လါအီးကထိဘၢၣ်(၄)သီ,၂၀၂၄နံၣ်
လါအီးကထိဘၢၣ်(၃)သီအနံၤ, ခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ် တၢ်ကစီၣ်ဘိးဘၣ်ရၤလီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့နီၣ်ဂံၢ်(၃), ကီၢ်ရ့ၣ်ချၢၣ်လွံၢ်ထူၣ်, ကီၢ်ဆၣ်မူဒီးကီၢ်ဆၣ်ဆီထံးဟီၣ်က၀ီၤအပူၤ ခီဖျိလၢသုးကီၣ်ကးအသုးပညိၣ်ခးလီၤကျိဖးဒိၣ်ဒီးဒြိတဖၣ် ဆူကမျၢၢ်အိၣ်ဆိးလီၢ်ကျဲဖံးအီၣ်မၤအီၣ်လီၢ်ကျဲတဖၣ်အပူၤအဃိ ဘၣ်ဒိ၀ဲ ဖိသၣ်(၃)ဂၤပၥ်ဃုၥ် ကမျၢၢ်(၆)ဂၤ ဒီး ဘၣ်ဟးဂီၤကွံၥ်၀ဲ ဃိၣ်(၁)ဖျၢၣ်အဂ့ၢ်န့ၣ်လီၤ.
လါစဲးပထ့ဘၢၣ်(၂၉)သီအနံၤ, ဂီၤ(၉)နၣ်ရံၣ်ဘျဲၣ်အဆၢကတီၢ် သုးကီၣ်ကးအသုး(ခမရ-၅၉၈)သုးရ့ၣ်ခးလီၤကျိဖးဒိၣ်(၁၀)ဖျၢၣ်ဆူ ဆီထံးကီၢ်ဆၣ်ပူၤအဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ ညီၣ်ခၠ့ၣ်ထီးသ၀ီကပၤ(၃)ဖျၢၣ် ဒီး ရှါစူးသ၀ီပူၤ(၇)ဖျၢၣ်၀ံၤ ဘၣ်ဟးဂီၤကွံၥ်၀ဲစ့ၢ်ကီး ဃိၣ်(၁)ဖျၢၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
တကးဘၣ် တနံၤဃီ ဖဲ မုၢ်ဃ့ၢ်လီၤ(၂)နၣ်ရံၣ်ဒီး(၃)နၣ်ရံၣ်အဘၢၣ်စၢၤအဆၢကတီၢ်, သုးကီၣ်ကးအသုး ခးလီကျိဖးဒိၣ်တဖၣ် ဆူစၣ်ဖဲသ၀ီဒီးသဲးကဲၣ်ကိသ၀ီတဖၣ်ပူၤအဃိ ဘၣ်ဒိ၀ဲသၢဂၤလၢအမ့ၢ် စၣ်ဖဲသ၀ီဖိ မယတံၣ်ဒီး သဲးကဲၣ်ကိသ၀ီဖိ မန့န့ သးနံၣ်(၅၀)နံၣ်, မီၣ်မၠိထဲးအီၣ် သးနံၣ်(၂၅)နံၣ်တဖၣ်အဂ့ၢ် စံး၀ဲန့ၣ်လီၤ.
လၢန့ၣ်အမဲၥ်ညါ လါအီးကထိဘၢၣ်(၂)သီအနံၤ, ဂီၤ(၂း၃၀)နၣ်ရံၣ်ဃၣ်ဃၣ်အဆၢကတီၢ် သုးကီၣ်ကးအသုး(ခမရ−၃၀၇)သုးရ့ၣ် ဟဲတ့ၢ်လီၤဒြိမ့ၣ်ပိၢ်ဆူ ကီၢ်ဆၣ်မူဟီၣ်က၀ီၤ, သနးကွ့သ၀ီပူၤအဃိ ဘၣ်ဒိ၀ဲ ဖိသၣ်(၃)ဂၤလၢအမ့ၢ် (၁)မမၠးသးလ့ (၂)မီၣ်မ့ခးအီၣ် ဒီး(၃) မီၣ်သီၣ်စ့ၣ်ခးတဖၣ်အဂ့ၢ် ပၥ်ဖျါဃၣ်၀ဲန့ၣ်လီၤ.
ခီဖျိလၢ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်ကးအသုး ခးလီၤကျိးဖဒိၣ်ဒီး ကလံၤကျါတၢ်ဒုးတဖၣ်အဃိ ကီၢ်ရ့ၣ်ချၢၣ်လွံၢ်ထူၣ်ဟီၣ်က၀ီၤပူၤ ကမျၢၢ်တၢ်ဘၣ်ဒိဘၣ်ထံး, တၢ်သံတၢ်ပှၢ် ဒီး ဘၣ်ဟးဂုၤဟးဂီၤကွံၥ်၀ဲ ကမျၢၢ်ဖံးအီၣ်မၤအီၣ်လီၢ်ကျဲတဖၣ် ဒီးကမျၢၢ်စုလီၢ်ခီၣ်ခိၣ်သ့ၣ်တဖၣ်အိၣ်ထီၣ်၀ဲထီဘိန့ၣ်လီၤ.
