လါအီးကထိဘၢၣ်(၄)သီ,၂၀၂၄နံၣ်
ခ့ၣ်အဲၣ်ယူၣ်-မုၢ်တြီၢ်တၢ်ကစီၣ် ဘိးဘၣ်ရၤလီၤဃၣ်၀ဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,သုးက့နီၣ်ဂံၢ်(၅), ကီၢ်ရ့ၣ်မုၢ်တြီၢ်ဟီၣ်က၀ီၤပူၤ, စးထီၣ်လၢလါစဲးပထ့ဘၢၣ်(၁)သီတုၤ(၃၀)သီအနံၤ, (၁)လါအတီၢ်ပူၤ တၢ်ဒုးကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), သုးပၥ်ဖှိၣ်ဒီး သုးကီၣ်ကးအသုးအဘၢၣ်စၢၤ ခဲလၢၥ်အိၣ်၀ဲ(၁၄၄)ဘျီ၀ံၤ သုးကီၣ်ကးအသုးတပၤ သံ၀ဲ(၇၄)ဂၤ ဒီးဘၣ်ဒိ၀ဲ(၄)ဂၤအဂ့ၢ်န့ၣ်လီၤ.
သုးကီၣ်ကးအသုးသံ(၇၄)ဂၤအကျါ ပၥ်ဃုၥ်၀ဲ သုးရ့ၣ်ခိၣ်(၁)ဂၤ, သုးဒ့ခိၣ်(၂)ဂၤ, သုးဒ့ခိၣ်(ခံ) (၁)ဂၤ ဒီး ဘၣ်ဒိ၀ဲအကျါ ပၥ်ဃုၥ်၀ဲ သုးရ့ၣ်ခိၣ်(၁)ဂၤအဂ့ၢ် ပၥ်ဖျါဃၣ်၀ဲန့ၣ်လီၤ.
တၢ်ဒုးကဲထီၣ်သးလၢ ခံခီခံကပၤအပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုးတပၤ ဟဲဒုးတၢ်လၢကလံၤကျါအိၣ်ထီၣ်၀ဲအသိး ဟဲဆှၢန့ၢ်တၢ်အီၣ်တၢ်အီဆူ အပှၤသုးဖိတဖၣ်လၢ ကဘီယူၤအိၣ်ထီၣ်၀ဲထီဘိအဂ့ၢ် စံး၀ဲန့ၣ်လီၤ.
လါစဲးပထ့ဘၢၣ်(၁)လါအတီၢ်ပူၤ ခီဖျိသုးဟံးန့ၢ်ဆူၣ်ထံကီၢ်တၢ်စိတၢ်ကမီၤသုးကီၣ်ကးအသုး ခးလီၤကျိဖးဒိၣ် ဆူကီၢ်ရ့ၣ်မုၢ်တြီၢ်ဟီၣ်က၀ီၤပူၤအဃိ ဘၣ်သံ၀ဲကမျၢၢ်(၁)ဂၤ ဒီး ဘၣ်ဒိ၀ဲ(၅)ဂၤအဂ့ၢ် ပၥ်ဖျါဃၣ်၀ဲန့ၣ်လီၤ.
လၢန့ၣ်အမဲၥ်ညါဖဲအပူၤကွံၥ်လါအီကူၥ်(၁)လါအတီၢ်ပူၤစ့ၢ်ကီး တၢ်ဒုးကဲထီၣ်သးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA), သုးပၥ်ဖှိၣ်ဒီး သုးကီၣ်ကးအသုးအဘၢၣ်စၢၤ ခဲလၢၥ်အိၣ်၀ဲ(၁၁၅)ဘျီ၀ံၤ သုးကီၣ်ကးအသုး သံ၀ဲ(၃၅)ဂၤ ဒီး ဘၣ်ဒိ၀ဲ(၁၃)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
