်ကီး သုးကီၣ်ကးအသုးဖိ ဟဲတုၤ၀ံၤ လူၤပိာ်ပှၤထၢဖးဖီမုၫ်စရီအခံအိၣ်အသိး,နုာ်လီၤဒံးဆူ သ၀ီ(၁၀)ဖျၢၣ်အပူၤဒံးအဂ့ၫ် လီၫ်က၀ီၤဖိတဖၣ် တဲ၀ဲလီၤ.
ဖဲလါအီးကထိဘၢၣ်(၃)သီနံၤစ့ၫ်ကီး သုးကီၣ်ကးကလံၤသုးဖိ(၁၀)ဂၤ ဟဲဖဲကီၫ်ဆၣ်ငပူတီ, တမၣ်ခၠီသ၀ီကရူၫ်၀ံၤတဲ၀ဲလၢ လီၫ်က၀ီၤတၫ်အိၣ်ဂၢၫ်ဆိးကျၢၤအဂီၫ်လီၤ.
“အနီၫ်နီၫ်တခီ ဘၣ်ယိၣ်၀ဲလၢကဘၣ်လဲၤတၫ်မဲာ်ညါဒီး တီၣ်ထီၣ်တၫ်ဂ့ၫ်လၢ တၫ်ဘံၣ်တၫ်ဘၢအဂံၫ်စၫ်၀ံၤ ဟဲဃုတၫ်လီၤ .ဖဲအံၤတကပၤ ကဃုကွၫ်၀ဲ(၁)နွံဒီးကလူၤဖီၣ်၀ဲပှၤလၢန့ၣ် လၢအံၤ၀ံၤ ကဃ့အီၣ်၀ဲစ့ဒ်န့ၣ်လီၤအဂ့ၫ်” သုးဖိလီၫ်လံၤတဂၤ တဲ၀ဲလီၤ.
လၢကတီၫ်အံၤ ထံကီၫ်ဒီတဘ့ၣ်တၫ်ဒုးအပူၤ သုးကီၣ်ကးတကပၤ ဘၣ်သံဘၣ်ပှၫ်အါဒီး ဘၣ်ယိၣ်၀ဲလၢကဘၣ်လဲၤ တၫ်မဲာ်ညါတၫ်ဒုးပျီအဃိ အ့ၣ်ယၣ်၀တံၣ်ကီၫ်ခီအပူၤ ပှၤလူၤထၢပှၤနီၫ်ဂံၫ်ဒီးဖးဖီမုၫ်စရီတဖၣ် တဲ၀ဲလၢ တၫ်ဘံၣ်တၫ်ဘၢ ဒီးလီၫ်က၀ီၤတၫ်အိၣ်ဂၢၫ်ဆိးကျၢၤအဂီၫ်၀ံၤ ပာ်ဖျါထီၣ်ဂံၫ်ဘါ ဆီလီၤအသုးအဂ့ၫ် တၫ်သ့ၣ်ညါဘၣ်လၢ ပှၤအိၣ်ဘူးဒီး သုးကီၣ်ကးအိၣ်န့ၣ်လီၤ.
